David Paaraa Haŋa
23
David, Jesse pɔ wre na pe lewo ŋmba Nyiɛkpɔɔ na kpɔɔ. A wre Jacob Nyiɛkpɔɔ wre na wɔ na u pe ŋunu, a wre chɔɔ wra mɛɛ tɛɛn kɔ mu tɛɛ Israel leele pan. David paaraa haŋa yi kre.2 Nyiɛkpɔɔ ŋumu wre yire ni na
mu paara,
a u kee yi ni nyu na kre.
3 Israel Nyiɛkpɔɔ wre paara,
ŋmba wi dnɛ
ŋga na Israel leele kaan kre
na yo ni pan mbo,
“Ŋunu ŋmba u u leele le kpra kolo na,
na pe le kolo
ŋga na Nyiɛkpɔɔ chaa na kre,
4 pan u nyi na na ndram saanri
bnimi nyu na mbe tloe fun,
mbe yila yili mbe lawee pe chasi,
a pan u nyi na nyiɛ pan mu kun,
mbe yila yili
mbe to nyaa fɔnyi na.”
5 Imi na Nyiɛkpɔɔ we ni nɔɔ leele
dwan yi kre. Ŋgi na hin?
U nyu nunu
ŋga ki n nyukɔɔrɔ ni
pe na ni ni,
nyu nunu ŋga na ndro wa jaa kɔ,
nyu yoo ŋga kia jaa chinɛ.
Kee ŋga ni chaa kro yi kre,
kre yi ni winyilee,
a Nyiɛkpɔɔ we ti mbe ki pe ma.
6 La, mblɛ pe n Nyiɛkpɔɔ chin kre,
pan pe nyi na wuuro
nyjɛ pie wa yi,
ndro wa jaa yi yii kɛ waara ni.
7 Fɔna mu tɔɔnrɔ ndee chombo ta,
a pie pe sro peii pe titɛɛ wa.
David Sojae Mblɛ Mɛɛ Kra Yili
8 David ŋunɔwifɛɛnlɛ mblɛ mɛɛ kra yili na lɛ kre, Josheb-Basshebeth ŋmba wra yiri Tahkemon sele nu, a wra pe mblɛ praa yeeri, “Taarɛ Pre,” pe lopom, wre wra u chombo tɛɛ mna wi na leele lafɛɛ kɔɔnatarɛ ni ŋunɔ nunu nu, mna pe gbo peii kre.
9 Taarɛ pre ŋmba wra taa shiin na wi Eleazar, Dodai pɔ, ŋmba wra yiri Ahoah sele nu wre. Ki ble ka wre na David na sɛ Philistine leele pre nyu kaanri Pas-Dammim na. Na Philistine leele pre peyɛ kna mu pan wihaa, a Israel leele pre kro na fɛ mu ndru. 10 La, wre nunu na yire mna Philistine leele pre gbo chiin mu fna. Ŋga wra kɔ mbe u tokombe kre tɛɛ kre, na u kambɛɛlɛɛ kru mu mbra ki na, wa jaa ki tɛɛ. Nyiɛkpɔɔ na tia pra wi mu yili ki ble kre. Ŋga ŋunɔ kre nyu na to kre, Israel leele pre na ndru mna sɛ lawee ŋga nu Eleazar na nyi kre mna sɛ yirɛ koli.
11 Sojae taarɛ pre nunu ŋmba mɛɛ kra yili titi na wi Shammah, Agee pɔ na wi, a wra yiri Hararite sele nu. Philistine leele pre na sɛ ble Lehi na, lawee ŋga nu chibi see ka na nyi nu, a Israel lee pre kro na fɛ Philistine leele pre yiɛ, 12 la, Shammah na yire see kre nu wa mna wi na Philistine leele pre ni mna pe gbo peii. Nyiɛkpɔɔ na tia pra wi mu yili ki ble kre.
13 Ki ble ka, na ki kro chiɛri mbe yirɛ kun nyjila da, a leele fulo na kɛ pre taarɛ, na sɛ David pan Adullam nyua wee kre nu, kre nyjila kre na Philistine leele plɛ peyɛ nyu nya mu sɛ ble Rephaim landɛɛ kre nu. 14 Kre nyjila kre, na David wa lawee ŋga nu u shie na ndra kre nu. Na Philistine leele pre plɛ sɛ Bethlehem shɔ mu tni wa. 15 A kre nyjila kre, na katoo la David ta, a wra yo mbo, “Mbe ndaa ndro ta, mbe wra sɛ Bethlehem jlonwee nyu kɔlɔ kre nyumu ka ko mbe paan ni ŋga imi!” 16 Sojae taarɛ mblɛ mɛɛ kra yili pre na gbeŋmba, mna le Philistine leele pre nu, mna sɛ nyumu kre ka ko kɔlɔ kre nu mna pan mu u ŋga. La, David nsra nyumu kre gbɔ, wra ki shɔ mna ki kna mu wo tra, mna sra wɔ na ki ni mu Nyiɛkpɔɔ ŋga, mna yo mbo, 17 “Nyiɛkpɔɔ, mba jaa nyumu ŋga nyini gbo. Pan ki pe ni pan na leele mblɛ pe pe ndrɛ wa jenyje, mu sɛ ki ko mu pan ŋga nyimi yi.” Ki tia u nsra ki gbɔ.
