Suminyuŋgo Kre Siɛn Kee
5
Ŋga Tyre ŋunu Hiram na loo na pe Solomon tɛɛ jɔɔn na kre, wra leele wɔ mu tun Ŋunu Solomon pan, ŋgi na hin? Wre na u lɛ David nɔɔlɔ na yi. 2 A Ŋunu Solomon na tia pra sɛ yo Hiram pan mbo, 3 “Ŋu titi chin na loŋgoolo ŋunɛ nyjɛ praa wii na ni lɛ David ni kre na tia u nsra ja mu Suminyuŋgo sin u Tafun Nyiɛkpɔɔ wre mɛɛ na, mna hɛ su na o Tafun Nyiɛkpɔɔ wre na tia wra u loŋgoolo kro ja. 4 Ki tia fuŋgaami ŋga mu tro ni sam kro na, o Tafun Nyiɛkpɔɔ ni ŋga wejinyiŋge, a ni n loŋgo ni, a ndro n na paan mbe wi na ni ni. 5 A ki tia ni ni jawala pe na mbe Suminyuŋgo sin ni Tafun Nyiɛkpɔɔ mɛɛ na, imi na o Tafun Nyiɛkpɔɔ wre na ki yo ni lɛ David pan kre mbo, ‘Mu biblɔ ŋmba mbe tɛɛ mu ŋujɔɔn na mbe u mu krɔ li kre, wre we Suminyuŋgo sin ni mɛɛ na.’ 6 Kena ti mbe pe Lebanon cedar tinyi yire yɛ kun mbe ni ŋga. Mbe leele wɔ mbe pe paan ya mu leele pre na, tnumu ŋga mu leele pre we tun, na fɔtɔɔrɔ ŋga mu yo ni pe tɔ kro, mbe ki tɔ. Ŋu titi chin na o n wa na leele mblɛ pe tinyi chan mu chin ni mu da Sidon leele ni.”7 Ŋga Hiram na Solomon mandiɛ kre loo kre, u yiɛ na shɔ kpɔɔ a wra yo mbo, “O Tafun Nyiɛkpɔɔ wre wo yi mɛɛ aŋga, ŋgi na hin? U David ŋga pɔ kachiŋu mbe u u krɔ li mbe Israel waŋgra kpɔɔ ŋga le.” 8 A Ŋunu Hiram na ndru mu sɛ mandiɛ fɔŋgɔ ni Ŋunu Solomon pan mbo, “Ni mandiɛ ŋga na mu leele tun ni pan kre loo, mbe mu ŋga kɛɛn nyjɛ mu shian yire kro. 9 Mbe ti ni leele pre yi tini peii mbe paan ble epo nyu na. Mbe yi pɔ mbe tro na yi ni epo yiɛ na mbe pan na yi ni mna mu pe nyina kpan. Bawa ni leele pre we yi saanla, mbe yi wru mbe le mu leele pre kɛɛ. La, kee ŋga mbe na chaa mbe mu pe yi na, mu na mi na ni katoo wolo kaan sro.”
10 Ŋga kra pan ma kre, Hiram na tia pra sɛ kɛɛn nyjɛ yira Ŋunu Solomon shian kro kun mna sɛ u ŋga. 11 A Ŋunu Solomon na tia pra sɛ Hiram ŋga shɔlɔ taakpɔɛ nyini kagbenyi lafaa na fuloe shiin na kɛmbɔtaarɛ, na olive simi galɔm kagbenyi lafaa na kɛ. Yɛlɛ nyini ŋga pan Ŋunu Solomon naa Hiram kaan yire yirɛ nyjɛ. 12 O Tafun Nyiɛkpɔɔ na Solomon ŋga kachindɛ, imi na wra yo u pan kre. Wejinyiŋge kee naa wa Hiram na Solomon lalaa, a pe kro shiin na yira ka mu le peyɛ lalaa.
13 Ŋunu Solomon na tia pra tnumutunfɛɛnlɛ kagbenyi fulo na kɛ yii Israel tra kre nu kro jaŋga na. 14 Wra tia praa shie Lebanon na na peyɛ shio, na leele kagbenyi kɛ sɛ nyiɛpɔ li wa, mbe pe paan nyiɛpɔ shiin li katoo mbe ndruu sɛ. Adoniram na wi leele mblɛ pra yii a praa tnumu tuni jaŋga na kre lopom. 15 Ŋunu Solomon naa wa na dnɛ tiofɛɛnlɛ kagbenyi fuloe taarɛ na kɛ, na dnɛ tɛfɛɛnlɛ kagbenyi fuloe jijirɛ ni, pra tnumu tuni nyuɛ na. 16 A wraa wa na leele kagbenyi taarɛ na lafɛɛ taarɛ ni a praa u tnumu yire le, na tnumutunfɛɛnlɛ pre nyina nyjɛ pie na pini. 17 Ŋunu Solomon nyu kee ŋga wra yo yi na, pra dnɛ chichiele badɛnyi tɛni, mbe pe yi tɛɛ mbe Suminyuŋgo kre nɔɔ le. 18 Ŋunu Solomon na tia Hiram tnumutunfɛɛnlɛ na Gebal leele pre na dnɛ yire tɛ, mna kɛɛn yire knumu mna Suminyuŋgo kre sin.