Job Hlɛ
Sutna Na Job Pe Mu Le
1
Blɔ wa naa wa Uz tra nu, a praa u yeeri Job, wre blɔ ŋmba na pe ndro ŋmba u fraka, a ndro nsra u sisaa ka ta mbe yo. Nyiɛkpɔɔ fiɛrɛ naa wa u nu, a wra sisam fun. 2 Wra se bibilɛ kɔɔnashin, na bichiɛlɛ taarɛ. 3 Wraa wa na mbaala ni kagbenyi kɔɔnashin, na nyuuma kagbenyi taarɛ, a wra wa nui mblɛ pe mbra shiin shiin na fali ni lafɛɛ kunɔ, na bubunlɔ chiɛlɛ lafɛɛ kunɔ ni na, a wraa sumifɛɛnlɛ ni tataara. Leele mblɛ praa wa mu tni na shie yila finhaa wa kre kro nu, wre blɔ ŋmba na pe lekpɔɔ mu wɛ pe na kro.4 U bibilɛ pre naa ble woni pe yɛ yɛ, na sukpɔɛ pini na lii pe katoo. Na yire ble yire da mbe pe pe jaala taarɛ pre yeeri mbe pe kro sɛ chaa mbe li, mbe gbɔ. 5 Na ki pan na pe li mu kɔ nyjila kro nu kpan, Job we biile pre yeeri mbe paala pe mbe ki ti mbe Nyiɛkpɔɔ sisaa ŋga biile pre pe kpan ti mbe pe kɛ. We yiri bnimi pupu, mbe yurɛ sroo sra wɔ mbe biile pre ŋga nununu, kena na ki pan na biile pre wa sisaa pe, ndee mu Nyiɛkpɔɔ sun u jawala nu kre, mbe u sisam tinkɛɛ ta.
Job Penlee Jle
6 Kena ki ble ka Nyiɛkpɔɔ nyjeeri bitumblɔ na sɛ fni u yiɛ, a Sutna na chaa pe nu. 7 A o Tafun Nyiɛkpɔɔ wre na Sutna wie mbo, “Sena mu yiri hin?” A Sutna na kna mna yo o Tafun Nyiɛkpɔɔ wre pan mbo, “Shie ni shie na kila tra yiɛ na na paan.”
8 A o Tafun Nyiɛkpɔɔ wre na yo Sutna pan mbo, “Mni mu ni sumifun Job jawa mu da hin? Ni n ndro nya tra yiɛ na, a u pe na wre wi, u fraka, a sisaa ka n wa u na mbe ndro ta mbe yo, a mi Nyiɛkpɔɔ fiɛrɛ wa u nu, a u sisam pee fun.”
9 A Sutna na kna mbo, “Mu jawa na Job mu fiɛ finfin ra? 10 Yira kre rɛ, ŋu Nyiɛkpɔɔ muyɛ pe na mboo yi, mu wre na u katoo wolo, na u yirɛ kro fɛ mu kun, mu u kɛnyu tnumu kro dwan, mu tia yurɛ mblɛ u poorii nɛɛ mu tra kre shɔ mu ta. 11 La, na mu chaa kɛ laa u na, mu ti mbe u yirɛ kro yili u kɛɛ, we yire mu yiɛ na mbe mu sun.”
12 A o Tafun Nyiɛkpɔɔ wre na yo Sutna pan mbo, “Na pan mu yo mu kɔ, kena ni u yirɛ kro le mu kɛɛ. La, wre titi rɛ, maashia kɛ tini mbe taa u na.” A Sutna na yili o Tafun Nyiɛkpɔɔ wre yiɛ mna sɛ.
13 Ki ble ka, Job bibilɛ pre na pe jaala pre na sukpɔɔ pe na lii, na kaa na gboo pe nyjɔ lopom wre katoo. 14 Bawa bituŋu wa na tafɛŋgɛ wru mu sɛ yo Job pan mbo, “Oo wa na fali na nui pre ni, a bubunlɔ pre na kaa pe mbɛɛ na, 15 a Sabean leele plɛ pan mu o tɔ, mu yurɛ pre ju mu sɛ, hali pe mu leele mblɛ pe yurɛ pre le pre gbo peii, mi nunu ni fɛ mu shɔ, mbe paan mu bɔ mandiɛ.” 16 Nyjila ŋga ni bituŋu wre naa wa na paara kre, u nyu nsra ta mu to, a ndro shiinwo na da mbo, “Nyiɛkpɔɔ kanhun yiri nyjeeri mu pan mu wo mbaala pre, na mu sumifɛɛnlɛ pre na, mu pe sro peii, mi chiin ni fɛ mu shɔ mbe paan ki yo mu pan.”
17 Wre nyu nsra ta mu to, na bituŋu fɔŋgɔ da na mbo, “Chaldean leele peyɛ wɔ feko taarɛ, mu pan mu le mu nyuuma pre nu, pe pe wru mu sɛ peii, hali pe mu sumifɛɛnlɛ pre gbo peii, mi chiin ni kro, mbe paan mu bɔ mandiɛ.” 18 Ŋga wre naa wa mu yire na paara kre, u nyu nsra ta mu to, na bituŋu fuŋu da na mbo, “Mu biile pree wa pe nyjɔ wre katoo mu sukpɔɔ pe na lii, na kaa na gboo, 19 bawa pe nyi to, a fuflɛ badaaŋga ka nyini yiri tablɔ tra kre haa mu pan mu le katoo kre nu, a ki juari mu wo pe na, a pe kro ku, mi nunu ni yili mu fɛ mbe paan ki bɔ mu pan.”
20 Ŋga Job na yire mandiɛ nyjɛ loo ma kre, a wra yiri mna u dodoŋgi tini mu wla uyɛ na, mna u ndra klu, mbe ki nyina na u fooro lii, mna to mu yiɛ juule tra, na Nyiɛkpɔɔ kaan mɛɛ, 21 na yuu mbo,
“Kɛnyi waara ni ndaa yili,
ni lo lɛɛ mu pan,
a kɛnyi waara,
ni mbe ndru mbe sɛ.
O Tafun Nyiɛkpɔɔ wre,
wra ni ŋga,
a wre u ndru,
mu u yira shɔ ni kɛɛ.
Kena mbe o Tafun Nyiɛkpɔɔ,
wre ŋga mɛɛ.”
22 Yire kee nyjɛ krɛrɛ nu, Job nsra kee sisaa ka pe, ndee mna Nyiɛkpɔɔ gasi na u sisaa pe.