8 A katoo ŋga nu wre titi Solomon we tni kre, pra ki sin a kraa wa kagbala kpɔɔ kre kro. Pan pra ki sin to na kagbala kpɔɔ kre yi. A wra ndru mu ka sin ma na, mna Pharaoh bichlɔ ŋmba wra leŋge wre ŋga. 9 Yire nyinyi yire kro, mu hɛ su kala li ndoo kre na, dnɛ chichiele ni pra yi sin mu yire yi nɔɔ na mu sɛ su yi ndra na. Dnɛ yire, pra yi kra, mna yi yiɛ, na yi krɔ tɛ mbrɛrɛ. 10 Dnɛ chichiele badɛnyi ni pra tɛɛ mna nyinyi yire kro nɔɔ le. Yi yɛ titnɔmu na da fiiti kɛmbɔshiin, a yi yɛ titnɔmu na da fiiti kɛmbɔkunɔ. 11 Yire na pra dnɛ chichiele nyjɛ pra kra mu tɛ yire sin mu taa, mna cedar kɛɛn wa yi ndra na. 12 Kagbala kpɔɔ kre, pra dnɛ chichiele yire yɛ tɛɛ mu sin mu taala gbee taarɛ, mna fɛ mu ki kun. Mna cedar kɛɛn tɛ mu taa ki na, imi na pra Suminyuŋgo kre, na ki kagbala pe kre.

13 Ŋunu Solomon na ndro tun blɔ wa pan praa u yeeri Huram, a wra pe fiireefun ŋmba wra swanyiɛ fre tɛɛ na yirɛ pini, a wra yiri kakpɔɔ ŋga praa yeeri Tyre kre na. 14 Lekuchɔ wa na yiri Naphtali sele nu u pɔ na wi blɔ wre, a u lɛ na yiri Tyre na, mna pe fiireefun. Ki tia Huram na kre tnumu kre chin titi, mna ja na yirɛ nyininyini pini na swafre ni. Wra pan mna Solomon tnumu ŋga wra yo u pe u pan yire kro pe.

15 Wra swafre tɛɛ mna nyuŋgo pilɛɛ shiin pe, yi gedem naa fiiti fulo na kɔɔnashin, a nunu kpɔɔrɔm, mu fɛ mu kun naa fiiti kɛmbɔkɔɔnatarɛ. 16 A pra swafre tɛɛ mna yi ndra tɔ yirɛ shiin pe, mna taa swafre pilɛɛ nyjɛ pra kan tra kre na. Nunu gedem naa fiiti kɔɔnashin na yɔɔ. 17 Mna pilɛɛ yire ndrɛ tɔ yirɛ yire pe mu yi san na jlɔnyi nyjɛ pe tin mu tɛni yi yɛ na. 18 Mna yirɛ yɛ pe kpoolo kpoolo na pomegranate sɛnyi yi, mu tɛni shiin shiin pilɛɛ yire ndrɛ na. 19 Mna ndru mu yirɛ pe na lɔɔ chiɛ toto yi, a yi titnɔmu na pe fiiti kɔɔnanu yi na. 20 A pra yi taa yira ŋga kra pe na kotolo yi kre ndra na, mna ki san na jlɔnyi ni, mna pomegranate sɛnyi kpoolo kpoolo yire yɛ pe lafɛɛ shiin, mna yi tɛni shiin shiin mu pilɛɛ shiin yire fɛ mu kun. 21 Huram na yire pilɛɛ shiin yire kan Suminyuŋgo kre jlonwee nyu haa. Nunu naa wa na shie tapan haa, a haŋa kre naa wa na shiin nyjeeri haa. A wra ŋga kraa wa na shie tapan haa kre ŋga mɛɛ Jakin, mna ŋga kraa wa na shie nyjeeri haa kre ŋga Boaz.^a 22 Pilɛɛ nyjɛ pra kan yire, pra yi ndrɛ san a yira pe na lɔɔ chia toto yi. Pra yire pilɛɛ yire tnumu tun mu kɔ.

