1 Samuel 14

Jonathan Blɛm Kee

Ki ble ka Jonathan na yo u ŋunɔyirɛ tiofun pan mbo, “Jande, ti mbe o kun mbe sɛ Philistine leele pre tni haa wa.” La, Jonathan nsra ki kee yo u lɛ Saul pan. 2 Kre nyjila kre na Saul wa mu tni Gibeah mbookrɔ taanhaa tiŋge ka jaara, chia ŋga praa yeeri Migron kre na. Migron haa nsra le na Gibeah ni. Bawa wre na ŋunɔwifɛɛnlɛ lafɛɛ kɔɔnanu na nyi mu tni. 3 Kre nyjila kre, na Ahijah wi srawɔfun lopom. Ahijah lɛ na wi Ahitub, a u lɛ wre chunu na wi Ichabod. Ahijah wre chɔɔ, u tolɛɛ na wi Phinehas. Kena na mu le, Eli ŋmba wra pe o Tafun Nyiɛkpɔɔ Srawɔfun lopom Shilo na kre, u sele ndro na wi Ahijah.

Ki ble kre ndro nsra chin na Jonathan sɛ lawee ka nu.

4 Michmash kolo ŋga na Jonathan naa shie mbe sɛ tro mbe sɛ Philistine leele pre tnihaa wa kre, nyambie badɛnyi shiin yɛ naa wa kolo kre na, na nunu wa kalie haa, a kaa wa kamɛŋɛ. Nunu mɛɛ naa Bozez, a nunu mɛɛ naa Seneh. 5 Nunu naa wa mu yiɛ tɛɛ Michmash nyjeeri haa, a ka naa wa tapan haa mu yiɛ tɛɛ Geba na. 6 A Jonathan na kna mu yo u ŋunɔyirɛ tiofun wre pan mbo, “Ti mbe o tro mbe sɛ Philistine leele pre tnihaa kre kro, aada o Tafun Nyiɛkpɔɔ wre we ya o na. Na waa ya o na, imi na oo fiɛn mu da kpan, we ti o wi mbe yili.”

7 A blɔ wre na kna mbo, “Kee ŋga mu pe kpan, nii wa mu kro.”

8 A Jonathan na kna mbo, “Na pan mu yo mu kɔ, kena oo tro pe lawee mbe pe o nya. 9 Na pe waa yo na o yire mbe pe shie, waa jele kɔ, oo yire mbe pe shie. 10 La, na pe waa yo o pan na, ‘E pan mna.’ Oo sɛ, kena kre kie nyina na o Tafun Nyiɛkpɔɔ wre we pe le o kɛɛ.”

11 Ŋga praa tro a Philistine leele pre na pe nya kre, a pra kna mbo, “E le, Hebrew leele pre pe yili pe weele nyjɛ nu pra fɛ mu sɛ ndra yire nu kre.” 12 A pra Jonathan na u ndro wre yeeri mbo, “E nduu e pan mna mbe o kala ka yo e pan.” A Jonathan na kna mu yo u ndro wre pan mbo, “Taa ni kro! O Tafun Nyiɛkpɔɔ wre we pe le o kɛɛ.” 13 A Jonathan na kɛnyi na kosie tɛɛ mna nyambie kre nduu mna sɛ leele pre pan, a u ŋunɔyirɛ tiofun wre na taa u kro. Jonathan naa leele pre gbuun na waa, a u ŋunɔyirɛ tiofun wre na taa u na na pe kuu. 14 Lawee ŋga nu pra wi jle kre, Jonathan na u ndro wre na gbo leele fulo, lawee ŋga nu pra wi kre kpɔɔrɔm we pe eka yɔɔ. 15 Fiɛrɛ na gbun yɔɔlɛɛ sisaa na tia Philistine leele pre ŋunɔwifɛɛnlɛ hamblɛ, na pe soolo nduufɛɛnlɛ kro na nyjira peyɛ nu, mnaa feni chaachaa, a tra na seeri.

