David Na Mɛɛ Kɔ Mu//Nyiɛkpɔɔ Ŋga Mboo
22
Ŋga o Tafun Nyiɛkpɔɔ na David shɔ Saul na u loŋgoolo hamblɛ kɛɛ kre, David na kre mɛɛ ŋga kɔ mna o Tafun Nyiɛkpɔɔ wre ŋga.2 O Tafun Nyiɛkpɔɔ wre wi dnɛ,
ŋga na mbe gbun mbe mba to,
a wre u kɛ toni ni na,
a wre wi ni ŋmaa shɔfun.
3 Ni Nyiɛkpɔɔ wi dnɛ,
ŋga ni feni na shie na kaari.
Wre jaara ni niyɛ ta.
Wre u ni toni na yira ni,
mbe yaka wa da ni na.
Wre u ni le, na ni shio,
wre wi ni ŋmaashɔfun.
Wre u kɛ toni ni na,
na ni shio kewrɛŋgɛ nu.
4 Ni nyɛni mu o Tafun Nyiɛkpɔɔ
wre yeeri,
a u ni shɔ ni loŋgoolo kɛɛ.
Kena e ti mbe o o Tafun Nyiɛkpɔɔ
wre ŋga mɛɛ.
5 Ndaa kumu nya na epo nyumu yi,
a kra ni fɛ mu kun,
na chaa mbe ni li.
6 Kumu na ni pɛɛri pɛlɛ,
ki tia ndaa da kumu na kuraa
mu kɔ.
7 Ni kanyana nyjila ndaa nyɛni,
mu o Tafun Nyiɛkpɔɔ yeeri.
Ndaa u yeeri mbe u ya ni na.
A wra yire u Suminyuŋgo wa,
mna ni mana loo,
mna shɔ ni pan.
8 Kra tia tra na nyjeeri na seeri na.
Ŋgi na hin? Na Nyiɛkpɔɔ krɔkun.
9 A wre naa yilii u maalɛɛ,
a kanhun naa nyini,
a ki muŋgo naa yilii u nyuu.
10 A wra nyjeeri yɔ mu tii tra,
a tlo wɔɔ kprikpri naa wa
u jeelee jaara.
11 A wra tni kuɛn yurɔ
ŋmba pe yeeri Cherubim na,
mna yiri,
a pra u nya na u tro fuflɛ na.
12 Nyiɛkpɔɔ na tlo wɔɔ ŋga nu
nyumu nyi tɛɛ mu uyɛ tɔ.
13 Kanhun muŋgo naa nyini,
na pini na nyiɛ twanraa yi u yiɛ.
14 A o Tafun Nyiɛkpɔɔ na yire
nyjeeri na twanri,
a leele na Nyiɛkpɔɔ Jaŋgafun
wre mana loo.
15 Wra u snimi ŋu,
a u loŋgoolo na fɛ mu nyina,
a wra nyiɛtwanraa tɛɛ,
mna pe ni, a pra fɛ.
16 Epo lamu na sni waara,
a tra naa nyaa fimi na, nyjila ŋga
Nyiɛkpɔɔ na u loŋgoolo
yiɛ kee yo pe pan,
mna fuu krɔ ni pe pan kre.
17 Nyiɛkpɔɔ na yire nyjeeri,
mu pan mu ni yii,
mna ni tini mu wɔ lɔɔ jijuom nu.
18 Wra ni shɔ ni loŋgoolo,
faŋgafɛɛnlɛ mblɛ,
pe ni pra, pre kɛɛ.
Pe faŋga na wɛ ni na titi.
19 Ŋga ndaa kala nyaa kre,
pra pan mu ni tɔ,
la, Nyiɛkpɔɔ na kɛ tɔ ni na.
20 Wra ya ni na mna ni wɔ,
mu yili katala nu.
Wra ni shɔ. Ŋgi na hin?
Na u yiɛ shɔ ni na.
21 Nyiɛkpɔɔ ni kaan fɔtɔɔrɔ chichie.
Ŋgi na hin? Ni ŋga ki fraka pini.
U ni dwan. Ŋgi na hin?
Ni n pimi li.
22 Ni li Nyiɛkpɔɔ mbra na,
a ni n krɔ kna,
mu wa ni Nyiɛkpɔɔ na.
23 Ni li mbra yire kro na,
a ni n ndikana kee ka pe
u nyu kee na.
24 U n kefɔɔn ka nya ni na,
a ni niyɛ wɔ sisam pee nu.
25 Ki tia u ni kaan fɔtɔɔrɔ chichie.
Ŋgi na hin?
U chin na ni n chin sisaa ka nu.
