1 Samuel 12

Samuel Na Paara Leele Pre Pan

Bawa Samuel na paara leele pre pan mbo, “Kee ŋga e chaa, ni ki pe mu e ŋga. Ni e ŋga ŋunu ŋmba we e le, mbe yiɛklu na e ni. 2 Mi rɛ, fuŋgaami ŋga ni lɛ, a ni ndra fniŋge. Ni biile e wa mu chaa e nu. Mu yire ni nyanyjɛbim nyjila, kre ni e yiɛ klu mu pan mu su aŋga. 3 Mi wi kre, na ni da mu wa pe sisaa ka kre, e ki yo o Tafun Nyiɛkpɔɔ na ŋunu ŋmba u wɔ wre yiɛ na. Ni da mu e wa nuu, ndee mu wa bubnɔ shɔ tun ra? Ni da mu wa yaka shɔ u pan jaŋga naa? Ndee mu ufun dnumu tun ra? Ndee ni da mu yira shɔ ndro pan dɔlɔɔ kolo na tun ra? Na ni da mu yire kee nyjɛ ka pe e wa na kre, u ki yo, mbe ki fɔlɔ tɔ mbe ufun ŋga.”

4 A leele pre na kna mbo, “Ɔɔhɔn, mu n da mu o wa dnumu, ndee mu yaka shɔ wa pan jaŋga na, a mu n da mu yaka shɔ wa pan tun.”

5 A Samuel na kna mbo, “O Tafun Nyiɛkpɔɔ na ŋunu ŋmba u wɔ pre lɛ ni dansiɛfɛɛnlɛ, na ni da mu wa pe kee sisaa ka.”

A leele pre na kna mbo, “Ɛnhɛɛn, o Tafun Nyiɛkpɔɔ wi o kro dansiɛfun na mu n wa pe sisaa.”

6 Samuel na kna mna yo pe pan mbo, “O Tafun Nyiɛkpɔɔ wra Moses na Aaron wɔ, a pra e tolɛɛlɛ pre wɔ mu yili Egypt na. 7 Kena e yire mna e nyi kre, mbe ni e yiɛ kee yo e pan o Tafun Nyiɛkpɔɔ yiɛ na. Mbe e sɔɔnri jaŋga kee nyjɛ o Tafun Nyiɛkpɔɔ wre na pe, mna yire na e tolɛɛlɛ pre shɔ mna yili Egypt na. 8 Ŋga Jacob na u sele leele pre na sɛ Egypt na, a Egypt leele pre naa pe fiŋge kre, e tolɛɛlɛ pre na nyɛni mna o Tafun Nyiɛkpɔɔ wre yeeri mbe u ya pe na. A wra Moses na Aaron tun, a pra sɛ pe wɔ mu yili Egypt na, mna pan mu pe tɛɛ tra ŋga nu. 9 A e leele pre na o Tafun Nyiɛkpɔɔ wre kee fɛɛ, a kra tia Philistine, na Moab ŋunu, na Sisera, Hazor chia kre ŋunɔwifɛɛnlɛ lopom, na sɛ wi na e tolɛɛlɛ pre ni mna pe ja. 10 A pra nyɛni mna o Tafun Nyiɛkpɔɔ wre yeeri mna kna mbo, ‘O sisaa pe mu o Tafun Nyiɛkpɔɔ taan, mu laa u kro mu sɛ na Baal na Ashtoreth sɛɛnlɛ yire sumi. Jande, o shɔ mu yili o loŋgoolo pre kɛɛ, mbe o mu sumi.’ 11 A o Tafun Nyiɛkpɔɔ wre na tia Gideon na Jephthah, na Barak, na ni tun, na o paan e shɔ mbe yili e loŋgoolo pre kɛɛ, mbe e wejinyiŋge ta. 12 A ŋga e na Nahash Ammon ŋunu wre nya a wraa paan mbe e tɔ kre, a e na e Tafun Nyiɛkpɔɔ wre je, na e ŋunu ma, mu kna mu yo ni pan na, ŋunu e chaa mbe u yiɛklu na e ni.

13 Ŋunu ŋmba e chaa wre wi kre. Yire e na yo e ŋunu chaa. A o Tafun Nyiɛkpɔɔ wre e ŋga u wi. 14 Na e o Tafun Nyiɛkpɔɔ wre ŋga buuro, we ti kee kro nyu mbe e ŋga. E u sumi, e ndie tɛɛ u pan, e na lii u kee na. A na yire na e ŋunu wre kro we taa u kro kre, kena ki nyu. 15 La, na e waa je a e nsra ndie tɛɛ o Tafun Nyiɛkpɔɔ wre kee na, we yiri mbe yire na e ŋunu wre taan.

16 Kena e yire wa, ee kawako kee, nyjɛ o Tafun Nyiɛkpɔɔ wre we pe nya. 17 Tla nyjila nu o nyi kre, ndee ni fni hin? La, mbe o Tafun Nyiɛkpɔɔ tali mbe u pan na nyiɛtwanraa na nyiɛ nyumu ni. Na kre kee ŋga waa pe, kre ee chin na ŋga e na yo na o Tafun Nyiɛkpɔɔ u e ŋga ŋunu kre, na kra pe sisaa kpɔɔ mu u taan.”

18 A Samuel na Nyiɛkpɔɔ tali. Ki ble kre lam, wra tia nyiɛ na pan na nyiɛtwanraa ni. A leele pre kro na o Tafun Nyiɛkpɔɔ na Samuel fiɛ. 19 A pra sɛ mna sɛ yo Samuel pan mbo, “Jande mu Tafun Nyiɛkpɔɔ wre tali o pan, mbe wa o gbo. Fuŋga rɛ, o chin na sisam nyjɛ o pe yire kɔkro kre, ki pe sisaa kpɔɔ na o na o Tafun Nyiɛkpɔɔ wre wie na u o ŋga ŋunu.”

20 A Samuel na kna mbo, “Yaa fiɛ! Kii wa na e kre kee sisaa ŋga nyini pe, la, yaa shia laa o Tafun Nyiɛkpɔɔ wre kro, e loloŋgo kro tɛɛ e u sumi. 21 Yaa shia sɛ taa kafinɛ sɛɛnlɛ yire kro, yia jaa ya e na, a yia jaa e shɔ. Yirɛ wɛɛ yi. 22 O Tafun Nyiɛkpɔɔ wre nyu yo, na wa laa e kro, a u yo na we e wru mbe pe u leele. 23 Mi rɛ, o Tafun Nyiɛkpɔɔ wre we ni kisi na mbe tni mbe mba nyiɛtali mbe e ŋga, mbe ki kaari sisam mbe Nyiɛkpɔɔ taan. Ki tia mbe e nyina ŋga ki nyu mu fna mbe e pe. 24 E ndie tɛɛ o Tafun Nyiɛkpɔɔ wre pan, e u sumi na e lolonyi kro ni. E kawako kee nyjɛ u pe mu e ŋga yire sɔɔnri. 25 La, na e waa kro na sisaa pini, we yire na e ŋunu wre kro kla.”