23 Huram na swafre tɛɛ mna nyumu le yira badaaŋga ka pe. Mu yire ki nyu na mu sɛ su ki nyu kokoo ŋgaa na, kraa wa fiiti kɛmbɔkunɔ. A praa ki yeeri epo. Ki lam jijuom na pe fiiti kɔɔnashin na yɔɔ. A na mu ki nyu fɛ mu kun, kraa fiiti fuloe shiin na kunɔ. 24 Nyumu le yira kre, pra swafre tɛɛ mu lagɔnyi gbeele mna yi to mɛnyi na, a yi lalɛɛ na pe inchi nununu, a pra yi hlu ki nyu na yira pɛli fimi na, mu fɛ mu ki kun gbee shiin. 25 Pra swafre tɛɛ mna nablɛm kɛmbɔshiin faanri, mna nyumu le yira kre taa pe na. Nui pre taarɛ na yiɛ tɛɛ nyjeerihaa, a taarɛ na yiɛ tɛɛ yilafinhaa, a taarɛ na yiɛ tɛɛ tapanhaa, a taarɛ na yiɛ tɛɛ yilatohaa. 26 Nyumu le yira kre nyu gbidiŋge naa inchi taarɛ, a ki nyu kre na pe na gbɔyira nyu yi, mna pe na lɔɔ chia toto ki jiri, a nyumu galɔm kagbenyi kɛ kraa lee ki nu.

27 Huram na swafre tɛɛ mna yirɛ pe na trogo yi nununu kɛ. Yi titnɔmu naa fiiti kɔɔnanu nu, a pan yi valam na da na. A yi gedem naa fiiti jinyjirɛnyjirɛ na yɔɔ yɔɔ. 28 Imi na pra Trogo yire pe yi kre, yi mbɛɛlɛ jijirɛ yire na pe kpaflɛ kpaflɛ, mna kan jeelee yire na. 29 Mna jirae, na nabilɛ, na Cherubim pe yi mbɛɛlɛ kpaflɛ yire na. Mna jirae, na nabilɛ pre plɛ pe yi jeelee na, mna swafre kre ka gbun a yira pe na wrɛ yi mna mbra yi nyjeeri na yi tapan haa yire na. 30 Pra swafre kre ka tɛɛ mna jeelee pe mu le yi na jinyjirɛnyjirɛ na sakri jeelee yi. Swafre kre ka ni pra tɛɛ mna jeelee yire yii, mbe yi jaa nyaari. Yi jeŋgle jijirɛ yire kro na, pra swafre tɛɛ mna yirɛ pe yi nyjeeri mbe yi jaa nyumu leyirɛ yire yii. A pra totoe kaanri kaanri yirɛ yire mbɛɛlɛ na, mna tɛɛ mu yi san. 31 Pra trogo yire pe, a yi ndrɛ yire na lam ta na gbaŋgɔ yi, mbe nyumu leyirɛ yire ja mbe yire yi na. Yi nyjɛ yira sɛ nyjeeri yire naa inchi kɛmbɔkɔɔnatarɛ, a yi nyjɛ yira le lam kre naa inchi kɔɔnashin, a pra yirɛ kaanri yi na mu fɛ mu kun. 32 Trogo yire jeelee jinyjirɛnyjirɛ nyjɛ na yiraa nyaari yire gedem naa inchi fulo na kunɔ, mnaa wa yi tapan, a yi mbɛɛlɛ kpaflɛ yire na yi tɔ. Yirɛ nyjɛ ni pra yi jeelee nyaari wee yire yii kre naa wa mu kan trogo yire titi na. 33 Yi jeelee nyaari wee yire, pra yi pe na sookaa jeelee yi, a swafre ni pra tɛɛ mna yi yirɛ kro pe. 34 Yii hɛɛ naa wa trogo yire jeŋgle jijirɛ yire kro na. Pra yi pe a yira yili fimi na. 35 Mna yirɛ pe na mɛnyi yi, a yi kpɔɔrɔm na da inchi kɔɔnanyjirɛ mna trogo yire nyjeeri yirɛ yire yii mu fɛ mu kun. Yire yirɛ yire, na yirɛ kpaflɛ yire na chaa nunu. 36 Yirɛ yire, na yirɛ kpaflɛ yire, pra Cherubim, na jirae, na shuɛ tinyi kaanri yi na kro, mna yɛ pe na toto yi mna lele yi lalɛɛ yire nu mu fɛ mu kun. 37 Imi na pra trogo yire pe na yi kre. Pra yi pe a yira yila, a yi damu na yi kumu na pe nunu. 38 Huram na swafre tɛɛ mu nyumu leyirɛ kɛ pe, a trogo yire kro na ka ta. Yi valam naa fiiti kɔɔnanu nu, a nyumu galɔm lafɛɛ shiin yiraa lee nunu nu.

