Pra Saul Nɔɔ Leele Gbo Peii
21
Nyjila ŋga nu David na pe ŋunu kre, klo kpɔɔ ka na to yɛlɛ nununu taarɛ. Kra tia David na o Tafun Nyiɛkpɔɔ wie ŋga ki pan na ki ni. A o Tafun Nyiɛkpɔɔ na yo u pan mbo, “Ŋga ki pan na ki ni yi na, Saul na u sele leele na linkuuro kee pe, wra tia pra Gibeon leele gbo.” 2 Gibeon leele pre nsra pe Israel leele pre plɛ. Ammon leele chiɛri mblɛ pra kro na lɛ, a Israel leele pre na nyu yo pe pan na pie kɛ tɔ pe na, pia pe pe yaka. La, ŋga Saul naa chaa mbe Israel, na Judah leele pre yiɛ nyi kre ndra na, wraa chaa mbe pe gbo peii, mbe pe nɔɔ fun. 3 A David na Gibeon leele pre yeeri, a pra pan mu tni, a wra pe wie mbo, “Chichie ŋgi e chaa mbe ni pe mbe e ŋga hin? Yira ŋgi mbe tɛɛ mbe e gbun nyiŋge kee sisaa ŋga pra e pe kre na, mbe ki ti e o Tafun Nyiɛkpɔɔ wre leele pre ŋga mɛɛ hin?”4 A pra kna mbo, “Wre na Saul na u sele leele lalaa kakrɔ kre, na mu swa wru kuraa ma jaa o lalaa gbeele, a wre wa Israel ndro pe yaka.” A David na yo mbo, “Kena yira ŋgi e chaa mbe ni pe mbe e ŋga hin?”
5 A pra yo mbo, “Saul naa chaa mbe o kla peii, mbe o nɔɔ ndro nunu chom kuraa wa kro Israel tra nu. 6 Kena na mu chaa, o ŋga bilɛ kɔɔnashin mu yili u sele leele nu, mbe o sɛ pe gbo mbe pe kan mbe mbra kaan na, Gibeah na, Saul wre titi chia na, mbe o Tafun Nyiɛkpɔɔ wre pe nya, o chin na Nyiɛkpɔɔ wre chɔɔ wra u wɔ ŋunu.” A Ŋunu David na kna mbo, “Mbe e ŋga pe lɛ.”
7 La, mu yire nyu nunu ŋga David na Jonathan na pe kre ndra na, u nsra Jonathan pɔ ŋmba praa yeeri Mephibosheth Saul nana wre pe yaka. 8 La, wra Rizpah bibilɛ shiin wɔ, pe mɛɛ naa Armoni na Mephibosheth. Saul wra pe se Rizpah na, a Rizpah lo mɛɛ naa Aiah. Ŋunu na Saul pɔ chlɔ Merab bibilɛ mblɛ wra se Adriel na kre kunɔ wɔ. Adriel lɛ na wi Barzillai ŋmba wra yiri Meholah na kre. 9 David na pre leele kɔɔnashin mblɛ wru mna le Gibeon leele pre kɛɛ, a pra sɛ pe gbo, mna pe kan mu mbra kaan na nyua ka na, a o Tafun Nyiɛkpɔɔ wre na pe nya. A pe kro kɔɔnashin pre na ku. Kre nyjila kre na pe paan mbe yua kun, na tla paan mbe yili.
10 Saul bichrɔ ŋmba praa yeeri Rizpah, ŋmba biile shiin pra gbo kre na sɛ kumu yoŋgo ni mna sɛ chan dnɛ ŋga lawee gboolo pre na nyi kre na. Wra tni lawee kre nu mu yire yirɛ kun nyjila kre nu, mna sɛ su na nyiɛ na pan. Ŋga wraa pini na yi na, na yila yili a hanyiɛlɛ na paan mbe pe gboolo pre li kre, mbe u pe ni, a na ble wɔ a yurɛ na paan pe kahaa, mbe u pe ni.
11 Ŋga David na kee ŋga Rizpah pe loo kre, 12 a wra yiri mu sɛ Saul na u pɔ Jonathan kajle shɔ Jabesh leele pre pan. Philistine leele pra Saul na u pɔ Jonathan gbo fa Gilboa nyua kre lawee, mna pe kan mu mbra mboo na Beth-Shan na, a Jabesh leele pre na sɛ pe kajle yire ju mna sɛ le. 13 David na tia pra sɛ Saul na Jonathan kajle yire shɔ, mna pan mu leele kɔɔnashin pre pra kan mu mbra kaan na kre kajle yire yoori mu ya. 14 A wra tia pra sɛ Saul na Jonathan kajle yire le Saul lɛ Kish faŋga nu Zela na. Benjamin tra nu. A pra kee nyjɛ ŋunu na yo pe pe yire kro pe. Kre kɔkro Nyiɛkpɔɔ na pe nyiɛtalaa loo waŋgra kre nu.
15 Ŋunɔ ka na ndru mu kun Israel leele na Philistine leele pre nu. A David na u leele pre na sɛ wi na Philistine leele pre ni. Kre ŋunɔ kre nu David na wi chiin mna sɛ pra.
16 Legbakra wa, u mɛɛ naa Ishbi-Benob, a wra swanyiɛfre chombo ka yii, ki snamu na da kilo taarɛ, a wra tokombe fɔŋgɔ pɔ sɛlɛ, wra David nya mnaa jawa na we jaa u gbo. 17 A Zeruiah pɔ Abishai na pan mna ya David na, a pra legbakra wre gbo. A David leele pre na da mu u ŋga na wa taa pe na mbe sɛ ŋunɔ na. Mbo, “Ŋu na Israel leele kaan, a o n na chaa mbe mu yili o nu.”
18 Kre ŋunɔ ŋga kɔkro kre, pre na Philistine leele pre na ndru mu ta Gob na. Kre ŋunɔ kre nu Sibbecai ŋmba wra yiri Hushah leele nu wre, na Philistine legbakra wa gbo, u mɛɛ naa Saph.
19 Pra ndru mu ŋunɔ ka wi na Philistine leele pre ni Gob na wa na, a Jair pɔ ŋmba praa yeeri Elhanan, a wra yiri Bethlehem na kre na Goliath ŋmba wra yiri Gitt leele nu wre gbo. Goliath wre chombo kre kpɔɔrɔm na da na yotuŋu kaan ŋga na u yoŋgo gbli kre ni.
20 Pra ndru mu ŋunɔ ka wi Gath na na. Legbakra wa naa wa chia kre na, a ŋunɔ wiire na tna u pan. U kambɛɛlɛɛ naa kɔɔnanunu, a u jekambɛɛlɛɛ naa kɔɔnanunu na. 21 Wra na kekpɔɛ yuu Israel leele pre na, a David chunu ŋmba praa yeeri Shimeah wre pɔ ŋmba praa yeeri Jonathan kre na u gbo. 22 Pre legbakrɛ jijirɛ mblɛ krɛrɛ Gath na pra yiri, a pe kro na ku David na u leele pre kɛɛ.