2 Ki ble ka Ŋunu Solomon na Israel ŋunɔwifɛɛnlɛ loplombo mblɛ praa wifɛɛnlɛ kagbeŋge, na pe mblɛ praa wifɛɛnlɛ lafɛɛ le pre, na Israel kalalifɛɛnlɛ pre, na pe loplombo pre, na jlom loplombo pre kro yeeri a pra pan mu fni. 3 A Ŋunu Solomon na leele pre kro na sɛ lawee ŋga nu praa shie na sumi Gibeon na kre nu, ŋgi na hin? Bawa Yoŋgo Nyuŋgo ŋga o Tafun Nyiɛkpɔɔ sumifun Moses na gbeele tablɔ tra nu kre na nyi, a kre nu leele pre na o Tafun Nyiɛkpɔɔ naa fni. 4 Solomon lɛ David na klu mna sɛ Kiriath-Jearim na mna sɛ Nyiɛkpɔɔ Nyu Nunu Daka kre wru wa, mna sɛ na ki ni Jerusalem na, mna sɛ ki tɛɛ yoŋgo nyuŋgo ŋga wra kan ki pan kre nu. 5 La, na swafre sragbunu ŋga Uri biblɔ Bezalel ŋmba na wi Hur nana wre na gbeele kree wa Gibeon na wa, kraa wa mu yire o Tafun Nyiɛkpɔɔ Yoŋgo Nyuŋgo kre yɛsimi, a Ŋunu Solomon na leele pre kro naa paan na sumi wa. 6 Kre swafre sragbunu ŋga kraa wa mu yire o Tafun Nyiɛkpɔɔ Yoŋgo Nyuŋgo yiɛ kre na Ŋunu Solomon na sɛ yurɛ kagbeŋge tɛɛ mna yurɛ sroo sra wɔ mu Nyiɛkpɔɔ ŋga.

7 Ki ble kre blee, Nyiɛkpɔɔ na uyɛ wɔ mna Ŋunu Solomon nyina ŋunɛ nu, mna yo u pan mbo, “Ni wie yira ŋga mu chaa kpan, mbe mu ŋga ki yi.”

8 A Solomon na kna mbo, “Mna nyu ni lɛ David na kpɔɔ, mu u krɔ li, mu ŋunumu li. 9 Fuŋgaami ŋga, ni Tafun Nyiɛkpɔɔ, ni mu tali mbe mu li mu nyu ŋga mna yo ni lɛ David pan kre na. Ŋgi na hin? Leele mblɛ ndro wa jaa tɔɔnri ŋga, ŋu mu ni pe pe ŋunu, 10 kena jande, ni ŋga kachindɛ na jawala ŋga ni mbe tɛɛ mbe yiɛ klu pe pan, na kre ma, mu leele tataara mblɛ, ŋmbi we jaa pe le hin?”

11 A Nyiɛkpɔɔ na yo Solomon pan mbo, “Na kre kee ŋga kii wa mu loloŋgo na, a mu n wejiyirɛ, ndee swa, ndee kpɔɔrɔm wie, a mu n yo na ni mu loŋgoolo gbo mbe laa mu na, a mu n ŋmatitnɔmu wie, la, a mna ni wie kachindɛ, na jawala mbe tɛɛ mbe ni leele mblɛ na ni mu tɛɛ ŋunu pre le ŋga wala, 12 mbe mu ŋga jawala, na kachindɛ, mbe ndruu mu ŋga wejiyirɛ, na swa, na buuro ŋga ka ŋulo mblɛ pe yiɛklu mu na pre wa n da mu ta tun, a wa waa yiri mu kro, mbe ka ta ma fio.”

13 Ŋga kra pan ma kre, Ŋunu Solomon na flo Yoŋgo Nyuŋgo kre yɛsimi, Gibeon na wa, mna ndru mu sɛ Jerusalem na, mna sɛ na u ŋunumu lii.

14 Ŋunu Solomon na soolo, na sookɛɛ ta tataara. U sookɛɛ naa kagbeŋge na lafɛɛ jijirɛ, a u soolo naa kagbenyi kɛmbɔshiin, a wra plɛ tɛɛ Jerusalem na, a plɛ naa wa chiɛ hɛnyi yire na.

15 Ŋunu Solomon nyjila wra tia swafiŋge, na swanyiɛ na bɔ Jerusalem na na dnɛ yi. A cedar kɛɛn nyjɛ ndrɔ yira sheli yire na bɔ chia kre na imi na sycamore tinyi bɔ nyuɛ lawee yire nu kre. 16 Ŋunu Solomon soolo pre, Egypt na Kue waŋgra nu praa shie na pe loni na paan. 17 Praa sookaa nunu loni swafiŋge kradnɛ kɛmbɔkunɔ, na soo nunu loni swafiŋge kradnɛ jijirɛ. A praa pe plɛ prɛ na Hittite, na Syria ŋulo kaan.