Pra Tun Na Amalek Leele Ni
15
Ki ble ka Samuel na yo Saul pan mbo, “Mi o Tafun Nyiɛkpɔɔ wre na tun a ndaa sɛ simi kna mu wo mu ndra na mu mu tɛɛ Ŋunu mu Israel leele ŋga. Loo kee ŋga o Tafun Nyiɛkpɔɔ Jaŋgafun wre yuu. 2 Mbo, ‘Mbe Amalek leele pre ndie tini. Ŋgi na hin? Pe tolɛɛlɛ na yiri mna Israel leele kun kolo, nyjila ŋga nu pra yiri Egypt na na paan kre. 3 Kena yiri mu sɛ wi na Amalek leele pre ni, mu yirɛ nyjɛ yii wa pe pan kro kla. Maa shia yira nunu chom kuraa ti wa. Pe bilɛ, na chiɛlɛ, na biile na bifimble, na nui, na mbaala, na nyuuma, na pe bubunlɔ kro, e pe gbo peii.’”4 A Saul na u ŋunɔwifɛɛnlɛ pre yeeri a pra sɛ fni Telem na, a wra pe tɔɔnri. Na ŋunɔwifɛɛnlɛ kagbenyi lafɛɛ shiin a pe kagbenyi kɛ na yili Judae leele nu. 5 Saul na u ŋunɔwifɛɛnlɛ pre na sɛ chia ŋga praa yeeri Amalek kre na, mna sɛ ja nyuɛ shiin lalaa lawee ka nu, na Amalek leele pre sri mbe wi na pe ni. 6 A wra yo Kenite leele mblɛ pre na Amalek leele pre naa wa mu tni pre pan mbo, “E tolɛɛlɛ pre na nyu Israel leele na, nyjila ŋga ni pra yiri Egypt tra nu na paan kre, kena ni yuu e pan na e yili Amalek leele pre nu, mbe mba yire na pre chaa mbe kla.” Ki tia Kenite leele pre na yili Amalek leele pre nu.
7 Saul na ŋunɔwifɛɛnlɛ na sɛ wi na Amalek leele pre ni mna pe ja. Pra yire Havilah na mna wi mu sɛ le Shur ŋga kraa wa Egypt tra yila finhaa kre nu. 8 Saul na Amalek ŋunu Agag yii, mna leele pre gbo peii. 9 La, u nsra tia pra ŋunu Agag gbo. Wra tia pra pe mbaala na pe biile, na nui na pe biile mblɛ pra nyu, na pe yirɛ chichiele kro wru. La, yirɛ nyjɛ yi nsra nyu, a tnu ka nsraa wa yi nu yire kro, pra yi kla peii.
Pra Saul Je Ŋunu
10 O Tafun Nyiɛkpɔɔ na yo Samuel pan mbo, 11 “Ni yiɛ je na ni Saul pe ŋunu. U ndikana pe, mu ni kee je.” Ki ble kre, Samuel krɔ na kun blee kre, a wra o Tafun Nyiɛkpɔɔ wre tali chiin a nyiŋge na pan mu se. 12 Ŋga nyiŋge naa paan mbe se kre, Samuel na gbolo mna sɛ Saul cha. Bawa wra loo mbo, Saul sɛ chia ŋga pra yeeri Carmel kre na. Bawa wra yira sin mu yire mbe leele ki nya, mbe ki tɛɛ mbra u sɔɔnri. A wra yiri wa mna ndru mu sɛ Gilgal na. 13 A Samuel na Saul fni, a Saul na kna mbo, “Samuel, o Tafun Nyiɛkpɔɔ wre mu dwan. Ŋgi na hin? Ni li u kee na kama.”
14 A Samuel na kna mbo, “A sena nui na mbaala nyɛnɛɛ nyjɛ ni ndru ŋga yiri hin?” 15 A Saul na kna mbo, “Ni leele pre pra pe yii Amalek leele pre lawee. Pra nui, na mbaala chichiele yii mbe paan sra wɔ mbe o Tafun Nyiɛkpɔɔ wre ŋga. La, yirɛ hɛnyi yire rɛ, o yi kla peii.”
16 A Samuel na kna mbo, “Maa paara mbe sɛ yiɛ, ti mbe ni kee ŋga o Tafun Nyiɛkpɔɔ wre yo ni yo mu pan blee ŋga yo.”
A Saul na kna mbo, “Ki yo mbe ni loo.”
