10
A Samuel na olive simi gbolo nyini wru mna ki kna mu wo Saul ndra na, mna u nyu shiun mna kna mu yo u pan mbo, “Nyiɛkpɔɔ u mu wɔ na mu u wolo Israel leele pre yiɛklu. Mu mu leele pre yiɛklu mbe pe shɔ mbe yili pe loŋgoolo kɛɛ. Kee ŋga kie mu dansiɛrɛ li na o Tafun Nyiɛkpɔɔ u mu wɔ na mu u leele le yi na, 2 na mu yili mna aŋga na shie kre, mu bilɛ shiin fni Rachel faŋga lawee Zelzah na, Benjamin tra nu. Pie yo mu pan na bubunlɔ mblɛ e chaa kre, pe pe nya, ki tia e lɛ n na pe kee jawa na, la, yire kee ki u shian, a wra wie suwi na, ‘Mni mbe pe mbe ni pɔ ŋmba nya hin?’ 3 Na e yiri wa na shie mu sɛ da tiŋge kpɔɔ ŋga kii wa Tabor na kre lawee, bawa ee bilɛ taarɛ fni na pe paan mbe sra wɔ Bethel na mbe Nyiɛkpɔɔ ŋga. Pe nunu we sikaala biile taarɛ yii kɛɛ, a nunu we paanu taarɛ tio, mbe nunu wre simi le yurɔ hlɛ gbolo nu mbe yii kɛɛ. 4 Pie mu shaari mbe mu ŋga paanu yire shiin, na pe waa mu ŋga yi yi mbe mu yi shɔ. 5 Na mu yiri wa to, mu sɛ Gibeah na, Nyiɛkpɔɔ nyua kre na, lawee ŋga nu Philistine sɛ tni kre. Na e waa na lee chia kre na, ee Nyiɛkpɔɔ kee nyanyofɛɛnlɛ plɛ fni, na pe yiri sragbunu kre lawee nyua na na paan, mbra juru na binyi gbuun, mbra bnɔɛ foo. Pie na yoo mbra gble leni. 6 Na e waa pe fni to, titɛɛ kre nu, o Tafun Nyiɛkpɔɔ ŋumu we paan le mu nu, mbe ŋu na pre chaa mbe kee nya mbe yo, a mu kna lewo fɔŋgɔ kuraa. 7 Na yire kee nyjɛ waa pan mu na, le na mu ŋga Nyiɛkpɔɔ yo mu pe kre pe. 8 Na mu kɔ, mu yiɛ klu mna shie Gilgal na, mu ni shie wa ble kɔɔnashin, mbe paan mu fni wa, mbe paan yirɛ sroo, na wejinyiŋge sra wɔ, mbe mu nyina kee ŋga mu pe.” 9 Ŋga Saul na Samuel ti wa na shie kre, Nyiɛkpɔɔ na u ŋga loloŋgo fɔŋgɔ. A kee nyjɛ Samuel na yo u pan yire kro na pe ki ble kre. 10 Ŋga Saul na u tnu wre na le Gibeah na kre, Nyiɛkpɔɔ kee nyanyofɛɛnlɛ plɛ na u fni. Titɛɛ kre nu to, a Nyiɛkpɔɔ ŋumu na pan mu le u nu, a wre na pre na chaa na Nyiɛkpɔɔ kee nyaa na yuu. 11 Leele mblɛ pra u chin fa pre na u nya, mnaa peyɛ wie mbo, “A yira ŋgi ki Kish pɔ wre ta aŋga hin? Saul kaari Nyiɛkpɔɔ kee nyanyofun aŋga ra wolo?”
12 Blɔ wa naa wa wa, a wra kna mna pe wie mbo, “A ŋga e wre kee yuu ŋga, a Nyiɛkpɔɔ keenyanyofɛɛnlɛ hamblɛ pre hin? E pe lɛɛ chin leele mblɛ sembremu lɛ ra?” A kra pe keyoo mbo, “Saul le rɛ, a pe yo Nyiɛkpɔɔ kee nyanyofun wi wre na!” 13 Ŋga Saul na Nyiɛkpɔɔ kee nyanyo mu kɔ kre, a wra sɛ sragbunu kre lawee nyua kre na. 14 A Saul nalɔ, na wre na u sumifun wre nya mna pe wie mbo, “A sena e sɛ hin? Bubunlɔ pre e chaa tɛ ree?” U nalɔ wre na ndru mu u wie mbo.
A Saul na kna mbo, “Ŋga o kila chiin a o n na pe nyaa kre, a o sɛ Samuel pan.”
15 U nalɔ wre na ndru mu u wie mbo, “A yira ŋgi kee Samuel yo e pan hin?”
16 Saul na kna mbo, “U yo o pan na pe pe nya.” La, Saul nsra kee ŋga Samuel yo u pan, na we pe ŋunu kre kee yo u nalɔ wre pan.
Pe Saul Tɛɛ Ŋunumu Na
17 A Samuel na Israel leele pre yeeri a pra pan mu fni Nyiɛkpɔɔ yiɛ Mizpah na. 18 Bawa wra yo pe pan mbo, “O Tafun Nyiɛkpɔɔ wre yo ni yo e pan na, ‘Mi, ndaa e wɔ mu yili Egypt na, mna e shɔ mu yili Egypt leele na leele mblɛ praa e fiŋge pre kɛɛ. 19 Mi wi e Nyiɛkpɔɔ ŋmba ni e woni na yilii e kanyana kro nu. E ni je aŋga, mu yo ni pan na ni e ŋga ŋunu. Ki nyu, kena e eyɛ ble sele sele.’”
20 A Samuel na tia praa pan na yire sele sele, a wra Benjamin sele wɔ. 21 A wra tia Benjamin sele kre na pan mu yire lɛ biile, a wra Matri lɛ biile pre wɔ. A wra tia Matri lɛ biile pre na pan mu yire, a wra Kish pɔ Saul wɔ. A pra Saul le mna u cha mu la. 22 A pra O Tafun Nyiɛkpɔɔ wie mbo, “Ndro fuŋu waa wa na ree?” A o Tafun Nyiɛkpɔɔ wre na yo mbo, “Saul wa mu ndra yirɛ ndoolo.” 23 A pra fɛ mna sɛ Saul yii mna pan na u ni leele pre nu. Pra u nya na u gede mu wɛ leele pre na kro. 24 A Samuel na kna mu yo leele pre pan mbo, “Wre pɔ ŋmba, wre o Tafun Nyiɛkpɔɔ wɔ. Ndro wa n wa o nu mu pe na wre wi.” A leele pre na gble fɔɔri mu le mbo, “Nyiɛkpɔɔ we ŋunu ndra tun tɔɔnrɔ.”
25 Samuel na leele pre nyina kee nyjɛ ŋunu fna mbra pini, na nyjɛ yi n fna wra pini. A wra yi nyunɔ hlɛ na mna yi tɛɛ o Tafun Nyiɛkpɔɔ Cheche ndoo wa, mna tia leele pre kro na ndru mu sɛ pe kalonyi nu.
26 A Saul na ndru mu sɛ u katoo Gibeah na, a Nyiɛkpɔɔ na bilɛ gbunfɛɛnlɛ plɛ wɔ leele pre nu, a pre na Samuel na sɛ. 27 A nyuchafɛɛnlɛ plɛ na yiri na yuu mbo, leele mblɛ nyini pe wɔ mu taa u na ŋga hin? Ŋgi mblɛ we jaa pe hin? A kra tia leele pre naa Saul le fiɛn, pe nsra u ŋga yaka na, a wre nsra nyu kun na ndro ni.