3 Ŋga wra da yɛlɛ taarɛ jɔɔn na kre, wra sukpɔɔ ka pe, mna kɛ wa mna u loplombo na u sumifɛɛnlɛ kro yeeri mbe pe paan li. Persia, na Media ŋunɔwifɛɛnlɛ loplombo kro na ka pan wa, a u tra ŋga wraa le kre lekpɔɛ kro na ka pan. 4 Nyiɛpɔ kɔɔnanu na uu wa na u yɛtaara yirɛ chichiele nyjɛ yiraa wa u pan trɛ nyjɛ nu wraa ŋunumu lii yire nu yire kro woni na leele pre nyina.

5 Ŋga yire ble yire nyu na to kre, a wra ndru mu sukpɔɔ ka pe na, mna leele mblɛ praa wa Susa na wa pre kro yeeri a pra pan mu li. Swafɛɛnlɛ na shianfɛɛnlɛ kro, pra pan mu fni ŋunu kagbala kpɔɔ, mna li ble kɔɔnashin. 6 Pra ŋunu katoo lam kre san na yonyi nyjɛ yi pe na mbruku yi, a finyii wa yi nu ni, mna mɛnyi nyiɛ duu pɔ pɔ yonyi yire nyu na, mna swafiŋge feelee le le mɛnyi yire na mu pɔ pɔ pilaasi na, Juɛn tutnɔnyi nyjɛ yiraa wa katoo lam wa kre, swafiŋge na swanyiɛ ni pra yi pe, a pra dnɛ finyi, na nyiɛ, na wɔɛ, na nyjɛ yi chiɛri nyininyini tɛɛ mna katoo kre tra lam le. 7 Swanyiɛ gbɔ yirɛ ni pra tɛɛ na simi kee wa, a gbɔ yirɛ yire nyini na nɛɛ. Ŋunu wre na kolo ŋga mbe leele pre simi yire gbɔ imi na pie ja. 8 Ŋunu wre na yo u sumifɛɛnlɛ pre pan na pe leele pre le simi yire imi na pe chaa kpan. 9 Nyjila ŋga ni bilɛɛ wa katoo kre lam na lii na gboo kre, na ŋunu chɔ ŋmba praa yeeri Vashti wree wa na chiɛlɛ ni nyinyi yire ka nu na lii na gboo na.

10 Ŋga pra li mna sɛ su ble kɔɔnashin ble kre na kre, ŋunu na simi gbɔ, a u yiɛ na shɔ, a wra u sumifɛɛnlɛ kɔɔnashin mblɛ pra san a praa u chiɛlɛ le pre yeeri, pre na lɛ Mehuman, na Biztha, na Harbona, na Bigtha, na Abagtha, na Zethar, na Carcas. 11 Mna yo pe pan na pe sɛ yo ŋuchlɔ Vashti pan na u ŋujuulee le mbe pan. Ŋuchlɔ wre na nyu titi, a ŋunu naa chaa mbe u u nyumu wɔ mbe leele pre kro nyina. 12 Ŋga bitumblɔ pre na sɛ ŋunu mandiɛ kre ni, mna sɛ bɔ ŋuchlɔ Vashti pan kre, wra je, u n sra sɛ, a kra tia ŋunu krɔ na kun kpɔɔ a wra nyi uyɛ nu.

13 Paala kolo na kre, na ŋunu fna mbe u loplombo mblɛ pe u kaan jawala pre ble, mbe u kee ŋga ki u da kro bɔ pe pan mbe pe u ŋga jawala ki na. 14 Leele mblɛ pan wraa jawala shio na lɛ Carshena, na Shethar, na Admatha, na Tarshish, na Meres, na Marsena na Memucan. Pre leele kɔɔnashin mblɛ na pe Persia na Media tra kre loplombo titie. 15 A wra yo pe pan mbo, “Mi ŋunu Xerxes, ni ni sumifɛɛnlɛ tun ŋuchlɔ Vashti pan na u pan, a u je, u n pan, kena mni mbra nyina na ki fna o pe hin?”

16 Bawa Memucan na yo ŋunu na u loplombo pre pan mbo, “Kpra na, tolɛɛ yiɛ chiin ma ŋuchlɔ Vashti taan, la, u u loplombo kro yiɛ taan hali leele mblɛ pee wa trɛ yire nu kro, u pe yiɛ taan na.” 17 Ŋga ki pan ma ŋga, kie ti chlɔ ŋmba we ki loo kpan u plɔ yiɛ le tra ŋga nu. Pie na ki yuu na, “Ŋunu Xerxes kɛ wa mu ŋuchlɔ Vashti yeeri, a u je, u n sɛ.” 18 Ble ŋga naa yo kie wɔ, na Media na Persia waŋgra ŋga loplombo chiɛlɛ paara ma pe pilɛ pan, a kie ti mbe chiɛlɛ pre wa pe pilɛ ŋga buuro na, mbe ki ti pe pilɛ pre krɔkun na pe ni. 19 Kena na ki tna tolɛɛ ŋunu pan kre, u ti mbe kee ka yili u nyuu, mbe pe ki nyunɔ mbe le Persia na Media mbra hlɛ nu mbe ndro wa kɔɔ jaa ki kna na, na “Vashti waa shia pan ŋunu lawee na fio, mbe pe u ŋuchlɔ kre shɔ mbe ŋmba u wɛ u na ŋga. 20 Na tolɛɛ nyu kee kre waa da lawee ŋga nu u jaŋga ta mu sɛ su kro nu kre, imi na chiɛlɛ pre pilɛ nyi kpan, na swafɛɛnlɛ lɛ o, na shianfɛɛnlɛ lɛ o, pie na pe kaan buuro.”

21 Ŋunu na u loplombo pre kro yiɛ na shɔ kee kre na, a kra tia ŋunu na kee ŋga ni Memucan na pan kre yii mna ki pe ma. 22 A ŋunu na hlɛ nyunɔ mna sɛ u trɛ yire kro nu, wra hlɛ yire nyunɔ yolo nyjɛ praa yuu trɛ yire nu kro nu, na pe nyunɔmu nyininyini nu, na blɔ fna mbe pe lopom u katoo, mbe pe hlɛ yire tɔɔnri pe yolo yire nu mbe ndro kro loo.