3 Ŋga David na ndru mu sɛ Jerusalem na kre, wra sɛ u bichilɛ kɛ mblɛ wra tɛɛ a praa ŋunu katoo kre sri pre wɔ mna sɛ pe tɛɛ titɛɛ, a praa pe sri, a wraa pe le, la, u nsra sni na pe wa ni, a pra pe na lekuchiɛlɛ lɛ mna sɛ su pe kumu ble.

4 A David na yo Amasa pan mbo, “Judah leele pre kro yeeri mbe ŋu na pre pan ni pan mna baŋga nyisee na.” 5 A Amasa na sɛ pe yeeri, la, u nsra ndru mu pan ble ŋga ŋunu na tɛɛ kre na. 6 A kra tia ŋunu na yo Abishai pan mbo, “Sheba we ti mbe wejiŋge wɛɛri o na kuraa mbe wɛ Absalom na. Kena ni leele pre wru mbe ŋu na pre u kɔŋgɔ ni, na kre ma, we sɛ chiɛ nyjɛ pe bunyi sin mu fɛ mu kun yire yɛ ta mbe, tni mbe shɔ o kɛɛ.” 7 A Joab leele pre, na lebiile shiefɛɛnlɛ pre, na yiri mna ya ŋunɔwifɛɛnlɛ hamblɛ pre na, a Abishai na yiri mna yiɛklu pe pan, a pra yili Jerusalem na mna Sheba kɔŋgɔ ni. 8 Ŋga pra da dnɛ kpɔɔ ŋga kraa wa Gibeon na kre lawee kre, bawa Amasa na pe fni. Na Joab uyɛ kna na u shie ŋunɔ, a u brɔfiɛn afoo wa mu pɔ u sɛlɛ, ŋga wraa shie mbe sɛ Amasa shaari kre, brɔfiɛn kre na foli ki afoo nu. 9 A Joab na yo Amasa pan mbo, “Awe, mni mu nyi hin?” A wra kɛ wa mna Amasa nyutanyooro yii, na u kalie kɛ ni mbe u nyu shiun. 10 Amasa nsra u dɔɔ ta na brɔfiɛn kaa wa u kamɛŋɛ, a wra ki tɛɛ mna Amasa su lɛɛ nu, a u lɛɛ bie na foli mu wo tra, a wra ku titɛɛ kre nu wa. Ki tia u nsra u pe yaka na. A Joab na Abishai na wa mu tro na Sheba kɔŋgɔ ni ni. 11 A Joab leele pre nunu na sɛ yire Amasa gboo wre jaara mbo, “Ŋmba uu wa Joab na David kro kpan, u taa Joab kro.” 12 Na Amasa gboo wree wa mu sni nyimi yire nu kondala wa. Joab ndro wre na nya na leele pre paan na yire na Amasa gboo wre le, a wra gboo wre fulo mna le nyaa mna sɛ sniyira ka nyaa mu u tɔ. 13 Ŋga wra gboo wre wru kolo wa kre, a leele pre kro na mɔŋɔ mna sɛ taa Joab kro, a praa Sheba kɔŋgɔ ni ni.

14 Sheba na nyaari mu tro Israel leele pre chiɛ yire na, mna pan kakpɔɔ ŋga praa yeeri Abel-Beth-Maacah kre na, a Bicri sele leele pre kro na sɛ fni, mna taa u kro mna le chia kre lam. 15 Joab leele pre na loo na Shebaa wa kre chia kre na kre, a pra sɛ chia kre tɔ, mna tra tuu mu buŋgo ŋga pe sin mu chia kre fɛ mu kun kre gbun, a plɛ na ki nɔɔ tru mbe pe ki ŋunɔ mbe chan.

16 Chlɔ kachiŋu wa naa wa chia kre na, a wra yire buŋgo kre kro mna leele pre yeeri mbo, “E loo, e Joab yeeri mbe mi na wre paara.” 17 A pra Joab yeeri, a wra kna mu u wie mbo, “Ŋu wi Joab woo?” A Joab na kna mbo, “Mi wi!” A wra yo mbo, “Jande, ndie tɛɛ ni pan.” A wra kna mbo, “Ta paara, ni ndru.” 18 A chlɔ wre na kna mbo, “Fa kre o chia ŋga na leele naa paan na pe kalɛɛ yiɛ chaa. 19 O chia ŋga pe kakpɔɔ, a ki pe wejinyiŋge na kpra leele chia Israel tra ŋga nu. Kena mni a mna chaa mbe ki ja hin? Mu chaa mbe o Tafun Nyiɛkpɔɔ wre yira kla ra?”

20 A Joab na kna mbo, “Chaa ma ni chaa mbe chia kre kla. 21 Kre ma kii wa o jawala nu. Pe blɔ wa yeeri Sheba, a u lɛ mɛɛ Bicri, a u yiri nyua chia ŋga pe yeeri Ephraim kre na, wre u yiri mu Ŋunu David taan. E wre ndro nunu wre wɔ e o ŋga mbe o laa chia kre na.” A chlɔ wre na yo mbo, “E frɔ, oo u ndra kɔ mbe ki wa e pan fimi na wa.” 22 A chlɔ wre na sɛ u jawala kre u ta kre bɔ chia kre leele pan, a pra sɛ Sheba yii mna u ndra kɔ, mna ki wa Joab pan buŋgo kre kro. A Joab na bnɔ fɔ u leele pre pan, a kra nyina na pe laa chia kre na, a pra laa mna sɛ katoo. A Joab na ndru mu sɛ Jerusalem na mna sɛ mandiɛ bɔ ŋunu David pan.

23 Joab wra pe Israel leele pre ŋunɔwifɛɛnlɛ yɛklo, a Jehoiada pɔ ŋmba praa yeeri Benaiah wre na wi David ŋunɔwifɛɛnlɛ mblɛ praa u sri pre lopom. 24 Adoniram na wi tinlɛ pre lopom. A Ahilud pɔ ŋmba praa yeeri Jehoshafat wre na wi nyunɔfun. 25 A Sheva na wi kala lihaa nyunɔfun, a Zadok na Abiata na lɛ srawɔfɛɛnlɛ. 26 A Ira ŋmba wra yiri Jair sele nu wre na wi David titi srawɔfun.