3 Ŋga Israel loplombo pre kro na pan David pan Hebron na kre, wre na pre na yira ka mu le peyɛ lalaa o Tafun wre yiɛ, a pra chin mu u tɛɛ jɔɔn na, imi na o Tafun Nyiɛkpɔɔ na ki yo u keenyanyofun Samuel pan kre.

4 Ŋga pra u tɛɛ jɔɔn na mu kɔ kre, a wre na Israel leele pre na sɛ wi Jerusalem leele ni, kre nyjila kre na pe ki yeeri Jebus. Jebusite leele pra klu mu tni wa. 5 A Jebusite leele pre na yo ŋunu David pan mbo, “Ma jaa le o chia ŋga na.” A nde David na ja mna wi mu Zion ŋga praa yeeri David kapɔɔ kre shɔ.

6 Ŋga pra yo pie sɛ ŋunɔ kre nu kre, David na yo ŋunɔwifɛɛnlɛ pre pan mbo, “Ŋmba we klu mbe Jebusite leele pre wa gbo, wre we pe ŋunɔwifɛɛnlɛ pre lopom.” Joab, ŋmba lo na wi Zeruiah wre wra ŋunɔ kre yiɛklu, ki tia wre pra pe ŋunɔwifɛɛnlɛ pre lopom.

7 Ŋga pra chia kre shɔ kre, a David na sɛ tni wa, kre ki tia pra ki yeeri David chia kre. 8 Wra chia kre sin a kra kpɔɔ mu ya. Wra nɔɔhle ki yilafinhaa mboo ŋga pra sin mna ki fɛ mu kun kre na, a Joab na ki haŋa kre gbeele mu sin. 9 David naa jaŋga taa na shie yiɛ, ŋgi na hin? O Tafun Nyiɛkpɔɔ Jaŋgafun wre naa wa u kro.

10 Ŋunu David ŋunɔwifɛɛnlɛ loplombo mblɛ pra mɛɛ shɔ, na Israel leele mblɛ pra ya u na a u ŋunumu kre na yire, imi na o Tafun Nyiɛkpɔɔ na ki yo kre. 11 Pe ŋmba wra yiɛklu na wi Jashobeam, a wre na wi wifɛɛnlɛ taarɛ mblɛ pra mɛɛ shɔ pre lopom. A wra pe Hacmoni ndro. Wre wra chombo tɛɛ mna leele lafɛɛ taarɛ gbo ŋunɔ nunu nu.

12 Ŋmba wra taa na wi Dodai biblɔ Eleazar, a wra yiri Ahoah sele nu. Wra chaa wifɛɛnlɛ taarɛ mblɛ pra mɛɛ shɔ pre nu. 13 Eleazar na ŋunu David kro praa wa Pas-Dammim na nyjila ŋga nu Philistine leele naa paan mbe wi na pe ni shɔlɔ see lawee ka nu, a Israel wifɛɛnlɛ pre naa feni kre. 14 La, Eleazar na David pra gbun ta mna yire shɔlɔ see kre lalaa, mna wi mu Philistine leele pre gbo wa. O Tafun Nyiɛkpɔɔ wre na tia pra wi mna yili.

15 Ki ble ka u ŋunɔwifɛɛnlɛ taarɛ mblɛ pra mɛɛ shɔ pre na sɛ David pan, na uu wa Adullam dnɛ kpɔɔ wee kre lawee. Kre nyjila kre na Philistine wifɛɛnlɛ sɛ ble Rephaim landɛɛ kre nu. 16 A na David wa nyua chia ŋga pe mboo sin mu fɛ mu kun kre na, a Philistine wifɛɛnlɛ pre na pan mu Bethlehem shɔ mu ta. 17 Kre nyjila kre na gbɔɔ David ta, a wra yo mbo, “Na mbe na ndro ta mbe wra sɛ nyumu ko ni chia Bethlehem jlonwee nyu kɔlɔ kre nu, mbra paan ni ŋga mbe ndaa gbɔ.”

18 A pre ŋunɔwifɛɛnlɛ taarɛ pre na yiri, mna sɛ yɔ mu tro Philistine ŋunɔwifɛɛnlɛ pre nu mna sɛ nyumu kre ko kɔlɔ kre nu Bethlehem jlonwee nyu na wa, mna ki tio mu pan mu David ŋga. La, u nsra ki gbɔ, a wra ki kna mu wo o Tafun Nyiɛkpɔɔ wre yiɛ, 19 mna kna mbo, “Nyiɛkpɔɔ we ni kisi na mbe kre nyumu ŋga gbɔ, na ni ki gbɔ to, pan kie pe na leele mblɛ pe pe ndra wa jenyje mu sɛ nyumu kre ko mu pan mu ni ŋga kre nyimi ni gbɔ. Ŋgi na hin? Pe ŋmaa pe wa jenyje mu sɛ ki ko mu pan mu ni ŋga.” Ki tia David nsra nyumu kre gbɔ. Kena kre gbun kee ŋga pre wifɛɛnlɛ taarɛ pre na pe yi.

