Nyu Nunu Daka Kre Na Pan Suminyuŋgo Wa
8
Ŋunu Solomon na Israel loplombo pre, na jlom loplombo pre kro yeeri na pe pan u pan Jerusalem na, mbe pe sɛ Zion na, kakpɔɔ ŋga u lɛ David na sin kre na, mbe sɛ o Tafun Nyiɛkpɔɔ Nyu Nunu Daka kre wru mbe pan Jerusalem na. 2 Leele pre kro na pan mu fni Asɛkɛ ble kpɔɛ nyjɛ praa lii nyiɛpɔ kɔɔnashin wo ŋga praa yeeri Ethanim kre nu.a 3 Ŋga Israel loplombo pre kro na pan mu fni kre, a srawɔfɛɛnlɛ pre na sɛ Nyu Nunu Daka kre wru, 4 mna ki tio mu pan Suminyuŋgo wa. A Levi leele pre na srawɔfɛɛnlɛ pre na Yoŋgo Nyuŋgo ŋga nu pre na o Tafun Nyiɛkpɔɔ naa fni kre, na ki yirɛ cheche yire kro wru mna sɛ na yi ni Suminyuŋgo wa. 5 A Ŋunu Solomon na Israel leele pre kro na sɛ fni Nyu Nunu Daka kre yiɛ, mna mbaala na nui tataara, mblɛ ndro wa jaa tɔɔnri tɛɛ mna sra wɔ. 6 Ŋga pra kɔ kre, a srawɔfɛɛnlɛ pre na Nyu Nunu Daka kre wru, mna sɛ ki tɛɛ Cheche Ndoo Titi kre nu, Cherubim pre kuɛn yire tapan. 7 Cherubim pre kuɛn yire na Nyu Nunu Daka kre, na kɛɛn nyjɛ ni praa ki tru yire tɔ. 8 Kɛɛn nyjɛ ni praa ki tru kre na tnu tnu, kra tia na ndro yire Cheche Ndoo kre lam, wraa yi nyu nyaa, la, na mu yili Cheche Ndoo wa rɛ, ma yi nya. A yii wa wa, mu pan mu su aŋga na. 9 Yirɛ nyjɛ yiraa wa Nyu Nunu Daka kre nu na yi, dnɛ kpaflɛ shiin nyjɛ Moses na le ki nu Sinai nyua kre lawee mna o Tafun Nyiɛkpɔɔ na nyu nunu pe na Israel leele pre ni, nyjila ŋga pra yili Egypt tra nu kre.b 10 Ŋga srawɔfɛɛnlɛ pre na yili Cheche Ndoo kre nu to, a tlo ka na pan mu o Tafun Nyiɛkpɔɔ Suminyuŋgo kre nyi poŋgo. 11 Ŋga kra pan ma kre, srawɔfɛɛnlɛ pre nsra ja mbe tnumu tun wa, ŋgi na hin? O Tafun Nyiɛkpɔɔ yɛnyiŋge na Suminyuŋgo kre nyi.12 A Solomon na yo mbo,
“O Tafun Nyiɛkpɔɔ yo na,
tlo wɔmu nu we tni.
13 Ki tia ni Suminyuŋgo
ŋga ki nyu titi sin u pan,
lawee ŋga nu we tni nyjila kro nu.”