39 Pra trogo yire kunɔ tɛɛ na shie Suminyuŋgo kre tapan haa, mna kunɔ tɛɛ na shie ki nyjeerihaa. La, nyumu leyira ŋga praa yeeri epo kre, naa wa na shie ki tapan haa kre yilafinhaa. 40 Huram na ndru mna chɔɛ, na sofi, na kotie nyjɛ nu pie na nyumu leni mbra koori mbra nyaara pe. Huram na tnumu nyjɛ Ŋunu Solomon na u ŋga mbe u tun o Tafun Nyiɛkpɔɔ Suminyuŋgo wa yire kro tun mu kɔ. 41 Yirɛ nyjɛ wra pe wa yire na yi kre. Wra pilɛɛ shiin sin, mna yirɛ yɛ pe na gbaŋgɔ yi mu taa pilɛɛ yire na, mna yirɛ shiin yɛ tin na jlɔnyi yi, mna gbaŋgɔ shiin yire san. 42 Mna yirɛ kpoolo kpoolo yɛ pe lafɛɛ shiin na pomegranate sɛnyi yi, mna yi tɛni shiin shiin gbaŋgɔ yire na, 43 na trogo kɛ yire, na yi nyumu le yirɛ kɛ yire, 44 na epo kre, na nabilɛ kɛmbɔshiin mblɛ pra ki tio pre, 45 na chɔɛ, na sofi, na kotie nyjɛ nu pie na nyumu leni mbra koori mbra nyaara yire.

Kena yire yirɛ nyjɛ Huram na gbeele na swafre ni mna Ŋunu Solomon ŋga, a wra tɛɛ o Tafun Nyiɛkpɔɔ Suminyuŋgo wa. 46 Jordan tra gbeŋglen ŋga kraa wa Succoth, na Zarethan chiɛ yire lalaa kre choo ŋunu wre na tia pra faanri, mna yi tɛɛ mu swafre kre nya. 47 Swafre nyjɛ ni pra tɛɛ mna yirɛ yire pe kre na nɛɛ mu tro, ki tia Solomon nsra tia pra yi kra, mna yi snamu chin.

48 Solomon na tia pra yirɛ nyjɛ yiraa wa o Tafun Nyiɛkpɔɔ Suminyuŋgo wa yire gbeele, yire na yi swanyiɛ sragbunu kre, na swanyiɛ tebru ŋga na praa paanu teeri Nyiɛkpɔɔ yiɛ kre, 49 na swanyiɛ kaniɛ kɛɛn kɛ, nyjɛ yiraa wa mu yire Cheche Ndoo Titi kre yɛsimi, a yi kunɔ naa wa kalie haa, a yi kunɔ naa wa kamɛŋɛ haa, na ki yirɛ nyjɛ yira pe na toto yi, na kaniɛ yire, na yi muyirɛ, 50 na gbɔyirɛ, na kanhun fiiyirɛ, na kotie, na yirɛ nyjɛ nu praa tuwe ndiom tɛɛn sroi, na yirɛ nyjɛ ni pra tɛɛ mu Cheche Ndoo Titi kre, na Suminyuŋgo kre krɔɛ yii yire kro, swanyiɛ ni pra tɛɛ mna yi kro pe.

51 Ŋga Ŋunu Solomon na tnumu nyjɛ ki fna u tun Suminyuŋgo wa yire kro tun mu kɔ kre, wra swanyiɛ, na swafiŋge yirɛ hɛnyi nyjɛ u lɛ David na wru mu le o Tafun Nyiɛkpɔɔ kɛɛ yire wru mu pan mu tɛɛ Suminyuŋgo wa.