3 Ŋunu Solomon na leele tun Tyre ŋunu Hiram pan mbo, “Ni ŋga cedar kɛɛn mbe ni lɔ, imi na mnaa ni lɛ David kaan yɛ a wraa loni nyjila ŋga ni wraa u ŋunu katoo siin kre. 4 Fuŋgaami ni chaa mbe Suminyuŋgo sin mbe o na o Tafun Nyiɛkpɔɔ wre sumi wa. Bawa mi na ni leele pre we na tuwe ndiom tɛɛn sroi mbra u kaan, a bawa oo na paanu cheche teeri u pan nyjila kro nu, mbra bnimi, na yilakɔŋgɔ sra yurɛ sroi mbra u kaan, kre na Wuuble sra wɔɔ, na nyiɛpɔ fɔŋgɔ sra wɔɔ, na ble kpɔɛ lie nyjɛ o Tafun Nyiɛkpɔɔ le mu tɛɛ o pan mbe o na yi pini nyjila kro nu kre.

5 Suminyuŋgo ŋga mbe sin kre kpɔɔ, ŋgi na hin? O Nyiɛkpɔɔ wre kpɔɔ mu wɛ sɛɛnlɛ kro na. 6 La, imi na Nyiɛkpɔɔ kpɔɔ mu da ŋga, ŋmbi we jaa nyuŋgo sin mbe u le ki nu hin? E le imi na nyjeeri kpɔɔ mu da, nde u nyjira ki nu. Kena mi wi ŋmbi mbe ni nyuŋgo sin u pan hin? Ŋga mbe jaa pe kro yi na mbe lawee sin mbe praa sra woni wa mbra u kaan.

7 Kena ti mbe ndro ŋmba u kɛ nyu tnumu chin, mbe jaa swanyiɛ, na swafiŋge, na swafre, na tɔɔnrɔ tɛɛ mbe yirɛ pe, mbe nyunɔmu kaanri mbe le yi nu, mbe jaa jese mbruku wo, na nyiɛduu, na nyiɛ piipii tɛɛ mbe yoŋgo tin. Wre fun wre na Judah, na Jerusalem kɛnyu tnumu tunfɛɛnlɛ mblɛ ni lɛ David na wɔ pre pie na tnumu tuni. 8 Ni chin imi na mu tinyi kunfɛɛnlɛ pre tinyi kun mu chin, kena ti mbe pe cedar, na cypress, na juniper tinyi knumu Lebanon na wa mbe paan ni ŋga. Ni leele wɔ mbe pe paan ya mu leele pre na, 9 mbe pe kɛɛn nɛɛrɛ yɔɔlɛ mbe ni ŋga, ŋgi na hin? Suminyuŋgo ŋga mbe sin kre we kpɔɔ mbe nyu titi.

10 A mbe mu leele mblɛ pie kɛɛn yire knumu pre ŋga yua mimi taa kpɔɛ kagbenyi lafaa, na simi gbɔwo gallon kagbenyi lafaa, na olive simi gallon kagbenyi lafaa na kɛ.”

11 Ŋga Ŋunu Hiram na mandiɛ kre loo kre, a wra u kɛ hlɛ nyunɔ mna bitumblɔ pre ŋga na pe paan Ŋunu Solomon ŋga mbo, “Ŋga o Tafun Nyiɛkpɔɔ u leele pre kee chaa kre na u mu wɔ na mu pe pe ŋunu. 12 E ti mbe e Tafun, Israel Nyiɛkpɔɔ ŋmba wra nyjeeri na tra gbeele wre ŋga mɛɛ. Wre u Ŋunu David ŋga biblɔ kachiŋu, a uu jawala ni, na kala nɔɔ ndru, a wra paan mbe Suminyuŋgo sin mbe u Tafun Nyiɛkpɔɔ wre ŋga, mbe ŋunu katoo sin uyɛ pan.

13 Ni Huram-Abi wɔ na u pan mu pan, u pe ndro ŋmba u kɛ nyu tnumu chin titi. 14 U lo na yiri Dan jlom na Israel tra nu, a u lɛ na yiri Tyre na. U swanyiɛ, na swafiŋge, na swafre, na tɔɔnrɔ, na dnɛ, na kɛɛn tɛɛ mu yirɛ gbeele mu chin. We ja mbe yoŋgo mbruku wo, na nyiɛduu, na nyiɛ piipii, na fiŋge prupru tɛɛ mbe yirɛ nyininyini pe. A we jaa nyunɔ mbe le yirɛ nyjɛ we gbeele kre nu, nyunɔmu ŋga mu u nyina kpan, we jaa ki pe. Na u pan wre na mu leele pre, na mu lɛ Ŋunu David wolo pre we chaa mbe tnumu tun.

15 Kena ni tafun, ti mbe mu sumifɛɛnlɛ pre pan na yua nyininyini, na olive simi, na simi gbɔwo nyjɛ nyu mna yo na mu ni ŋga yire ni. 16 Mbe ti mbe pe Lebanon kɛɛn nyjɛ mu chaa yire knumu mbe yi pɔ pɔ mbe taa lɔɔ yiɛ na mbe pan na yi ni Joppa na, mbe mu ti pe paan yi wru mbe sɛ Jerusalem na.”

17 Solomon na tia pra fuŋu ŋmba uu wa Israel tra kre nu kro tɔɔnri, imi u lɛ David na da mu pe kre, a pe kro nyu na pe kagbenyi lafaa na fuloe shiin na kɛmbɔtaarɛ na lafɛɛ kɔɔnanu. 18 A wra pe kagbenyi fuloe taarɛ na kɛ wɔ a praa nyinyi yirɛ yire tru na paan, mna pe kagbenyi fuloe jijirɛ wɔ a praa dnɛ tɛni nyambie yire nu, a wra pe kagbenyi taarɛ na lafɛɛ kɔɔnanu wɔ a praa tnumu tunfɛɛnlɛ pre le.