Ŋunu Solomon Na Nyiɛkpɔɔ Suminyuŋgo Sin
3
Ŋunu Solomon na nɔɔ hle mbe o Tafun Nyiɛkpɔɔ Suminyuŋgo kre sin Jerusalem na, nyua Moriah kre na. Bawa o Tafun Nyiɛkpɔɔ wre na da mu uyɛ wɔ mna u lɛ David nyina Jerusalem ndro Araunah shunshun kre na. Bawa Ŋunu Solomon na Suminyuŋgo kre sin. 2 Ŋga wra jɔɔn li kre, ki yɛlɛ jijirɛ wo kre nyiɛpɔ shiinwo kre ble ŋga kra taa shiin na, kre wra nyuŋgo kre nɔɔ hle.3 Suminyuŋgo ŋga Ŋunu Solomon na sin kre titnɔmu naa fiiti fuloe jijirɛ na kɛ, a ki valam naa fiiti fulo na kɛ. 4 Ki jlonwee nyuŋgo kre valam na nyuŋgo kre titi valam na yila, a ki gedem naa fiiti lafaa na fuloe jijirɛ, a pra swanyiɛ titi nya mu wo ki mboo lam kre na.
5 Ki nyuŋgo kpɔɔ titi kre mboombɛɛ kre, cedar kɛɛn pra wa mu ki fɛ mu kun, mna swanyiɛ titi nya mu wo kɛɛ yire na, mna yirɛ pe na shuɛ tinyi yi mu le yi nu, mna yirɛ pe na jlɔnyi yi mu yi nyunɔ mu le kɛɛn yire ni pe mboombɛɛ kre fɛ mu kun kre nu, mu tɛɛ mu ki san. 6 Wra dnɛ chichiele tɛɛ mna Suminyuŋgo kre lam san, a swanyiɛ ŋga ni pra ki lam kre san kre, Parvaim tra nu wra yiri na ki ni. 7 Na mu le Suminyuŋgo kre lam, kɛɛn nyjɛ ki ndra na, na ki krɔɛ jeelee, na ki mboombɛɛlɛ, na ki krɔɛ bie yire kro swanyiɛ pra nya mu wo yi na, a pra Cherubim kaanri mboombɛɛlɛ yire na.
8 Wra ki sin a ki lawee ŋga praa yeeri Cheche Ndoo titi kre titnɔmu na pe fiiti fulo na kɛ, a ki valam naa fiiti fulo na kɛ na. A wra swanyiɛ ŋga snam kie pe tons fulo na taarɛ nya mu wo ki lam mboe yire na. 9 Swanyiɛ ŋga ni pra tɛɛ mna ki mbɛɛ pe kre na da kradnɛ nunu na chiɛri, a nyinyi bɛɛlɛ nyjɛ pra sin ki nyjeeri yire, pra swanyiɛ nya mu wo yi mboe yire na lam.
10 Ŋunu Solomon na tia pra Cherubim shiin mblɛɛ praa kuɛn ni gbeele mu tɛɛ Cheche Ndoo titi wa, mna swanyiɛ nya mu wo pe na. 11-13 Cherubim pre naa kuɛn ni shiin shiin, a pe kuɛn yire nunu titnɔmu naa fiiti kɔɔnashin na yɔɔ, a pra yire yire mu yiɛ kan jlonwee kre na, mna pe kuɛn yire nyaala mu kan yi yɛ na, a yi titnɔmu na pe fiiti fulo na kɛ, mna su su mboombɛɛ yire na. 14 Yoŋgo ŋga pra wa Cheche Ndoo titi kre nyu na kre, jese mbruku wo, na nyiɛduu, na fiŋge prupru, na nyiɛ piipii ni pra ki tin, mna Cherubim tin mu le ki nu.
Pilaasi Shiin Yire
15 Pra pilaasi shiin sin Suminyuŋgo kre yɛsimi wa, yi kro shiin gedem naa fiiti fuloe shiin na kɛmbɔshiin, a wra yirɛ pe mna yi ndrɛ juule, a yi gedem na pe fiiti kɔɔnashin na yɔɔ yɔɔ. 16 A wra jlɔnyi gɔli gɔli yiyɛ na, mna swafre tɛɛ mu yirɛ yɛ pe na pomegranate yi, mna yi tin mu le yi nu, mna yi taa pilaasi yire ndrɛ na, mna tɛɛ mu yi san. 17 A wra pilaasi yire kan Suminyuŋgo kre jlonwee, nunu naa wa na shie nyjeerihaa, a haŋa kre naa wa tapan haa. Ŋga kraa shie tapanhaa kre mɛɛ na yi Jakin,a a ŋga kraa wa na shie nyjeeri haa kre mɛɛ na yi Boaz. b