7 Ŋunu Solomon na tra kre yɔɔlɛ mna loplombo kɛmbɔshiin tɛɛtɛɛ yi nyu na Israel tra kre nu kro. Pre loplombo pre praa shie na sro shio na paan na lebiile pre, na ŋunu katoo leele kaan. Nyiɛpɔ ŋga kie da kpan, loplombo pre nunu fna mbe sroe shɔ tra kre nu mbe pan mbe sɛ su na yɛlɛ kre we kɔ. 8 Loplombo kɛmbɔshiin pre mɛɛ, na lawee nyjɛ praa le yire mɛɛ yi kre. Ben-Hur, wre wraa nyuɛ lawee ŋga praa yeeri Ephraim kre le. 9 Ben-Deker, wre wraa Makaz, Shaalbim, na Beth-Shemesh, na Elon Bethhanan chiɛ yire lawee le. 10 Ben-Hesed wre wraa Arubboth, na Socoh, na Hepher tra yire lawee le. 11 Ben-Abinadab na Ŋunu Solomon bichlɔ Taphath leŋge, wre wraa Naphoth-Dor tra lawee yire le. 12 Ahilud pɔ Baana wre wraa Taanach, na Megiddo, na tra badaaŋga ŋga kraa wa mu mbra Beth-Shan na, mna mbra chia ŋga praa yeeri Zarethan na, mna shie Jezreel tapan haa kre le, hali mna tro mu sɛ su Abel Meholah na Jokmeam kakpɔɔ kre na. 13 Ben-Geber wre wraa chia ŋga praa yeeri Ramoth Gilead, na seechiɛ nyjɛ yira pe Manasseh pɔ ŋmba praa yeeri Jair wre wee yire kro le, mna sɛ su Argob tra ŋga kraa wa Bashan na, na ki kakpɔɛ fuloe taarɛ nyjɛ pra mboe sin mu fɛ mu kun, mna swafre tɛɛ mna yi jlonwee nyu krɔɛ yire pe kro, wre wraa yi le. 14 A Iddo biblɔ ŋmba pe yeeri Ahinadab wre wraa Mahanaim tra le. 15 Ahimaaz wraa Naphtali tra le, wre chɔɔ na Solomon bichlɔ Basemath leŋge. 16 Hushai biblɔ Baana wraa Asher tra, na chia ŋga praa yeeri Aloth kre le. 17 Paruah pɔ Jehoshaphat wraa Issachar tra le. 18 Elah biblɔ Shimei wre wraa Benjamin tra le. 19 Uri biblɔ Geber wraa Gilead tra le. Kre tra kre na Amora ŋunu Sihon na Bashan ŋunu Og na tni fa. Yire chiɛ nyjɛ kro, Geber wraa yi le.

20 Judah leele, na Israel leele pre na nɛɛ na epo nyu tanyiɛ yi. Praa lii, na gboo, a pe yiɛ naa shio. 21 Ŋunu Solomon wraa tra yire kro le mna yire Euphrates lɔɔ kre na mna sɛ su Philistine tra na Egypt tra sam na. Pre leele pre kro naa tɔɔ toni na u kaan, a pe kro naa wa u jaara mna hɛ su u kumu nyjila. 22 Ŋunu Solomon sro nyjɛ praa shio na paan na u kaan ble nyini yire na da mimi chichie taakpɔɛ nyini lafaa, na shɔlɔ mimi taakpɔɛ nyini lafɛɛ shiin. 23 Na nuulo mblɛ pe teeri titɛɛ na pe kaan sro chichiele kɛ, na nuulo mblɛ ni pe shie nyaa kahaa chichiele fulo, na mbaala na sikaala lafaa, na kafaala, na sabɛɛlɛ, na hanyiɛlɛ mblɛ nu nyina nyi ni. 24 Ŋunu Solomon na tra ta na shie Euphrates lɔɔ kre yila finhaa, mu yire wa mu sɛ su Mediterranean epo kre na na shie yila tohaa. Wejinyiŋge naa wa u kee kro nu. 25 Mu yire Ŋunu Solomon nyjila krɛrɛ, Judah na Israel, na chia ŋga pe yeeri Dan a kraa wa na shie nyjeeri haa wa mu sɛ su Beersheba ŋga kraa wa na shie tapanhaa kre leele pre kro naa wa mu tni tni pe tre tinyi, na pe fig tinyi jaara wejinyiŋge nu. 26 Ŋunu Solomon naa nyinyi nyjɛ nu u sookɛɛ na u soolo naa sni ni kagbenyi jijirɛ, a wraa sookɛɛ tnifɛɛnlɛ ni kagbenyi kɛmbɔshiin. 27 Wra tra kre yɔɔlɛ kɛmbɔshiin, mna loplombo wɔ a praa sroe shio nyiɛpɔ nyiɛpɔ na paan imi na ki fna. Ki tia Ŋunu Solomon, na leele mblɛ praa lii u katoo wa kro naa lii na yɔɔ yi, a yaka nsra pe shian. 28 Pan chɔɔ praa paan na shɔlɔ, na nyaa ni na u soolo pre kro kaan, imi na pra yi yɔɔlɛ mna pe ŋga.

29 Nyiɛkpɔɔ na Solomon ŋga kachindɛ, na jawala, na nɔɔloo, a kra kpɔɔ mu tro. 30 Solomon na kala chin mu wɛ kachimblɛ mblɛ praa wa yila finhaa lawee yire nu, na Egypt kachimblɛ kro na. 31 Wra kala chin mu wɛ ndro kro na, hali Ezra ndro Ethan, na Mahol bibilɛ taarɛ mblɛ lɛ Heman, na Calcol, na Darda pre na. A wra mɛɛ ta waŋgrɛ nyjɛ yira u fɛ mu kun kre kro nu. 32 Yomɛɛlɛ kagbenyi taarɛ wra gbun, mna mɛɛ kagbeŋge na kunɔ kɔ. 33 Wra tinyi kee chin, mu yire cedar tinyi nyjɛ yiraa wa Lebanon na, mna sɛ su hyssop tiŋge ŋga ki fini na yili mboo nu kre na, mnaa yi kee yuu. Wra yurɛ, na hanyiɛlɛ, na yurɛ mblɛ pe fulo tra, na mbroe kro kee chin na nyina. 34 Ŋulo na yiri waŋgrɛ waŋgrɛ nu mna Solomon kachindɛ kre kee loo, mnaa leele tuni a praa paan na u kachindɛ kee yire ndru na shie na yuu pe pan.