Job 2

Job Penlee Shiinwo

Ki ble ka na, Nyiɛkpɔɔ nyjeeri bitumblɔ pre na sɛ fni o Tafun Nyiɛkpɔɔ wre yiɛ na, a Sutna na chaa pe nu mna ka sɛ, mna sɛ uyɛ wɔ mbe Nyiɛkpɔɔ nyina na. 2 A o Tafun Nyiɛkpɔɔ wre na Sutna wie mbo, “A sena mu yiri hin?” A Sutna na kna mbo, “Kila ni sɛ kila tra yiɛ na mu na paan.” 3 A o Tafun Nyiɛkpɔɔ wre na Sutna wie mbo, “Mni mu ni sumifun Job jawa mu da hin? Ndro n wa tra yiɛ na mu pe na wre wi, u fraka, a ndro wa u kee sisaa ka ta mbe yo, u mi Nyiɛkpɔɔ fiɛ, a u sisam pee fun. Mna ni pe mbe ndaa u kla finfin, nyjila ŋga ni u nsra kee sisaa ka pe, la, Job wa mu yire imi na wra nyi.”

4 A Sutna na kna mbo, “Na ki pan na kala ndro da, we na chaa mbe yirɛ nyjɛ yii wa u pan kro wru mbe ŋga, mbe ŋmaa ta. 5 Na mu chaa ti mbe wejiwrɛŋgɛ kee ka u da mbe mu le, mu nya mbe u yire mu yiɛ na mbe mu sun fuŋgaami.”

6 A o Tafun Nyiɛkpɔɔ na yo Sutna pan mbo, “Na pan mu yo kre, kena ni Job le mu kɛɛ, la, u ŋmaa rɛ, kre n wa mu kɛɛ.”

7 A Sutna na yili o Tafun Nyiɛkpɔɔ wre yiɛ mna sɛ Job waari na klɛ nyjɛ yi yaa ni, mna yire u jewrɛ lam mu sɛ su u ndra na. 8 A Job na sɛ tni tɔɔnrɔ nu, na fooro lii, mna sisɛɛ tɛɛ na uyɛ yua.

9 A u chɔ na yo u pan mbo, “Muu wa na kaan Nyiɛkpɔɔ na tɛɛ? Nyiɛkpɔɔ wre sun mu ku mbe kala kɔ.” 10 A Job na kna mbo, “Mu paara na jijuo wi, na Nyiɛkpɔɔ o dwan a o kre shɔ, kena na fɔɔn o da, ki fna mbe o ki je ra?” Kanyana nyjɛ yira Job da yire krɛrɛ nu kre, u nsra nyu kɔ mu paara mu Nyiɛkpɔɔ taan.

Job Nɔɔlɔ Taarɛ Pre

11 Job nɔɔlɔ taarɛ plɛ na u mandiɛ yire kro loo, a pra paara mu fni na pie sɛ u shaari, mbe u bre, pre na lɛ Eliphaz, wre na yiri Teman na, na Bildad, wre na yiri Shuah na, a Zophar na yiri Naamah na. 12 Ŋga praa dani Job na mna yire lee mu u nya kre, pe nsraa u chini chiriri, a pra gblee fɔɔri mu le, na pe dodonyi tini na wla peyɛ na, mu na bloŋgo koori na nyaara pe ndrɛ na, mu nyina na fooro pe lii. 13 Ŋga pra da u na kre, a pra lɛɛlɛ mu tni Job jaara tra, wre na pre na tni tra wa ble nununu kɔɔnashin, lafo na blee, hali pe nsra ja mu nyu kɔ mu paara na Job ni, imi pra u nya na u kala nyaa kpɔɔ titi kre ndra na.