3 Jonathan na sɛ Philistine soja lopom wre gbo Geba na, a Philistine leele pre kro na ki loo. A Saul na leele tun na pe bnɔɛ wru mbe ki kpali Hebrew kro nu na pe pan mbe sɛ ŋunɔ. 4 A Israel leele pre kro na loo na Saul Philistine leele pre ŋunɔwifun lopom wre gbo, a kra tia Philistine leele pre krɔ na kun na pe ni, a kra tia leele pre na peyɛ kna mna Saul kɔŋgɔ ni Gilgal na.

5 A Philistine leele pre na sɛ peyɛ kna mbe paan wi na Israel leele pre ni. Praa wa na soo kɛɛ kagbenyi fulo na kɛ, na soolo nduufɛɛnlɛ kagbenyi kɔɔnanu ni. A praa wa na wifɛɛnlɛ ni, pe nyu wa jaa tɔɔnri. A pra sɛ ble Michmash na, na shie Beth-Aven yila finhaa. 6 Pre na Israel leele pre na fni mu wi. A kra sheli mu Israel leele pre ŋga, a pe plɛ na fɛ mna sɛ ndra dnɛ weele na tra lam weele, na kɔlɔe nu. 7 A pe hamblɛ pre na Jordan lɔɔ kre kun mna sɛ Gad na Gilead tra nu.

Kre nyjila kre na Saul wa Gilgal na wa. A leele mblɛ praa wa u jaara wa pre kro naa fiɛ na seeri. 8 Saul na Samuel shie ble kɔɔnashin, imi na wra yo kre, a wra u shie chiin a u nsraa paan Gilgal na wa. A kra tia leele pre na kɔ na feni na Saul tii. 9 A wra kna mna yo leele pre pan mbo, “E pan e ni ŋga yirɛ nyjɛ oo sro mbe wejinyiŋge sra wɔ kre.” A pra pan na yi ni a wra sra kre wɔ. 10 Pan wraa koo to, a Samuel na da. A Saul na yili mna sɛ u fni mna u ŋga mmaŋge. 11 A Samuel na kna mu u wie mbo, “Yira ŋgi kee mu pe ŋga hin?”

A wra kna mbo, “Mna yo na ni mu shie, a ndaa mu le chiin ni nsraa mu nyaa, a leele pre kro na kɔ na laari ni kro. A kre kɔkro kuraa ni kre, na Philistine leele pre pan mu fni Michmash na. 12 A ndaa le na, na ni n dɔɔ ta Philistine leele pre we paan ni tɔ Gilgal na mna, a ni n ta mu ŋga ki fna ni pe mbe o Tafun Nyiɛkpɔɔ ŋga kre pe tun, a ki tia ni sɛ sra kre wɔ.”

13 A Samuel na kna mbo, “Jijiere kee mu pe kre, kee ŋga o Tafun Nyiɛkpɔɔ wre yo na mu pe kre mu n li ki na, na mna li kee kre na, we na ti mbe ŋu na mu kɛ leele na ŋunumu li Israel leele na nyjila kro nu. 14 La, fuŋgaami ŋga wa ti mu ŋunumu lie kre sɛ yiɛ. Ŋgi na hin? Mu ndikana pe u na. O Tafun Nyiɛkpɔɔ wre we ndro ŋmba u chaa wɔ, mbe u pe u leele pre ŋunu.”

15 A Samuel na yili Gilgal na wa mna sɛ u lawee. A leele pre hamblɛ na taa Saul na a pra sɛ chaa u ŋunɔwifɛɛnlɛ pre nu. Pra yire Gilgal na mna sɛ le Gibeah na Benjamin tra nu. A Saul na sɛ u ŋunɔwifɛɛnlɛ pre le, na pie pe leele lafɛɛ kɔɔnanu. 16 Saul na u pɔ Jonathan na pe ŋunɔwifɛɛnlɛ pre na sɛ ble Gibeah na. Gibeah kre naa wa Benjamin tra nu, a Philistine leele pre naa wa Michmash na. 17 Philistine ŋunɔwifɛɛnlɛ pre na peyɛ yɔ taarɛ mbe paan Israel leele pre tɔ. Pe yɔm nunu na yiɛ le Ophrah na. Kre chia kre naa wa Shual tra nu. 18 A nunu na yiɛ le Beth-Horon na, a pe yɔm haŋa kre na yiɛ tɛɛ sam ŋga kraa wa Zeboim nyua mbɛɛ tra ŋga kraa wa fimi tra nu kre na.

19 Kre nyjila kre, na tutumblɔ n wa Israel tra nu. Ŋgi na hin? Philistine leele pre nsraa chaa mbe Israel leele pre chomboolo na tokombee pee chin. 20 Kre nyjila kre Philistine leele pre pan Israel leele naa shie na pe tɔɔnrɔ yirɛ nyjɛ ni pe fali, pe kagbɛɛn, pe gbaanlɛɛ na pe brɔfiɛnlɛ kro loni na yi liɔ. 21 Swabie nunu praa shio mbe gbana nyu kun, a swabie shiin pra shio mbe kagbaan nyu kun. 22 Ŋga pe wi ble kre na to kre, na chombo ndee tokombe n wa Israel ŋunɔwifɛɛnlɛ pre wa pan na, fɔna Saul na u pɔ Jonathan chiin bɔkɔ. 23 A Philistine na ŋunɔwifɛɛnlɛ plɛ wɔ a pra sɛ tni na Michmash kolo kre sri.