Saul Na Ammon Leele Ja
11
Kie pe nyiɛpɔ kɔkro kre, Ŋunu Nahash ŋmba u yiri Ammon na pre na u leele wru a pra sɛ Jabesh chia ŋga kii wa Gilead tra nu kre tɔ. A Jabesh leele pre na Ŋunu Nahash tali na pe ti mbe pe yira ka mbe praa pe sumi.2 A Ŋunu Nahash na yo mbo, “Na mi na yire we yira ka rɛ, kena mbe e nyiɛlɛ kalie wee foli foli, mbe ki ti Israel leele yiɛ le nyumu.”
3 A Jabesh ŋunu wre na kna mbo, “Jande, o ŋga ble kɔɔnashin mbe o ki tɛɛ mbe o wolo hamblɛ pre bɔ mandiɛ Israel tra nu mbe tro. Na ki waa pan na o n ndro ta mbe u o shɔ naa, kena o oyɛ wru mbe mu ŋga.”
4 Bitumblɔ pre na sɛ mandiɛ ŋga ki pe da kre ni Gibeah na. Bawa Saul na nyi. Ŋga pra mandiɛ ŋga kie pe da kre bɔ kre, a leele pre na fooro tɛɛ mna nyɛni kpɔɔ. 5 Kre nyjila kre na Saul yiri see na lee, na u nui mblɛ ni u fali ni, a wra kna mu wie mbo, “Yira ŋgi ki pan a leele na nyɛni ma hin?” A pra mandiɛ ŋga Jabesh bitumblɔ pre pan mu bɔ kre bɔ u pan. 6 Ŋga Saul na mandiɛ kre loo to, a Nyiɛkpɔɔ ŋumu na pan mu le u nu, a krɔ na u kun kpɔɔ. 7 A wra u nui pre shiin shɔ, mna pe chile mu pile kro, mna kaara yire wru mu u bitumblɔ pre ŋga na pe kila na yi ni Israel tra kre nu kro mbe yo pe pan mbo, “Ndro ŋmba u n yili mu sɛ taa Saul na Samuel kro mu sɛ ŋunɔ kre, pan pie u fun nui mblɛ pee wa u pan pe.” Kee kre na tia o Tafun Nyiɛkpɔɔ fiɛrɛ na leele pre yii, a pra tin gri, mna yili mu pan Saul pan. 8 A wra pe ble titɛɛ Bezek na, ŋga wra leele pre tɔɔnri kre, na Israel leelee kagbenyi lafɛɛ taarɛ, a Judah leelee kagbenyi fulo na kɛ. 9 A pra yo bitumblɔ mblɛ pra yiri Jabesh na mu pan pre pan mbo, “E sɛ yo e leele pre pan na baŋga yila naa daa lafo na o e shɔ mu yili e loŋgoolo pre kɛɛ.” Ŋga Jabesh leele pre na mandiɛ kre loo kre, pe yiɛ na shɔ mu tro. 10 A pra yo Nahash pan mbo, “Baŋga oo oyɛ wru mbe e ŋga, mbe e o pe imi na e chaa.” 11 Ki ble kre blee Saul na u ŋunɔ wifɛɛnlɛ pre yɔɔlɛ ndra taarɛ. Ŋga ndram naa saanri to a pra sɛ Ammon leele pre tɔ pe tni haa. Yila naa yo kie da lafo kre, na pe leele pre nɛɛrɛ gbo, a pe hamblɛ na fɛ mu nyina.
12 A leele pre na pan mu yo Samuel pan mbo, “Leele mblɛ haa praa yuu na pe n na chaa mbe Saul pe o ŋunu kre hin? Sena pe nyi hin? O nyina pe lɛ mbe o pe gbo.”
13 A Saul na yo pe pan mbo, “Yaa shia ndro gbo aŋga. Ŋgi na hin? Aŋga ble ŋga Nyiɛkpɔɔ Israel leele shɔ.” 14 A Samuel na kna mu yo leele pre pan mbo, “E ti o ndru mbe sɛ katoo mbe sɛ Saul kpali na o ŋunu wi.” 15 A leele pre kro na ndru mu sɛ Gilgal na, mna sɛ Saul tɛɛ ŋunumu na cheche ndoo wa, mna wejinyiŋge sra wɔ, a Saul na Israel leele pre kro na chaa mna ble kre li yɛshɔɔrɔ ni.