2 A Samuel na kna mbo, “Mbe jaa kre kee ŋga pe maa? Na Saul ki loo we ni gbo.” A o Tafun Nyiɛkpɔɔ na yo u pan mbo, “Nuu pɔ wa wru mu sɛ pe na sra mu paan mbe wɔ mbe ni ŋga. 3 Na mu da wa, mu ti mbe pe Jese yeeri mbe mu ŋga. Mbe mu nyina kee ŋga ki fna mu pe. Mbe mu nyina ndro ŋmba ndra na mu simi kre kna mbe wo, mbe u pe ŋunu.”

4 A Samuel na kee ŋga o Tafun Nyiɛkpɔɔ wre na yo u pe kre pe, mna sɛ Bethlehem na. Ŋga wra da wa kre, chia kre loplombo na u fiɛ mna pan mu u fni, mna u wie mbo, “A ki tna oo, keenyanyofun?”

5 A wra kna mbo, “Ki tna, sra wɔ haa ni pan mbe o Tafun Nyiɛkpɔɔ wre ŋga. Kena e eyɛ pe cheche e pan e ya ni na.” A wra yo Jese pan na wre na u biile pre kro pe peyɛ pe cheche mbe pan.

6 Ŋga praa wa kre, Samuel na Jesse biblɔ Eliab nya, mna yo u jawala nu mbo, “Wre blɔ ŋmba u yire o Tafun Nyiɛkpɔɔ wre yiɛ ŋga, wre u wɔ mbe u pe ŋunu wre.”

7 La, o Tafun Nyiɛkpɔɔ na yo Samuel pan mbo, “Maa shia ndro wre nyumu, ndee u gedem le, na ki pan ma, ni n na u chaa. Ŋgi na hin? Ŋga lewo chaa ma ni chaa, lewo rɛ, yiɛ na wre le, la, mi rɛ, loloŋgo nu mi le.”

8 A Jesse na u pɔ Abinadab yeeri, mna pan na u ni Samuel pan, a Samuel na yo u pan mbo, “Ŋmba ma o Tafun Nyiɛkpɔɔ wre wɔ.” 9 A Jesse na sɛ pan na Shammah ni, a Samuel na kna mbo, “Ɔɔhɔn, ŋmba ma Nyiɛkpɔɔ wɔ.” 10 Jesse bibilɛ naa kɔɔnashin, ŋga kra pan ma kre, a wra jijirɛ hamblɛ pre yeeri mu ya, a pra pan mu yire Samuel yiɛ. A Samuel na kna mbo, “Ɔɔhɔn, o Tafun Nyiɛkpɔɔ n mblɛ wa wɔ.” 11 A Samuel na kna mu Jesse wie mbo, “Mu bibilɛ pre kro lɛ mblɛɛ?”

A Jesse na kna mbo, “U kro pe fiɛn wre, a uu wa nyaa na mbaala le.”

A Samuel na kna mbo, “Ti mbe pe sɛ u wru mbe pan, na u n pan waa o sra kre wɔ.” 12 A Jesse na tia pra sɛ u yeeri mu pan, wra pe yire ndro, mna nyu titi, a faŋga naa wa u nu.

A o Tafun Nyiɛkpɔɔ na yo Samuel pan mbo, “Ŋmba ni chaa wre wi kre, yiri mu simi kna mu wo u ndra na mu u pe ŋunu.” 13 A Samuel na yiri mna gbolo ŋga nu simi nyi kre wru, mna ki kna mu wo David ndra na u nyjɔɔlɔ pre yiɛ na. Titɛɛ kre nu to, a o Tafun Nyiɛkpɔɔ Ŋumu na pan mu le David nu faŋga ni. A mu yire ki ble kre na na shie, Ŋumu wre nsra yili u nu. A Samuel na ndru mu sɛ Ramah na.

14 Ŋga kra pan ma kre, o Tafun Ŋumu na yili Saul nu. A o Tafun Nyiɛkpɔɔ na kolo ŋga, a ŋumu fɔɔn na pan mu Saul tɔɔra kpɔɔ. 15 A u sumifɛɛnlɛ na yo u pan mbo, “O chin na ŋumu fɔɔn u pan na mu tɔɔra. 16 Kena mu sumifɛɛnlɛ ŋga kolo, mbe o sɛ ndro ŋmba u juru gbun mu chin cha mbe pan. Kena na ŋumu fɔɔn wre waa yiri mu nu, mbe u juru kre gbun, mbe wejiŋge nyjii mu na.”

17 A Saul na yo pe pan mbo, “E ndro ŋmba u juru gbun mu chin kama cha e pan e ni ŋga.” 18 A u sumifɛɛnlɛ pre nunu na kna mbo, “Blɔ waa wa Bethlehem na, pe u yeeri Jesse, u pɔ waa wa mu juru gbun mu chin titi, a uu gbun ni, a u nyu. U ŋunɔ wi mu chin, a pan u ja na paara, a o Tafun Nyiɛkpɔɔ kɛɛ wa u na.”

19 A Saul na leele tun Jesse pan mbo, “Ti mbe mu biblɔ David mbaala lefun wre pan.” 20 A Jesse na tia David na sugbɔ pɔ yii, mna bubnɔ yii, mu paanu pɔ mu taa u na, mna simi gbɔwo le yurɔ hlɛ gbolo nu mbe sɛ Saul ŋga. 21 Ŋga David na pan mu le Saul pan katoo, a Saul na u nya kre, u kee na tna u pan titi, ki tia wra u wɔ, na wra u ŋunɔ wi yirɛ tru na u shie ŋunɔ. 22 A Saul na ndro tun Jesse pan mbo, “David kee tna ni pan titi, kena ti mbe u tni ni jaara.” 23 Mu yire kre ble kre na, na ŋumu fɔɔn ŋmba u paan na Saul tɔɔra kre yiri to, mbe David u juru kre gbun, mbe ki ti ŋumu fɔɔn wre sɛ, mbe Saul wejiŋge nyjii u na.