2 Mbra ŋga wra le kre na yi kre mbo, “O Tafun Nyiɛkpɔɔ ŋmba uu wa nyjeeri wre u ni pe ŋunu tra kro nu, a u ni wɔ na ni Suminyuŋgo sin Jerusalem, na Judah tra nu mbe u ŋga. 3 Kena u leele mblɛ pee wa mu tni o nu pre, Nyiɛkpɔɔ wre we ya e na, mbe e ndru mbe sɛ Jerusalem, na Judah tra nu, mbe sɛ e Tafun Israel Nyiɛkpɔɔ ŋmba Jerusalem na wre Suminyuŋgo kre sin mbe u ŋga. 4 Kena ni yuu leele mblɛ pee wa lawee kro nu pan na, pe Israel leele mblɛ pe kro pre ŋga swafiŋge, na swanyiɛ, na yirɛ, na yurɛ mblɛ pie shian mbe sɛ tɛɛ mbe Nyiɛkpɔɔ Suminyuŋgo kre sin Jerusalem na.”

5 Ŋga kra pan ma kre, Judah, na Benjamin jlom yire loplombo, na srawɔfɛɛnlɛ pre, na Levi leele pre, na mblɛ loloŋgo nu Nyiɛkpɔɔ na ki le pre na peyɛ kna, mbe sɛ Suminyuŋgo kre sin Jerusalem na mbe o Tafun Nyiɛkpɔɔ wre ŋga. 6 Pe tnifɛɛnlɛ pre kro na ya pe na, mna pe ŋga yirɛ nyjɛ pe gbeele na swafiŋge, na swanyiɛ ni, na pɔɔri yurɛ, na keshian yirɛ nyininyini, mna ndru mu lɛɛ wɔ mu pe ŋga yirɛ, mbe pe yi tɛɛ mbe sɛ Suminyuŋgo kre sin Jerusalem na. 7 Ŋunu Cyrus na o Tafun Nyiɛkpɔɔ wre Suminyuŋgo wa yirɛ nyjɛ Ŋunu Nebuchadnezzar na koli Jerusalem na, mna sɛ yi tɛɛ wre titi sɛɛn nyuŋgo kre wɔ fimi na. 8 Mna tia u swa tɛɛfun Mithredath wre na yi tɔɔnri, mna yi wru mu le Judah leele pre lopom Sheshbazzar wre kɛɛ. 9 Yirɛ nyjɛ pra tɔɔnri yire na yi kre, swanyiɛ kotie badɛnyi fulo na kɛ, na swafiŋge kotie badɛnyi kagbeŋge, na swafiŋge paawa fulo na kɔɔnanyjirɛ, 10 na swanyiɛ kotie bɛɛlɛ fulo na kɛ, na swafiŋge kotie bɛɛlɛ lafɛɛ jijirɛ na kɛ, yirɛ bɛɛlɛ nyjɛ yiraa wa mu ya yi na nyu naa kagbeŋge.

11 Kena swanyiɛ, na swafiŋge yirɛ yire kro naa kagbenyi kunɔ na lafɛɛ jijirɛ. Kena ŋga Sheshbazzar na leele pre na yiri Babylon tra nu na shie Jerusalem na kre, a wra sɛ na yi ni.