Pra Philistine Leele Pre Ja

16 Saul leele mblɛ praa wa na Gibeah sri Benjamin tra nu kre, pra Philistine leele pre nya na pe feni na tro chaachaa. 17 A Saul na kna mna yo leele pre pan mbo, “E ŋunɔwifɛɛnlɛ pre tɔɔnri, e le, na wa yili e nu ree?” A pra leele pre tɔɔnri mna nya na, Jonathan na ŋmba u u ŋunɔwiyirɛ tru pre n wa. 18 A Saul na yo Ahijah pan mbo, “Sɛ pan na Nyu Nunu Daka kre ni.” Kre nyjila kre, na Nyu Nunu Daka kree wa Israel leele pre pan. 19 Nyjila ŋga ni Saul naa wa na paara na Srawɔfun wre ni kre, na Philistine leele pre feni na tro, mu nɛɛ mu wɛ jle kre na. A Saul na kna mu yo mbo, “O kee ŋga o yuu kre ti ma tun.” 20 A Saul na u leele pre na le Philistine leele pre nu, na Philistine leele pre titii wa na peyɛ chile. 21 Hebrew leele pre plɛ naa wa mu tni mu chaa Philistine leele pre nu, a pra yiri mu pan mu chaa Saul na Jonathan leele pre nu. 22 Ŋga pe mblɛ pra fɛ mu sɛ ndra dnɛ weele Ephraim na pre na loo na Philistine leele pre feni na shie kre, a pre na yili dnɛ weele yire nu mna pan mu ya, a pe kro na Philistine leele pre ni. Pra wi chiin mna sɛ su Beth-Aven na. 23 Ki ble kre o Tafun Nyiɛkpɔɔ na ya Israel leele pre na.

Ŋunɔ Kre Kɔkro Kee

24 Ki ble kre, klo na tia Israel leele pre na pe yiɛyiɛ. Ŋga kra tia rɛ, na Saul klu mu da mu pe ŋga mbo, “Ndro waa shia sro le nyuu mbe sɛ su na mbe ni loŋgoolo ja mbe ndruu pan.” Ki tia ndro nsra yaka le nyuu ki ble kre. 25 A pe kro na pan mu fni klɔ ka nu. Na srɛ bɔ lawee kre nu poŋgo. 26 Tinyi nyjɛ yiraa wa lawee kre nu kre, na srɛɛ wa yi nu mu nyumu le na nuni tra. La, ndro nsra sro mu ka li. Ŋgi na hin? Pe kro naa Saul daŋga kre fiɛ. 27 La, Jonathan rɛ, u nsra wa mna u lɛ daŋga ŋga ni wra leele pre piɛri kre loo, ki tia wra kaan ŋga kraa wa u kɛɛ kre ni srɛ zezee yire ka nu, mna kɛ tɛɛ mu ki pe mu lala, a wejiŋge na chin mu nyjii u na. 28 A ŋunɔwifɛɛnlɛ pre nunu na kna mu yo Jonathan pan mbo, “Klo o kro ta kro, la, mu lɛ yo o pan na, ‘Ŋmba we yaka le nyuu aŋga kre, we to daŋga nu.’” 29 A Jonathan na kna mbo, “Yira ŋgi kee ndoo pe aŋga o na ŋga hin? Ŋga ni srɛ wre ka le nyuu, le imi na wejiŋge nyjii ni na ma. 30 Na kolo kii wa, mbe o na jaa o loŋgoolo sro nyjɛ pe fɛ mu ti ŋga li kre, kaa pe gboo wra tna.”

31 Ki ble kre, Israel leele pre na Philistine leele pre gbo peii, pra pe gbo mu yire Michmash na mna sɛ su Aijalon na. Ŋga kra pan ma kre, klo kre na tia Israel leele pre na pra pra poŋgo. 32 Ŋga pra da wa kre, a pra tin mu le pe loŋgoolo pre yurɛ nu, mna mbaala, na nui, yii mna pe gbo titɛɛ kre nu wa, mna kaara yire ka bibre na nyimi ni. 33 A Israel leele pre plɛ na sɛ mandiɛ kre bɔ Saul pan mbo, “Mu chin na mu leele pre sisaa pe mu o Tafun Nyiɛkpɔɔ wre taan mu sɛ kaara bibre kaa?”

A Saul na yo mbo, “E sisaa kpɔɔ pe. E dnɛ kpɔɔ gbila e pan e tɛɛ mna ni pan.” 34 A wra ndru mna yo mbo, “E sɛ o leele pre nu, e sɛ yo pe pan na pe pan na pe nui na pe mbaala pre ni ni yiɛ mna, mbe pan mbe pe gbo mbe ka. Pia shia pe ka bibre mbe ki kaari sisam mbe o Tafun Nyiɛkpɔɔ wre taan.” Ki ble kre blee, pe kro na pan na yurɛ ni mu gbo wa. 35 A Saul na sragbunu sin mu o Tafun Nyiɛkpɔɔ wre ŋga. Kre na yi sra gbunu ŋga wra klu mu sin. 36 Saul na yo u leele pre pan mbo, “E ti mbe o sɛ Philistine leele pre tɔ blee, mbe pe gbo, mbe pe yirɛ foolo mbe sɛ su bnimi nyu na.”