Kee nyjɛ ŋunɔwifɛɛnlɛ gbuntitiremfɛɛnlɛ mblɛ mɛɛ kra yili pre na pe na yi.
18 Joab, na Abishai lo na wi Zeruiah, a Abishai na wi ŋunɔwifɛɛnlɛ fulo na kɛ mblɛ mɛɛ kra yili pre lopom. Wre wra u chombo tɛɛ mna wi na leele lafɛɛ taarɛ ni mna pe gbo peii, a kra tia wra mɛɛ shɔ ŋunɔwifɛɛnlɛ fulo na kɛ pre nu. 19 Wre wra pe ndro ŋmba wra mɛɛ shɔ titi fulo na kɛ pre nu, mna pe pe lopom. La, u mɛɛ nsra yili mu da na taarɛ pre ni.
20 Benaiah, Jehoiada pɔ, ŋmba wra yiri Kabzeel na wre, wra pe ŋunɔwifɛɛnlɛ mblɛ pe mɛɛ shɔ pre wa. Wre wra gbuntitirem kee tataara pe, yi yɛ na yi na, wra Moab leele ŋunɔwifɛɛnlɛ titie shiin plɛ gbo. A ki ble ka wra sɛ le wee ka nu, na sugbeŋge woni, mna sɛ jira gbo wa. 21 Wra Egypt blɔ badaaŋga wa gbo na chombo ni kɛɛ. Benaiah na sɛ blɔ wre na, na van ŋga kraa wa u kɛɛ ni, mna sɛ u chombo kre shɔ, mna u su mu gbo na ki ni. 22 Gbuntitirem kee nyjɛ Jehoiada biblɔ Benaiah ŋmba wra pe ŋunɔwifɛɛnlɛ fulo na kɛ mblɛ mɛɛ kra yili kre wa na pe yi kre. 23 Wra mɛɛ shɔ chɔ, ande u nsra mɛɛ shɔ na Taarɛ Pre lɛ. Wre David na pe ŋunɔwifɛɛnlɛ mblɛ pe u sri pre lopom.
24 Sojae mblɛ pra chaa fulo na kɛ mblɛ mɛɛ kra yili kre mɛɛ yi kre; 25 Asahel, Joab chunu, na Elhanan, Dodo pɔ ŋmba wra yiri Bethlehem na kre, na Shammah, na Elika, pre na yiri Harod na, 26 na Helez ŋmba wra yiri Beth-Pelet na, na Ira, Ikkesh pɔ ŋmba wra yiri Tekoa na, 27 Abiezer ŋmba wra yiri Anathoth na, na Mebunnai ŋmba wra yiri Hushah leele, 28 na Zalmon ŋmba wra yiri Ahoah sele nu, na Maharai ŋmba wra yiri Netophah sele nu, 29 Heled, Baanah pɔ ŋmba wra yiri Netophah sele nu, na Ithai, Ribai pɔ ŋmba wra yiri Gibeah ŋga kraa wa Benjamin tra nu kre, 30 na Benaiah ŋmba wra yiri Pirathon na kre, Hiddai ŋmba wra yiri landɛɛ ŋga kra mbra Gaash na kre, 31 na Abi-Albon ŋmba wra yiri Beth-Arabah na, na Azmaveth ŋmba wra yiri Bahurim na, 32 na Eliahba ŋmba wra yiri Shaalbon na, na Jashen biile, na Jonathan, 33 na Shammah ŋmba wra yiri Hararite sele nu, na Ahiam, Sharar pɔ ŋmba wra yiri Hararite sele nu, 34 na Eliphelet, Ahasbai pɔ ŋmba wra yiri Maacah sele nu, na Eliam, Ahithophel pɔ ŋmba wra yiri Gilon sele nu, 35 na Hezro ŋmba wra yiri Carmel na, na Paarai ŋmba wra yiri Arab sele nu, 36 na Igal, Nathan pɔ ŋmba wra yiri Zobah na, na Bani ŋmba wra yiri Gad na, 37 na Zelek ŋmba wra yiri Ammon na, na Naharai ŋmba wra yiri Beeroth na, mna pe Joab ŋunɔwiyirɛ tiofun kre, 38 na Ira na Gareb mblɛ pra yiri Ithri sele nu, 39 na Uriah Hittite ndro wre. Sojae mblɛ mɛɛ kra yili pre kro na pe leele fulo na kɛmbɔkɔɔnashin.