17 A Samuel na kna mbo, “Jle kre mna muyɛ le na mu kee n shian, la, fuŋgaami ŋga ŋu wi Israel sele yire kro yɛklo, a o Tafun Nyiɛkpɔɔ wre u mu wɔ, mu mu pe Israel ŋunu. 18 A wre u mu tun mu yo mu pan na mu sɛ Amalek leele sisaala pre kla. Wra yo na mu pe gbo peii. 19 Yira ŋgi ki tia mu n li u nyu kee na hin? Yira ŋgi ki tia mu fiɛlɛ mu sɛ pe yirɛ foolo mu pan, a mu kee ŋga ki n tna o Tafun Nyiɛkpɔɔ wre pan pe hin?”
20 La, Saul na kna mbo, “Ni li o Tafun Nyiɛkpɔɔ wre nyu kee na. Ni sɛ wi na Amalek leele pre ni mu pe ŋunu Agag yii mu pan, mu pe hamblɛ pre gbo peii. 21 La, ni pe nui, na pe mbaala chichiele yii mu pan na pe ni Gilgal na mna, mbe paan sra wɔ na pe ni mbe wre o Tafun Nyiɛkpɔɔ wre ŋga.”
22 La, Samuel na kna mbo,
“Ŋga mu ndie tɛɛ,
o Tafun Nyiɛkpɔɔ wre pan
kre na u yiɛshɔ ndee,
ŋga mu sra wɔ mbe u ŋga,
kre u chaa hin?
Na mu ndie tɛɛ u pan,
ki nyu u pan mu wɛ,
ŋga mu mbɔɔ tɛɛ
mbe sra wɔ mbe u ŋga na.
23 Na mu yiri
mu o Tafun Nyiɛkpɔɔ taan,
ndee na mu yɛkpɔɔmu pe u na,
pan ki sisam nyi na tiprɛm,
ndee sɛɛn sumiɛ yi.
Ŋga mu o Tafun Nyiɛkpɔɔ wre,
nyu kee je,
kre ki tia u mu je ŋunu.”
24 A Saul na kna mbo, “Kpra yi na ni sisaa pe, mu o Tafun Nyiɛkpɔɔ wre nyu kee je, na ni n taa mu kee na. Ni leele pre ndaa fiɛ, mna ŋga pe chaa pe mu pe ŋga. 25 Kena jande, ni mu tali, ni sisam ti mu ni kɛ, mbe mi na ŋu ndru mbe sɛ, mbe ni sɛ o Tafun Nyiɛkpɔɔ wre sumi.”
26 La, Samuel na kna mbo, “Mi na ŋu wa ndru mbe sɛ. Mu o Tafun Nyiɛkpɔɔ wre nyu kee je, a ki tia wa ti mu pe Israel leele ŋunu na.”
27 A Samuel na krɔ kna mbe sɛ to, a Saul na kɛ wa mna u dodoŋgi titnɔŋɔ nyu yii, a kra wali. 28 A Samuel na kna mna yo u pan mbo, “Imi na mu ni dodoŋgi nyu yii mu ki wali ŋga, pan O Tafun Nyiɛkpɔɔ wre Israel ŋunumu lie wali mu laa mu na aŋga, mu sɛ ŋmba u prɔ mu na ŋga ki yi. 29 Israel Nyiɛkpɔɔ Yɛnyiŋgefun wre n pe na lewo wi mbe kala fnɛ, a wra u jawala chinɛ kee ŋga u yo na fio.”
30 A Saul na kna mbo, “Kii wa na ni sisaa pe, la, jande ni ŋga buuro chiɛri Israel loplombo na leele hamblɛ pre yiɛ na. Jande, ndru mbe mi na ŋu sɛ o Tafun Nyiɛkpɔɔ wre sumi.” 31 A Samuel na ndru, a pra sɛ, a Saul na sɛ o Tafun Nyiɛkpɔɔ wre sumi.
32 A Samuel na yo Saul pan mbo, “Sɛ pan na Amalek ŋunu Agag ni mu ni ŋga.” A wra sɛ pan na Agag ni, a wra pan mu yire na yɛshɔɔrɔ ni. Ŋgi na hin? Wra u jawala pe na pia u gbo na.
33 A Samuel na kna mbo,
“Imi na mu plɛ biile gbo kre,
pan mu lo we pɔ la na.”
A Samuel na Agag chile mu knumu brobro sra gbunu kre yiɛ Gilgal na.