Nehemiah Hlɛ
Nehemiah Nyiɛtalaa
1
Hacaliah biblɔ Nehemiah wre kee nyjɛ wra pe na yi kre. Ŋga Ŋunu Artaxerxes na Persia ŋunumu li kre, ki yɛlɛ fulo wo kre nyiɛpɔ ŋga pe yeeri Kislev kre nu, na nii wa Susa kakpɔɔ ŋga pe mboo sin mu fɛ mu kun kre na. 2 Bawa ni chinlɛ pre nunu ŋmba pe yeeri Hanani wre, na leele plɛ na yiri Judah tra nu mu pan, a ndaa pe wie Jerusalem kee, na Judah leele mblɛ pra yii mu sɛ Babylon tra nu, a pe ŋmaa li mu ndru mu sɛ pre kee. 3 A pra yo ni pan na, “Pe mblɛ pe ŋmaa ta mu ndru mu pan katoo pre wa kanyana kpɔɔ, na nyifɛɛrɛ nu. Jerusalem mboe yire kro juari mu wo, a ki jlonwee nyu krɔɛ yire kro shɔ.”4 Ŋga ndaa yire kee yire loo kre, ndaa tni mna nyɛni chichie. Ble tataara, na nii wa na blefuni, na fooro lii, na o Tafun Nyiɛkpɔɔ ŋmba nyjeeri wre tali. 5 Kee ŋga ndaa yo na yi na, “O Tafun Nyiɛkpɔɔ ŋmba muu wa nyjeeri, ŋu wi Nyiɛkpɔɔ ŋmba mu kpɔɔ, a mu kee fiɛrɛ ni mu tro, a mu lii mu koroo nyu nunu ŋga mu pe na mu leele mblɛ pe mu kori, na lii mu nyu kee na kre na. 6 O Tafun Nyiɛkpɔɔ, jande ndie tɛɛ ni pan, mu yiɛ nyaa mu ni le, mu mu sumifun nyiɛtalaa ŋga ni mu tali lafo na blee na mu sumifɛɛnlɛ Israel leele kaan ŋga loo. Ni nyu nyaa na wre Israel leele, na o tolɛɛlɛ, na mi titi sisam yuu mu pan na, o na sisam pe mu mu taan. 7 O na sisaa kpɔɔ pe mu na, a o nsra li mu mbra, na mu kee nyjɛ mna yo mu sumifun Moses pan yire na. 8 Jande, kee nyjɛ mna yo mu sumifun Moses pan yire sɔɔnri. Mna yo u pan na, ‘Na yire Israel leele pre waa ndikana pe ni na, mbe e gbun mbe nyina waŋgrɛ nu. 9 La, na e waa ndru mu pan ni pan, maa li ni mbra yire na, hali na e mblɛ pe yii mu sɛ kree wa haalee kuraa kre, mbe e yoori, mbe ndru mbe pan na e ni lawee ŋga ni wɔ mbe ni mɛɛ tni wa kre nu.’ 10 O Tafun Nyiɛkpɔɔ, mu sumifɛɛnlɛ lɛ, a ŋu titi leele lɛ, a ŋu mna mu jaŋga kpɔɔ kre, na mu faŋga tɛɛ mna pe shɔ. 11 Kena jande, ndie tɛɛ mu mu sumifun, na mu sumifɛɛnlɛ mblɛ pe mu mɛɛ kaan buuro ŋga nyiɛtalaa loo. Jande, nyu mu sumifun na, mu ti mbe ni kee blɔ ŋmba pan ni shie ŋga yiɛ nyi.”
Wre ŋunu ŋmba yiɛ ndaa nyi fa, na simi leni u pan.