Solomon Na Paara
14 Ŋga Israel leele pre naa wa mu yire wa ma kre, a Ŋunu Solomon na kna mu yiɛ kan pe na, mna dwan mu pe ŋga. 15 Mna yo mbo, “O Tafun Nyiɛkpɔɔ ŋmba wi Israel leele Nyiɛkpɔɔ wre wo yi mɛɛ, wre u yire u jaŋga na mu tia kee ŋga nyu wra yo ni lɛ David pan kre pe ma. Wra yo mbo, 16 ‘Mu yire ŋga ble ndaa ni leele Israel wolo pre wɔ mu yili Egypt tra nu kre, ni n kakpɔɔ ka wɔ Israel sele yire ka nu, mbe pe Suminyuŋgo sin mbe ni mɛɛ tni wa, la, ni David wɔ ni leele Israel leele pre nu, mbe u pe pe ŋunu.’” 17 A Solomon na yo na mbo, “Ni lɛ David na ki jawala ta na we Suminyuŋgo sin mbe o Tafun Nyiɛkpɔɔ Israel leele Nyiɛkpɔɔ wre mɛɛ tni wa. 18 La, o Tafun Nyiɛkpɔɔ wre na yo ni lɛ David pan mbo, ‘Kraa wa mu jawala nu na mu Suminyuŋgo sin mbe ni mɛɛ tni wa. Mna ka pe, na kre kee ŋga naa wa mu jawala nu. 19 La, ŋu ma mu Suminyuŋgo kre sin ni pan. Mu biblɔ titi we ni Suminyuŋgo kre sin.’ 20 Fuŋgaami ŋga o Tafun Nyiɛkpɔɔ tia u nyu ŋga wra yo kre pe ma. A ni pan mu ni lɛ David krɔ li, mu pan mu pe Israel leele ŋunu, imi na o Tafun Nyiɛkpɔɔ na nyu yo kre, ni Suminyuŋgo ŋga nu pie na o Tafun Nyiɛkpɔɔ, Israel leele Nyiɛkpɔɔ wre sumi sin. 21 A ni lawee wɔ mna Nyu Nunu Daka kre we tni. Kre Daka kre nu dnɛ kpɛfrɛɛ kpɛfrɛɛ shiin nyjɛ na o Tafun Nyiɛkpɔɔ nyu nunu ŋga wra pe na o tolɛɛlɛ ni nyjila ŋga wra pe wɔ mu yili Egypt tra nu yire nyi.”
Ŋunu Solomon Nyiɛkpɔɔ Tali
22 Ŋga Solomon nyu na to kre, leele pre yiɛ na, a wra sɛ yire sragbunu kre yiɛ, mna u kɛnyi yire nyjeeri, 23 mna nyiɛtali mbo, “O Tafun Nyiɛkpɔɔ, Israel leele Nyiɛkpɔɔ, Nyiɛkpɔɔ wa n wa nyjeeri, ndee tra mu da na mu ni. Ŋu mu lii mu nyu nunu ŋga mna pe na mu leele ni kre na, na mu koroo woni na pe mblɛ pe lɛɛ woni na lii mu kee na pre nyina. 24 Mu li mu nyu ŋga mna yo ni lɛ David pan kre na. Aŋga, kee nyjɛ mna yo yire kro pe ma. 25 Fuŋga rɛ, o Tafun Israel leele Nyiɛkpɔɔ, ŋga ni mu tali yi na, mu li mu nyu ŋga mna yo ni lɛ pan kre na. Mna yo na, na u nanae we ndie tɛɛ mu pan imi na mu sumifun David na pe kre wala, kena nyjila kro nu, ndro we yiri pe nu mbe ŋunumu li Israel leele na.c 26 Kena Israel leele Nyiɛkpɔɔ jande, ti mbe nyu ŋga mna yo ni lɛ David mu sumifun wre pan kre pe ma.
27 Kena Nyiɛkpɔɔ, yɛŋgɛ yi na mu ja mbe pan mbe tni tra ŋgaa? Imi na nyjeeri vala mu da ŋga kuraa kple, ki n ja mu mu yii mu tɛɛ. Kena mni Suminyuŋgo ŋga ni sin ŋga da mbe mu ja mbe tni ki nu hin? 28 Ni Tafun Nyiɛkpɔɔ, ndie tɛɛ mu mu sumifun nyiɛtalaa loo, mu kee ŋga ni mu wie ŋga pe mu ni ŋga. 29 Jande, ta mu Suminyuŋgo ŋga le lafo na blee. Kre lawee ŋga kee mna yo na, ‘Ni mɛɛ we tni wa,’ mbe ki ti nyiɛtalaa ŋga mu sumifun tali lawee ŋga nu ŋga, mbe mu ki loo. 30 Mu sumifun wi mi, a Israel leele pre, mu wolo lɛ. Jande na o wa yiɛ kan mu Suminyuŋgo ŋga na mu nyiɛtali, mbe mu yire mu tnihaa nyjeeri wa mbe loo u pan, mbe u sisam ti mbe u kɛ.
31 Na ki pan na ndro wa sisaa pe mu u ŋmbrɔ taan, a pe pan mu sisampefun wre yire sragbunu kre yiɛ mu Suminyuŋgo ŋga nu mbe u da na u n chin sisaa kre nu kre, 32 jande yire nyjeeri wa mu loo o pan, mu mu sumifɛɛnlɛ lalaa kpra kun. Mu ŋmba u pimi li wre ndie tini imi na ki fna, mu ŋmba we tam li wre ti mbe u sɛ.
