3 Kre nyjila kre na Israel leele pre kro wa mu yire sholo, a Ŋunu Solomon na kna mna pe dwan, 4 mna yo mbo:

“O Tafun Israel Nyiɛkpɔɔ wre wo yi mɛɛ, wre u yire u kɛnyu tnumu na mu tia kee nyjɛ nyu wra yo ni lɛ Ŋunu David pan yire pan ma yɛŋgɛ. Ŋgi na hin? Wra yo mbo, 5 ‘Mu yire nyjila ŋga ndaa ni leele pre wɔ mu yili Egypt tra nu kre, ni n kakpɔɔ ka wɔ Israel jlom yire ka nu na, mbe pe Suminyuŋgo sin ni Mɛɛ na, ndee a ni ndro wɔ a u pe ni leele pre yɛklo. 6 Fuŋga rɛ, ni Jerusalem wɔ mbe ni Mɛɛ tni wa, a ni David wɔ mbe u ni leele Israel wolo pre yiɛklu.’

7 Kraa wa ni lɛ David gbun na, na we na Suminyuŋgo sin o Tafun Israel Nyiɛkpɔɔ wre Mɛɛ na. 8 A o Tafun Nyiɛkpɔɔ wre na yo ni lɛ David pan mbo, ‘Kraa wa mu gbun na na mu Suminyuŋgo sin mi e Tafun Nyiɛkpɔɔ wre mɛɛ na. Mna ka pe na mna kre jawala ŋga ta. 9 La, ŋu ma mu kre Suminyuŋgo kre sin, ŋu titi biblɔ we yiri mbe ki sin ni mɛɛ na.’

10 O Tafun Nyiɛkpɔɔ wre nyu ŋga wra yo kre, u tia ki pe ma. Ni ni lɛ David krɔ li, mu tni Israel ŋujɔɔn kre na, imi na o Tafun Nyiɛkpɔɔ wre na ki yo kre, a ni Suminyuŋgo kre sin o Tafun Israel Nyiɛkpɔɔ wre Mɛɛ na. 11 Bawa Nyu Nunu Daka ŋga nu o Tafun Nyiɛkpɔɔ Nyu Nunu ŋga wra pe na u leele pre ni, a pra ki nyunɔ mu tɛɛ kre nyi.”

12 A Ŋunu Solomon na yire o Tafun Nyiɛkpɔɔ sragbunu kre yɛsimi Israel leele pre kro yiɛ mna u kɛnyi nyaa. 13 Wra klu mna swafre tɛɛ mna yira ŋga na pe yire na paara pe, kra pe fiiti kɔɔnatarɛ mu fɛ mu kun, a ki gedem naa fiiti kunɔ, a kraa wa lawee vankam fimi wo kre lalaa. A wra sɛ nduu ki na, mna kosie kan ki na leele pre kro yiɛ na wa, mna kɛnyi yire nyjeeri, 14 mna yo mbo,

“O Tafun Israel Nyiɛkpɔɔ, Nyiɛkpɔɔ wa n wa nyjeeri, ndee tra mu pe na ŋu wi, ŋu mu lii mu koroo nyu nunu ŋga mna pe na mu leele ni kre na, a mu sumifɛɛnlɛ mblɛ pe lɛɛ wɔ na lii mu nyu kee na kre, mu pe kori. 15 Nyu ŋga mna yo ni lɛ David, mu sumifun wre pan kre, mu li ki na. Mna nyu nyaa mna mu nyu yo, a aŋga mu tia ki pe imi na mna ki yo kre. 16 O Tafun Israel Nyiɛkpɔɔ, ti mbe nyu ŋga mna yo ni lɛ David mu sumifun wre pan kre, mbe ki pe ma. Mna yo u pan na, na ki pan na u nanae li mu mbra yire na chiriri na wre wi kre, nyjila kro nu ndro we yiri u nanae nu mbe jɔɔn li Israel na. 17 Kena o Tafun Israel Nyiɛkpɔɔ, ti mbe mu nyu kee ŋga mna yo mu sumifun David pan kre pe ma yɛŋgɛ.

18 Kena ŋu Nyiɛkpɔɔ na lewo we chaa mbe tni tra ŋga nu yɛŋgɛɛ? Imi na nyjeeri kpɔɔ mu da ŋga kuraa kple, mu nyjira ki nu, kena mni mu pe mbe le nyuŋgo fiɛn ŋga ni sin mu pan ŋga nu hin? 19 La, o Tafun Nyiɛkpɔɔ, ni mu tali mbe mu ni fooro le mbe ni nyiɛtalaa loo, ndie tɛɛ mu ni nyɛnɛɛ, na ni talaa ŋga mu sumifun waa mu yiɛ ŋga loo ni pan. 20 Jande nyiɛlɛ nyaa mna kre Suminyuŋgo ŋga le lafo na blee, kre lawee ŋga kee mna yo na mu ti mbe mu mɛɛ tni wa kre. Kena jande ndie tɛɛ mu mu sumifun nyiɛtalaa ŋga ni tali na lawee ŋga kaan ŋga loo. 21 Mu sumifun nyiɛtalaa loo. A na Israel leele pre waa yiɛ kan kre lawee ŋga na mu na nyiɛtali kre, jande mbe mu tni mu tni haa wa nyjeeri, mbe loo pe pan. A na mu loo pe pan, mbe mu pe sisam ti mbe pe kɛ.