20 Joab chunu Abishai wre na wi ŋunɔ wifɛɛnlɛ fulo na kɛ mblɛ pra mɛɛ shɔ pre lopom. Wre nunu na snimi tɛɛ mna leele lafɛɛ taarɛ gbo, a kra tia wra mɛɛ shɔ na leele taarɛ pre lɛ. 21 Wra mɛɛ shɔ mu wɛ fulo na kɛ pre na, la u nsra da na taarɛ pre ni.

22 Jehoiada biblɔ Benaiah wre na pe ŋunɔwifun gbuntitremfun. Wra yiri chia ŋga pe yeeri Kabzeel kre na, mna kekpɔɛ pe. Wre wra da mna Moab leele ŋunɔwifɛɛnlɛ titie shiin plɛ gbo. A ki ble ka, na sugbeŋge woni kpɔɔ, a wra sɛ le wee ka nu mna jira gbo wa. 23 Wra da mu Egypt blɔ gedeŋge wa gbo, wraa fiiti kɔɔnashin na yɔɔ. Na chombo kpɔɔ kaa wa Egypt blɔ wre kɛɛ, a kre nyjila kre na van kii wa Benaiah kɛɛ, a wra chombo kre tini mu shɔ u kɛɛ, mna u gbo na ki ni. 24 Kena yire gbun kee nyjɛ Jehoiada biblɔ Benaiah na pe, mna mɛɛ shɔ na leele taarɛ pre lɛ. 25 Wra buuro ta mu wɛ leele fulo na kɛ pre na, la, u nsra chaa leele taarɛ pre nu. Ki tia David na u tɛɛ wre titi shiefɛɛnlɛ pre lopom.

26 Kena ŋunɔwifɛɛnlɛ mblɛ mɛɛ kra yili kpɔɔ ŋunu David nyjila kre na lɛ, Joab chunu Asahel wre, na Dodo biblɔ Elhanan ŋmba wra yiri Bethlehem na kre, 27 na Shammoth Haror ndro wre, na Helez Pelon ndro wre, 28 na Ikkesh biblɔ Ira ŋmba wra yiri Tekoa na kre, na Abiezer ŋmba wra yiri Anathoth na kre, 29 na Sibbecai Hushah ndro wre, na Ilai Ahoah ndro wre, 30 na Maharai Netophah ndro wre, na Baanah biblɔ Heled ŋmba na wi Netophah ndro wre, 31 na Ribai biblɔ Ithai ŋmba wra yiri Gibeah na Benjamin sele tra nu kre, na Benaiah Pirathon ndro wre, 32 na Hurai ŋmba wra yiri lafoelee nyjɛ yiraa wa nyua Gaash lawee yire nu kre, na Abiel Arabath ndro wre, 33 na Azmaveth, Baharumite ndro wre, na Shaalbon ndro Eliahba, 34 na Gizon ndro Hashem wre bibilɛ, na Shagee biblɔ Jonathan Hararite ndro wre, 35 na Sacar biblɔ Ahiam Hararite ndro wre, na Ur biblɔ Eliphal, 36 na Mekerathite ndro Hepher, na Pelon ndro Ahijah, 37 na Carmel ndro Hezro, na Ezbai biblɔ Naarai, 38 na Nathan chunu Joel, na Hagri biblɔ Mibhar, 39 na Ammon ndro Zelek, na Beroth ndro Naharai ŋmba wraa Zeruiah biblɔ Joab ŋunɔ wiyirɛ tru kre, 40 na Ithri ndro Ira, na Ithri ndro Gareb, 41 na Hittite ndro Uriah, na Ahlai biblɔ Zabad, 42 na Shiza biblɔ Adina ŋmba wra yiri Reuben leele nu, a wra pe loplombo pre wa, a wifɛɛnlɛ fulo na kɛ naa wa u jaara kre, 43 na Maacah biblɔ Hanan, na Mithnite ndro Joshaphat, 44 na Ashtaroth ndro Uzzia, na Shama, na Jeiel Hotham bibilɛ mblɛ na lɛ Aroer leele kre, 45 na Shimri biblɔ Jediael, na u chunu Joha Tiz leele pre, 46 na Mahavite ndro Eliel, na Elnaam bibilɛ Jeribai na Joshaviah, na Moabite ndro Ithmah, 47 na Eliel, na Obed, na Jaasiel Mezobaite ndro wre.