Job Na Paara
3 “Nyiɛkpɔɔ jande,
maa ti ble ŋga na pra ni se,
ŋga ble pra yo na biblɔ o se kre,
maa ti mbe kre ble kre pan na.
4 Ti mbe wɔmu kprikpri,
kre ble kre tɔ.
Nyiɛkpɔɔ, maashia yaka pe,
kre ble kre nu na,
a maashia ti,
mbe ki nyisee nya na.
5 Ti mbe wɔmu kprikpri titi ki tɔ,
mbe tloe ble kre tɔ,
plimplim.
6 Kre ble kre, maashia ti,
mbe ndro ki kee loo na,
a ndro waashia ki tɔɔnri,
mbe chaa yɛlɛ nyu ble nu,
ndee mbe ki chaa nyiɛpɔ ble nu.
7 Maashia ti mbe ndro se,
kre ble kre nu na,
ti mbe ki kaari yɛjeere ble.
8 Nyiɛkpɔɔ, ti mbe chlɛfɛɛnlɛ,
mblɛ pie jaa paara,
epo yurɔ kpɔɔ,
ŋmba pe yeeri Leviathan,
wre pan mbe u,
ŋga pe chaa pe kre,
kre ble kre sun.
9 Na nyisee nyu,
wɔlɔ waa yili kre ble kre,
maashia ti ki chiɛnri,
a nyiŋge waashia se ki ble kre,
mbe yaka nya ki nu.
10 Ble kre sun,
ŋga kra tia pra ni se ki nu,
mu wa kanyana waŋgra ŋga nu,
kre ndra na, ki sun.
11 Mni a ni nsra ku ni lo lɛɛ,
ndee mna ndru ni seble hin?
12 Yira ŋgi nunu,
ki tia maa na ni ta,
mu taa jeelee na,
a ndaa nyinimi ta,
mu ŋgɔɔri wo?
13 Na kra pe na ndaa ku ŋga,
kaa nii wa mu sni,
wejinyiŋge nu kuulo,
14 a kaa mi na ŋulo,
na pe paaranyinafɛɛnlɛ
mblɛ praa wa tra na fa,
mna lawee sin sin peyɛ pan,
a yi juari mu wo kre,
oo wa mu tni kuulo ndoo.
15 Kaa mi na ŋulo,
mblɛ pan swanyiɛ na nyi,
a swafinyi na pe,
kalonyi nyi pre, oo wa titɛɛ.
16 Yira ŋgi ki tia pe nsra ni le,
tra na bikpɔlɔɔ wi ŋga hin?
Ni chaa mbra pe na bifiun,
ŋmba wa daa yila nya wi.
17 Na mu sɛ kuulo,
bawa sisampefɛɛnlɛ,
na mblɛ pe tnumu tun,
mu fna kre kro sɛ na wuui.
18 Leele mblɛ pe yii,
mu le nyuŋgo kuraa,
wa mu tni wa a ndie nyjii pe na,
ndro wa fuu pe na,
mbe gble pe ndie na.
19 Leele mblɛ mu chin,
ŋga kroo wa wa,
mɛɛfɛɛnlɛ, na mblɛ,
pe n mɛɛ ni kro,
hali letaala wa,
wa na peyɛ lii.
20 Yira ŋgi ki tia,
nyiŋge se foorofun na,
a ndra pɛɛnrɛfun,
ŋmaa li ŋga hin?
21 ndro ŋmba u kumu chaa,
kre na ki ta,
pe kumu haa chaa,
mu wɛ swa yirɛ chichiele,
nyjɛ pe ndra na.
22 Prefɛɛnlɛ pre,
na pe ku mu le faŋga,
pe yiɛ shio kpɔɔ.
23 Lewo ŋmba,
Nyiɛkpɔɔ le kagbla,
mu kolo ndra u na kre,
mni mbe u je,
mbe ŋmaa li hin?
24 Jiɛn, na nyɛnɛɛ,
yire yi sɛ kaari ni sro,
na ni nyumu.
25 Kee ŋga ni fiɛ kre ki ni da,
kala ŋga ni fiɛ titi ki ni nya.
26 Ni n wa na wejinyiŋge ni,
a ni n wa na wuo ni,
na tɔɔra bɔkɔ.”