Suminyuŋgo Kre Yirɛ Bɛɛlɛ
4
Ŋunu Solomon na tia pra swafre tɛɛ mna sragbunu pe, a ki gedem na pe fiiti kɛmbɔkunɔ, a ki valam na pe fiiti fulo na kɛ mu fɛ mu kun. 2 A wra tia pra tɔɔnrɔ fre kotolo badaaŋga ka pe, a praa ki yeeri Epo. Ki valam naa fiiti kɛmbɔkunɔ, a ki jijuom naa fiiti kɔɔnashin na yɔɔ, a na mu ki kra mu fɛ mu kun, kra pe fiiti fuloe shiin na kunɔ. 3 Ki nyu mbɛɛ fimi haa kre, pra nablɛm gbeele mu mbra mbra ki na, tɔɔnrɔ fre ŋga ni pra yira kre pe kre chɔɔ ni pra pe pe. Pra pe kɛ pe mu soolo peyɛ na, a lawee ŋga pra shɔ naa fiiti nunu na yɔɔ. Pan pra pe pe mu soolo kɛ kɛ peyɛ na ma mu fɛ mu kun ma sɔnyi shiin. 4 Kena kre yira ŋga praa yeeri Epo kre, pra ki pe mu taa nablɛm kɛmbɔshiin mblɛ pra swafre tɛɛ mu gbeele pre na, a praa le fimi na. Pe taarɛ na yiɛ tɛɛ nyjeeri haa, a taarɛ na yiɛ tɛɛ yila tohaa, a taarɛ na yiɛ tɛɛ tapan haa, a taarɛ na yiɛ tɛɛ yila finhaa, a pe nɔɛ naa wa lam haa. 5 Kre yira ŋga praa yeeri Epo kre gbidiŋge na da inchi taarɛ, a pra ki pe a ki nyu na pe na gbɔyira yi, mu mɛɛri mu sɛ kro na lɔɔ chia toto jiri mu nyaa. Nyumu galɔm kagbenyi kɛmbɔkunɔ kraa lee ki nu.6 Pra kotie bɛɛlɛ kɛ pe, mna yi kunɔ tɛɛ nyjeeri haa, mna yi kunɔ tɛɛ tapan haa. Yire kotie yire nu praa yurɛ mblɛ praa sroi na sra woni pre jee. A Epo kre nu srawɔfɛɛnlɛ pre naa peyɛ jee.
7 Wra swanyiɛ kaniɛ taa yirɛ kɛ pe imi na pra u nyina kre, a Ŋunu Solomon na yi kunɔ tɛɛ Suminyuŋgo kre nyjeeri haa, mna yi kunɔ tɛɛ na shie ki tapan haa. 8 A wra tia pra tebru kɛ pe, a wra yi kunɔ tɛɛ Suminyuŋgo kre tapan haa, mna yi kunɔ tɛɛ nyjeeri haa. Wra tia pra swanyiɛ tɛɛ mna kotie lafaa gbeele, nyjɛ nu pie na nyimi leni mbra nyaara.
9 Ŋunu Solomon na tia wra lawee vankam lam wo pe srawɔfɛɛnlɛ pre pan, kre na lawee vankam fimi wo ni, mna swafre nya mna wo yi krɔɛ yire na kro. 10 Yira ŋga praa yeeri Epo kre, pra ki tɛɛ Suminyuŋgo fimi na na shie kɔm ŋga kraa wa tapan haa na shie yilafin haa kre nu. 11 Ŋunu Solomon na tia pra chɔɛ, na sofi, na kotie nyjɛ nu pie na nyimi leni mbra nyaara gbeele.
Huram na tnumu ŋga Ŋunu Solomon na u ŋga mbe u pe Nyiɛkpɔɔ Suminyuŋgo wa yire kro pe.
12 Wra pilaasi shiin yire pe, mna yirɛ shiin pe na kotie yi, mna pilaasi shiin yire ndrɛ juule na yi ni. Mna yirɛ shiin yɛ tin, mna kotie yire san, mna yi tɛɛ mu pilaasi shiin yire ndra juule juule. 13 Wra yirɛ yɛ pe na pomegranate sɛnyi yi lafɛɛ jijirɛ, mna yi tin sɔnyi shiin mu le yirɛ shiin nyjɛ yira pe na kotie yi yire na. Mna yi tɛɛ mu yi san, a pra yi tɛɛ mu pilaasi shiin yire ndrɛ juule. 14 Wra kotie bɛɛlɛ kɛ yire taayirɛ pe. 15 Mna yira ŋga praa yeeri Epo kre, na ki nablɛm kɛmbɔshiin pre na pra ki taa kre pe. 16 Wra chɔɛ, na sofi, na damia nyjɛ ni praa kaara suulo pe, mna Suminyuŋgo kre yirɛ bɛɛlɛ kro pe mu ya. Yirɛ nyjɛ Huram-Abi na pe Ŋunu Solomon pan yire kro, swafre chichie ni wra yi pe. 17 Ŋunu Solomon na tia pra choo tɛɛ mna yirɛ yɛ nyini faanri mna yi lam wɔ wee Jordan tra mbrɛrɛ kre kraa wa chiɛ nyjɛ praa yeeri Succoth na Zarethan yire lalaa kre nu wa. 18 Yirɛ nyjɛ Solomon na pe yire na nɛɛ mu tro, ki tia swafre ŋga ni wra yi pe kre, ndro nsra ja mbe ki snamu chin mbe nyina.
19 Ŋunu Solomon na tia pra Nyiɛkpɔɔ Suminyuŋgo kre lam yirɛ pe. Yire na yi swanyiɛ sragbuɛnlɛɛ yire, na yi tebru nyjɛ na pe Nyiɛkpɔɔ paanu taari kre, 20 na kaniɛ taa yirɛ nyjɛ pra pe na swanyiɛ titi ni kre, na yi kaniɛ nyjɛ yie na nyini Cheche Ndoo titi kre yɛsimi imi na pra ki yo mu tɛɛ kre, 21 mna yirɛ pe na toto yi mu yi san, na kaniɛ, na yi ndile nyjɛ yie na nyini yire kro, swanyiɛ biribiri ni wra tia pra yi pe. 22 Pra kaniɛ mɛnyi yire nyu knumu yirɛ yire, na kotie yire, na taahɛɛ nyjɛ nu pie na tuwe ndiom tɛɛn leni, na paawa nyjɛ ni pie na kanhun woni, yire yirɛ nyjɛ kro swanyiɛ titi ni pra yi pe. Suminyuŋgo kre krɔɛ fimi wee yire, na krɔɛ nyjɛ yiraa wa Cheche Ndoo titi kre nu yire kro, swanyiɛ pra nya mu wo yi na.