3 Solomon na o Tafun Nyiɛkpɔɔ wre kori, mna li u lɛ David nyu kee na, la, kee ŋga wraa pini a ki nsra nyu yi na, wraa shie na sra woni, na tuwe ndiom tɛɛn sroi yire sragbuɛnlɛɛ yire na na. 4 Ki ble ka Ŋunu Solomon na sɛ Gibeon na mbe sɛ srawɔ, ŋgi na hin? Na bawa yi srawɔ haa titi. Solomon na yurɛ sroo sra kagbeŋge wɔ kre sragbunu kre na. 5 Gibeon na wa, o Tafun Nyiɛkpɔɔ na u uyɛ wɔ mu Solomon nyina ŋunɛ nu blee ka. Nyiɛkpɔɔ na yo u pan mbo, “Ni wie yira ŋga mu chaa kpan.” 6 A Solomon na kna mbo, “Mu nyu ni lɛ David mu sumifun wre na kpɔɔ, ŋgi na hin? Wra fraka, mna mu shɔ mu li, mna nyaari mu yiɛ na kpra ni. A mu n laa u kro, mu nyu u na kolo kro na, mu u ŋga biblɔ mbe u u krɔ li, mbe tni u ŋujɔɔn kre na aŋga. 7 O Tafun ni Nyiɛkpɔɔ, ŋu mu mu sumifun pe ŋunu mbe ni tni ni lɛ David titɛɛ. La, pɔ wi mi, a ni n chin imi mbe pe mbe leele pre le. 8 A mi wi ŋmba mu leele mblɛ mu wɔ pre lalaa. Pe nɛɛ mu tro, a pia ja mbe pe tɔɔnri. 9 Kena jande ni ŋga kachindɛ ŋga mbe shian mbe tɛɛ mbe mu leele pre le, mbe ni jaa chichie na sisam chin. Na kre ma, ndro wa jaa mu leele tataara mblɛ le.”

10 O Tafun Nyiɛkpɔɔ yiɛ na shɔ na Solomon kre kee kre wie. 11 A Nyiɛkpɔɔ na yo u pan mbo, “Ŋga mu n ŋmatitnɔmu, ndee yɛtaara yirɛ tataara, ndee mu wie na ni mu loŋgoolo gbo mbe laa mu na, la, na kachindɛ wie mbe tɛɛ mbra kpra lii kre ndra na, 12 kee ŋga mu wie kre, mbe ki pe mbe mu ŋga. Mbe mu ŋga kachindɛ, na nɔɔloo kpɔɔ, a ndro wa daa pe na ŋu wi fio. 13 Ŋga kii wa mu ya yi na, mbe mu ŋga nyjɛ mu n wie kple mbe ya. Mu swa ta, mbe buuro ta. A mu nyjila, mu ŋmbrɔ wa pe ŋulo nu. 14 A na maa ndie tɛɛ ni pan, maa li ni mbra na imi na mu lɛ David na pe kre waa, mbe mu ŋga ŋmatitnɔmu mbe ya.”

15 Ŋga Solomon na fo mu nyi mna nya na ŋunɛ wra ŋunu kre, wra ndru mu sɛ Jerusalem na, mna sɛ yire o Tafun Nyiɛkpɔɔ Nyu Nunu Daka kre yiɛ mna yurɛ sroo, na wejinyiŋge sra wɔ mu o Tafun Nyiɛkpɔɔ ŋga. Ŋga wra kɔ kre, a wra sukpɔɔ pe mna u sumifɛɛnlɛ pre kro ŋga.

16 Ki ble ka chiɛlɛ tiɛrifɛɛnlɛ shiin plɛ na pan na pe kala ni Ŋunu Solomon pan. 17 Pe nunu na yo mbo, “Ni tafun, mi na chlɔ ŋmba oo wa katoo nunu nu, a ndaa ni biblɔ se u yiɛ na. 18 Ŋga ndaa pɔ wre se, ki ble shiin wo na, a ni ŋmbrɔ ŋmba na biblɔ se na. Wre shiin mblɛ o naa wa katoo wa, ndro nsraa wa mu ya o na.

19 O naa wa ki ble ka, a ni ŋmbrɔ ŋmba na sni mna gbila mna u pɔ wre fɛɛri mu gbo. 20 A wra nyi ndroo mna sɛ ni pɔ wre wru ni jaara mna sɛ sniŋge uyɛ jaara, mna u pɔ gboo wre wru mu pan mu sniŋge mi jaara, na ni sni na ŋnu. 21 Ŋga nyiŋge na se bnimi, a ndaa nyi mbe ti mbe ni pɔ ŋgɔɔri kre, ndaa nya na pɔ wre ku. A ndaa u yii mu kna mu u le chichie, mna nya na ni pɔ wre ma.” 22 A chlɔ shiinwo wre na kna mbo, “Ɔɔhɔn pɔ ŋmba u le wre wi ni wo, a gboo wre pe mu wo.” A jle wo wre na je na yuu mbo, “Ɔɔhɔn, pɔ ŋmba u ku wre wi mu wo, a mi wo wi ŋmba u le wre.” Chiɛlɛ pre kro shiin na yire ŋunu yiɛ na kakra lii.

23 A Ŋunu Solomon na yo pe pan mbo, “E kro shiin pre, ŋmba yo ni wo wi ŋmba u le wre, a ŋmba wo wi gboo wre.” 24 A ŋunu na kna mbo, “E pan e ni ŋga brɔfiɛn yiɛshiin.” A pra sɛ ka wru mu pan mu u ŋga. 25 A wra kna mbo, “E biblɔ ŋmba u le wre peeri shiin, e u yɔɔ wru e le ŋmba kɛɛ, e yɔɔ wru e le ŋmba kɛɛ.” 26 Fooro na tia chlɔ ŋmba wo na wi pɔ ŋmba u le wre na yo ŋunu wre pan mbo, “Tolɛɛ jande, maa pɔ wre gbo, u wru mu ni ŋmbrɔ wre ŋga mbe u ta.” La, chlɔ nunu wre na kna mbo, “Tolɛɛ, maa o wa ŋga u wi, u peeri shiin.” 27 A Ŋunu Solomon na kna mbo, “Yaa pɔ wre gbo, e chlɔ jle wre ŋga u wi, wre wi pɔ wre lo titi.” 28 Ŋga Israel leele pre na Solomon kpra ŋga wra kun kre loo kre, kra tia pe kro naa u kaan buuro kpɔɔ, ŋgi na hin? Kee kre na tia pra chin na Nyiɛkpɔɔ u Solomon ŋga kachindɛ mbe u tɛɛ mbra kpra kuun.