26 Nyiɛkpɔɔ, mu kpra lii na mblɛ
pe kpra lii na mu kaan ni.
A mblɛ pe fraka kolo kro na kre,
mu nyɔɔ pe na.
27 Mu pe cheche mu mblɛ,
pe pe cheche kre ŋga,
la, mu kee fiɛrɛ ni,
mu ndra shelifɛɛnlɛ ŋga.
28 Mblɛ pe peyɛ nyjii kre,
mu pe shio,
la, yɛkpɔɔmufɛɛnlɛ rɛ,
mu pe pini fiɛn.
29 Ŋu Nyiɛkpɔɔ, ŋu wi ni kania,
a ŋu mu ni woni wɔmu nu.
30 Ŋu mu ni kaan faŋga,
ndaa ni loŋgoolo toni.
Na ni kaan jaŋga ŋga ni,
ni yɛ shio pe kɛɛ.
31 Nyiɛkpɔɔ rɛ, u kolo kro nyu,
a mu jaa kaan u nyu kee na.
A mblɛ pe feni na shie u jaara pre,
u kɛ toni pe na,
mbe yaka wa pe ta.
32 O Tafun wre chiin wi Nyiɛkpɔɔ,
a wre chiin wi o fɛnkaarifun.
33 Nyiɛkpɔɔ u ni kaan faŋga,
wre u kolo ŋga na ni troi
gbeele ni pan.
34 U tia ni yire gbiŋmbi na sajeŋu wi,
na nii wa nyua ndra na kuraa,
u ni le.
35 Wre u ni nyina,
imi na pe shie ŋunɔ,
imi kie pe mbe ni jaa bɛŋɛ,
ŋga nu faŋga nyi titi tɛɛ mbe wi.
36 Nyiɛkpɔɔ, ŋu mu kɛ toni ni na,
na ni shio.
Yaa ŋga mu yaa ni na
kre tia ni kpɔɔ.
37 Mu ni le, mu n tia pe ni ta,
mu yii tun,
a ni n da mu mbulɔ mu to tun.
38 Ni ni loŋgoolo kɔŋgɔ nini,
mbe sɛ wii pe ja.
Na ni shie ndaa yire,
fɔŋga ni pe ta mu pe gbo tun.
39 Ni pe gbuun mbe chan,
a pia jaa yiri,
pie too sni ni yiɛ,
pia jaa yiri.
40 Ŋu mu ni kaan faŋga,
ŋga ni ni shie ŋunɔ,
a ŋu mu tia ndaa ni loŋgoolo jani.
41 Ŋu mu tia ni loŋgoolo na feni ni yiɛ,
a ni ja na mblɛ pe ni pra kre klai.
42 Pie na ndro chaa mbe u ya pe na,
la, pia ndro ta.
Pe nyɛni na o Tafun Nyiɛkpɔɔ yeeri,
a wraa shɔ pe pan.
43 Ni pe tuŋgo, a pe pe na bloŋgo yi,
a ni pe taanla na tablɔ yi lete na.
44 Mna ni shɔ leele mblɛ pra yiri,
mu ni taan pre kɛɛ,
mna tia ndaa ŋunumu li
waŋgrɛ na.
Leele mblɛ ni nsra chin,
pe kɔ mu kaari ni sumifɛɛnlɛ.
45 A fumblɔ na suulo ni yiɛ,
a na ni paara, pe ndie teeri ni pan.
46 Na pe ni nya,
pe sɔɔnrɔ kuu,
mbe pe fɛ mbe yili
pe ndra lawee yire nu,
mbe paan na seeri ni yiɛ.
47 Nyiɛkpɔɔ wa nyjila kro nu!
Wre wi dnɛ ŋga na ni gbɔɔn,
mbe mba to,
kena e u ŋga mɛɛ.
E Nyiɛkpɔɔ wre kpɔɔ,
wre wi ni dnɛ ŋga na ni gbɔɔn.
48 Wre u tia ndaa ni loŋgoolo jani,
u waŋgrɛ yire kro le ni jaara.
49 A u ni shio ni loŋgoolo kɛɛ.
Nyiɛkpɔɔ, ŋu mu tia
ndaa ni loŋgoolo jani,
a ŋu mu kɛ toni ni
na pɔɔrɔfɛɛnlɛ kɛɛ.
50 Ki tia mbe mu ŋga mɛɛ,
waŋgrɛ yire nu,
a mbe mɛɛ kɔ mbe mu ŋga.
51 Nyiɛkpɔɔ tia u ŋunɔ wi
mu yili gbee tataara.
U u blenyini koroo kre woni,
na David ŋmba u wɔ kre,
na u nanae kro nyina nyjila kro nu.