A leele pre na kna mbo, “Ŋga mu jawa na ki nyu kpan, ki pe.”

La, Srawɔfun wa na kna mbo, “E ti mbe o o Tafun Nyiɛkpɔɔ wre wie tun.”

37 A Saul na Nyiɛkpɔɔ wie mbo, “Ni sɛ wi na Philistine leele pre ni na, ree mni hin? A mu pe le o kɛɛ ree mni hin?” Ki ble kre Nyiɛkpɔɔ nsra paara na u ni.

38 A Saul na yo leele pre yɛkulo pre pan mbo, “E pan mbe o sisam ŋga nyini ki pan o nu aŋga cha.” 39 Mbo, “Ni o Tafun Nyiɛkpɔɔ ŋmba u le, na wii na Israel leele shio wre da na, ŋmba u sisaa pe wre we ku, hali na ni biblɔ Jonathan wi.” La, ndro nsra nyu kun.

40 A Saul na yo Israel leele pre kro pan mbo, “E kro e yire kokoo ŋgaa na, mbe mi na Jonathan yire kokoo ŋga na.”

A leele pre na kna mbo, “Kee ŋga ki nyu mu pan pe.”

41 A Saul na o Tafun Nyiɛkpɔɔ wie mbo, “Israel leele Nyiɛkpɔɔ, mni a mu n nyu kun na o ni aŋga hin? Ti mbe o kpra kre nya.”

A pra kɛɛn tɛɛ, a yira Saul na u pɔ Jonathan wɔ, a kra tia nɛɛrɛ na laa leele pre na.

42 A Saul na yo mbo, “E kɛɛn tɛɛ e le, mi na ni pɔ Jonathan, ŋmba wi.” Ŋga pra kɛɛn tɛɛ kre, a kra Jonathan wɔ. 43 A Saul na Jonathan wie mbo, “Kee ŋgi mu pe hin? Kpra yo ni pan!”

A Jonathan na kna mbo, “Ŋga ni pe yi na, ni ni kanyie kre ni srɛ nu, mu fiɛ ka pe mu naa. Kena kre na ki fna ni ku ŋgaa?”

44 A Saul na kna mbo, “Na ni nsra tia pe ŋu Jonathan gbo, kena o Tafun Nyiɛkpɔɔ u ni gbo.”

45 A leele pre na kna mbo, “Jonathan ŋmba u wi mu Israel leele shɔ ŋga, kena ki fna o u gboo? Waa ki ta. O o Tafun Nyiɛkpɔɔ ŋmba u le wre da na u ndra nyjuro nunu chom kuraa wa kɔɔ to tra. Kee ŋga u pe aŋga ŋga, na Nyiɛkpɔɔ ma, kaa wa jaa ki pe.” A leele pre na Jonathan shɔ mu wa.

46 Kre kee ŋga na tia Saul nsra Philistine leele pre kɔŋgɔ ni na, a pra fɛ mu sɛ tni pe tra nu.

47 Saul ŋunumu li nyjila Israel na kre, wre na loŋgoolo mblɛ pra fɛ mu u kun pre na wi mu fni. Wre na Moab leele, na Ammon leele, na Edom leele, na Zobah ŋulo, na Philistine na wi mu fni. Wre na mblɛ pra wi kro, wra pe ja. 48 Wra wi gbuntitirem ni mna Amalek leele ja. Ki tia wra Israel leele pre shɔ wiire kɛɛ. 49 Saul biile bibilɛ na lɛ Jonathan na Ishvi, na Malki-Shua, a u bichlɔ lopom na wi Merab, a ŋmba wra taa mɛɛ naa Michal. 50 A u chɔ na wi Ahinoam, a Ahinoam lɛ mɛɛ na yi Ahimaaz. Saul ŋunɔwifɛɛnlɛ lopom mɛɛ na yi Abner, a Saul lo pɔ Ner wra Abner se. 51 A Saul lɛ Kish, na Abner lɛ Ner, pre lɛ na wi Abiel.

52 Ble nyjɛ Saul na li yire krɛrɛ nu kre, pre na Philistine kakrɔ naa shelii. Kre nyjila kre na Saul faŋgafun, ndee gbunfun wa nya kpan, mbe u sɛ u wru mbe paan ya u ŋunɔwifɛɛnlɛ na.