33 Na ki pan na mu wolo Israel leele pre sisaa pe mu na, a ki tia pe loŋgoolo pe ja ŋunɔ, a pe waa ndru mu pan mu yire Suminyuŋgo mna maa mu tali mbe mu pe sisam ti mbe pe kɛ kre, 34 jande, na ki pan ma, loo pe pan, mu pe sisam ti mu pe kɛ, mu ndru mu pan na pe ni tra ŋga mna pe tolɛɛlɛ ŋga kre na.
35 Na ki waa pan na mu leele pre sisam pe mu mu taan, a ki yire ki na a mu tia wam yire, a pe waa pe jawala chinɛ mu laa pe sisam kro, mu yiɛ kan mu Suminyuŋgo ŋga na mu nyiɛtali kre, 36 jande, ndie tɛɛ pe pan mu mu sumifɛɛnlɛ, Israel leele pre sisam ti mu pe kɛ, mu pe nyina mbe pe ja mbe kee ŋga ki fraka pe. Mbe mu ti mbe nyiɛ pan mbe wo tra ŋga mna mu leele pre ŋga na krɔ yira yi kre na.
37 Na ki pan na klo, ndee yira pan mu le leele pre nu, ndee na ki pan na wam sisaa tia pe seele yirɛ kla, ndee na kpatɔ pan mbe yirɛ kla, ndee na ki pan na pe loŋgoolo pan mu pe tɔ pe chiɛ na, ndee na katala kee, ndee yira bɛɛlɛ pan mu le pe nu, 38 a ki waa pan na mu wolo Israel leele pre plɛ waa fooro li kpɔɔ, maa kɛnyi tini mu nyini mu Suminyuŋgo ŋga na, maa nyiɛtali mu mu yeeri kre, 39 jande pe nyiɛtalaa loo, mu pe sisam ti mu pe kɛ, mu ya pe na. O Tafun Nyiɛkpɔɔ, ŋga ŋu mu lewo jawala kee chin kre ndra na, pe kro jawala le nununu mu ŋga ki fna na pe ni pe mu pe ŋga. 40 Kre kie ti nyjila ŋga nu mu leele pree wa mu tni tra ŋga mna o tolɛɛlɛ ŋga kre nu kre, mbe praa lii mu kee na nyjila kro nu.
41 Na fuŋu wa yiri haalee mu mu mɛɛ ŋga mu ta kre kee loo, 42 maa mu mɛɛ kpɔɔ kre, na mu jaŋga kre, na mu kekpɔɛ nyjɛ mu pe mu mu leele pre ŋga yire kee loo, maa yire yi na mu pan mu nyiɛtali Suminyuŋgo ŋga nu kre, 43 na ki waa pan ma, jande fuŋu wre nyiɛtalaa loo, mu kee ŋga u mu tali kro pe mu u ŋga, mbe ki ti waŋgra leele kro mu mɛɛ kre chin, mbra lii mu kee na imi na mu leele Israel wolo pre pini kre. Kre kie ti mbe pe chin na Suminyuŋgo ŋga ni sin mu mu ŋga ŋga nu chiin ki fna mbe pe pan mbe mu sumi.
44 Na maa yo mu leele pre pan na pe sɛ wi na pe loŋgoolo ni, lawee ŋga nu pe nyi kpan, na pe waa yiɛ tɛɛ kre kakpɔɔ ŋga mu wɔ, a ni mu Suminyuŋgo sin mu mɛɛ na ŋga, maa nyiɛtali mu mu yeeri kre, 45 jande pe nyiɛtalaa loo mu ti mbe pe wi mbe yili.
46 Na ki waa pan na mu leele pre sisam pe mu mu taan, ŋgi na hin? Ndro wa n wa a wra sisaa pe, a ki waa pan na pe sisam kre tia krɔ waa mu kun a mu waa tia pe loŋgoolo pan mu wi na pe ni mu pe ja, mu pe yii mu sɛ. Na haalee yi o! Ndee haa nyjɔ yi o! 47 Na pe waa pe jawala chinɛ tra ŋga nu pe pe yii mu sɛ kre nu wa, maa nyiɛtali mu yo na, ‘O sisaa pe, mu kefuɛn pe mu na.’ 48 Na pe waa pe jawala chinɛ kpra ni, maa yire wa mu yiɛ kan tra ŋga mna o tolɛɛlɛ ŋga, na kakpɔɔ ŋga mu wɔ, na Suminyuŋgo ŋga ni sin mu mɛɛ na ŋga, 49 jande pe nyiɛtalaa loo, mu pe fooro le, mu nyu pe na. 50 Mu pe sisam, na yirii ŋga pe yiri mu mu taan kro ti mu pe kɛ, mu ti mbe pe loŋgoolo pre wa pe pe sisaa ka. 51 Ŋgi na hin? Ŋu titi leele mblɛ mu wɔ mu yili kanyana kpɔɔ titi nu Egypt tra nu kre lɛ. 52 Jande, nyu mu wolo Israel leele pre, na pe ŋunu na. Na pe nyiɛtali mu mu yeeri pe keshian nyjila, mbe mu loo pe pan. 53 Ŋu mna pe wɔ mu yili waŋgra leele kro nu, mu pe pe mu leele imi na mna yire mu sumifun Moses na mna ki yo pe pan, nyjila ŋga ni mna o tolɛɛlɛ wɔ mu yili Egypt tra nu kre.”