22 Na ki pan na ndro u ŋmbrɔ wa pe sisaa ka, a ki pan na ki fna mbe ufun wre da, a u waa pan mu mu danyi da mu sragbunu ŋga yiɛ Suminyuŋgo ŋga nu kre, 23 kena jande, mbe mu yire nyjeeri wa mbe loo pe pan, mbe mu sumifɛɛnlɛ lalaa kpra kun, mbe ŋmba u pimi li wre ndie tini imi na ki fna, mbe ti pe ŋmba u tam li kre kpra nya.

24 Na ki pan na mu leele Israel wolo pre sisaa pe mu na, a pe loŋgoolo waa pan mu wi na pe ni mu pe ja, a ki waa pan na pe ndru mu pan mu pan, maa nyu nyaa mu pe sisam yo, a pe waa pan mu yire mu yiɛ Suminyuŋgo ŋga nu, mu mu tali kre, 25 jande, mbe mu yire nyjeeri wa mbe loo pe pan, mbe mu leele pre sisam ti mbe pe kɛ, mbe ndru mbe pan na pe ni tra ŋga mna pe tolɛɛlɛ ŋga kre nu.

26 Na ki pan na mu leele pre sisaa pe mu mu taan, a ki tia mu nyiɛ tɔ, a wam yire, a pe waa laa pe sisam kro maa kna mu mu Suminyuŋgo ŋga le, maa mu mɛɛ yeeri pe kanyana ŋga mu tia praa nyaa na kre, 27 jande mbe mu yire mu nyjeeri wa mbe loo pe pan, mbe mu sumifɛɛnlɛ pre sisam ti mbe pe kɛ. Na ki waa pan ma, jande mbe mu pe nyina kolo chichie ŋga na pie tro mbe tni, mbe mu ti mbe nyiɛ pan tra ŋga mna mu leele pre ŋga na krɔyira yi kre nu.

28 Na ki pan na klo sisaa to, ndee pe yirɛ luu a kaandɔɔ tia yi kla, ndee kpatɔ pan mu le yi nu mu yi ka, ndee kpaae pan mu yi kla, ndee ki pan na mu leele pre loŋgoolo pan mu pe tɔ pe chiɛ nyjɛ ka na, ndee na yira sisaa ki le pe nu, ndee kee ŋga nyini kie pe da kpan, 29 na ki waa pan na mu leele Israel wolo pre kanyana, na fooro ŋga nu pe nyi nya, maa kɛnyi yire, mu yiɛ tɛɛ Suminyuŋgo ŋga na, mu mu tali kre, 30 jande yire mu tnihaa nyjeeri wa, mu pe sisam ti mu pe kɛ, mu ti mbe ŋu na pre ki li imi na ki fna. Ŋgi na hin? Ŋu chiin mu ndro kro loloŋgo kee chin. 31 Na ki pan ma, nyjila ŋga pee wa mu tni tra ŋga mna o tolɛɛlɛ ŋga kre nu kre, pie mu fiɛ, mbe li mu kee na.

32 Nyiɛkpɔɔ, fumblɔ mblɛ pe yiri haalee waŋgrɛ nu, mu yila mu mɛɛ ŋga ki yili kpɔɔ, na mu kekpɔɛ nyjɛ mu pe a pe loo mu pan mu tni mu chaa mu leele Israel wolo pre nu kre, na ki pan na pe yiɛ tɛɛ mu Suminyuŋgo ŋga na, mu mu tali kre, 33 jande, yire mu tnihaa nyjeeri wa, mu loo pe pan. A kee ŋga pie mu wie kpan, mbe mu ki pe mbe pe ŋga, imi kie pe mbe leele mblɛ pee wa tra ŋga nu kro mu mɛɛ loo, mbe mu fiɛ imi na mu leele Israel wolo pre mu fiɛ kre, mbe ki ti pe chin na mu mɛɛ kii wa Suminyuŋgo ŋga ni sin ŋga na.

34 Na ki pan na mu leele pre sɛ na wii na pe loŋgoolo ni, a pe yiɛ kna mu tɛɛ chia ŋga mu wɔ, na Suminyuŋgo ŋga ni sin mu Mɛɛ nu ŋga, mu nyiɛtali kre, 35 jande mbe mu yire mu tnihaa nyjeeri wa mbe pe nyiɛtalaa loo, mbe ti mbe pe wi mbe yili.

36 Nyiɛkpɔɔ, mu chin na sisam na la lewo na, kena na ki pan na mu leele pre sisam pe mu mu taan, a mu krɔ waa kun na pe ni, a maa pe wru mu le pe loŋgo kɛɛ, a waa pe yii mu sɛ nyjɔ, ndee haalee waŋgra fɔŋgɔ ka nu, 37 a ki pan na pe pe jawala chinɛ mu laa pe sisam kro tra ŋga nu pe pe yii mu sɛ kre nu, a pe waa yire wa mu nyiɛtali mu yo mu pan na, ‘O sisam pe, mu kefuɛn pe mu punu mu na kre.’ 38 Na pe waa lɛɛ wɔ mu kna mu taa mu na, a pe waa yire tra ŋga nu pe pe yii mu sɛ kre nu wa, mu yiɛ tɛɛ tra ŋga mna pe tolɛɛlɛ ŋga ŋga na, na kakpɔɔ ŋga mu wɔ, na Suminyuŋgo ŋga ni sin mu mɛɛ na ŋga na kre, 39 kena yire nyjeeri mu tnihaa wa mu pe nyiɛtalaa loo, mu pe sisam nyjɛ pe pe mu na yire ti mu pe kɛ.