Nyiɛtalaa Haŋa
54 Ŋga Solomon na nyiɛtali ma mu kɔ kre, a wra yiri mu yire sragbunu kre yiɛ mna wra kosie kan mna kɛnyi yire nyjeeri kre. 55 A wra Nyiɛkpɔɔ tali mana kpɔɔ ni, mna u leele mblɛ pe fni wa kre kro dwan mbo, 56 “O Tafun Nyiɛkpɔɔ ŋmba u u leele ŋga wejinyiŋge, imi na wra u nyu yo kre wo yi mɛɛ. Nyu chichie ŋga wra yo kro, u yire u sumifun Moses na mu yi pe. 57 O Tafun Nyiɛkpɔɔ wre u taa o kro, imi na wra taa o tolɛɛlɛ pre kro kre, waa shia o wa, ndee mbe laa o kro fio. 58 U ti mbe o jaa li u kee na, mbe ki ti o jaa tni imi na u chaa, mbe jaa taa u mbra kee nyjɛ wra le mu o tolɛɛlɛ ŋga yire na. 59 O Tafun Nyiɛkpɔɔ, ni nyiɛtalaa sɔɔnri lafo na blee, mu nyu Israel leele, na pe ŋunu na, na pe blenyini keshiɛn nu. 60 Mbe ki ti waŋgra leele kro chin na o Tafun Nyiɛkpɔɔ wre chiin wi Nyiɛkpɔɔ, a wa n wa u kro na.
Solomon Na Suminyuŋgo Kre Le Nyiɛkpɔɔ Kɛɛ
61 A yire mblɛ lɛ u leele pre, e na kpra lii u yiɛ nyjila kro nu, e na lii u mbra kee yire na imi na e pe aŋga ŋga.”
Pra Suminyuŋgo Kre Nyu Nyaa
62 A Ŋunu Solomon na Israel leele mblɛ praa wa wa pre kro na sra wɔ mna o Tafun Nyiɛkpɔɔ ŋga. 63 Wra tia pra nui kagbenyi fulo na shiin, na mbaala kagbeŋge lafaa na fulo, tɛɛ mna wejinyiŋge sra wɔ mna o Tafun Nyiɛkpɔɔ ŋga. A ŋunu wre na Israel leele pre kro, na Suminyuŋgo kre wru mu le o Tafun Nyiɛkpɔɔ kɛɛ. 64 Ki ble kre lam wra lawee vankam ŋga kraa wa Suminyuŋgo kre yiɛ kre lalaa pe cheche, mna yurɛ popomblo sroo sra wɔ, kre na shɔlɔ sra, mna yurɛ mblɛ ni pra wejinyiŋge sra wɔ pre nyina sro wa. Ŋga ki tia wra sra yire wɔ wa na yi na, na sra yirɛ yire kro wa le swafre sra gbunu kre na.
65 A Solomon na Israel leele pre na ble kpɔɛ li ble kɔɔnashin, mna ndru mu Asɛkɛ ble kpɔɛ yire li ble kɔɔnashin, a yi kro na pe ble kɛmbɔjijirɛ. Lenɛɛrɛ na yiri haalee mna pan mu fni wa, pe plɛ na yiri Hamath ŋga kraa wa na shie nyjeeri haa wa kre, a plɛ na yiri Egypt tra sam ŋga kraa wa na shie tapan haa wa kre nu mna pan. 66 Ŋga ble lie yire nyu na to kre, a Solomon na leele pre wa kolo, a pra ŋunu dwan, mna yili wa mu sɛ pe kalonyi nu. Leele pre yiɛ na shɔ kpɔɔ, na o Tafun Nyiɛkpɔɔ wre nyu u sumifun David, na Israel leele na.