Eliphaz Paara
4
A Job nunu Eliphaz ŋmba wra yiri Teman na kre na kna mbo,2 “Job, na ni paara na mu ni,
mu krɔ we kun ra?
Mba jaa frɔ,
mbe mba paara.
3 Sɔɔnri na mna paara,
mu lenɛɛrɛ nyina fa,
mna mblɛ kɛnyi yira gblɛ,
kre le gbeŋmbaa.
4 Plɛ na gbro na shie tohaa,
a mu nyu kee,
na pe le gbeŋmbaa,
a pra yiri mu yire.
5 La, fuŋga kanyana ŋu da,
a mna fooro lii,
a ma jaa muyɛ yii.
6 Mu Nyiɛkpɔɔ chiŋgɛ,
na mu frakaa fna,
mbe pe mu dankna,
7 Jawa mu le,
mu da mu loo,
a ndro ŋmba u fraka,
na kala nyaa tuun?
8 Ŋga ni chin yi na,
lewo ŋmba u sisam sɛŋgɛ,
ndru kre,
wre u kanyana sɛŋgɛ kuun.
9 A na Nyiɛkpɔɔ krɔ waa kun,
a u ŋu fɛɛn,
u mana fuflɛ we u kla.
10 Sisaa pefun we na nyɛni,
mbra gnu na jira wi,
la, Nyiɛkpɔɔ we u ŋgaala gbun,
mbe kuari,
mbe wa jaa yaka pe.
11 Na ki pan na jira wre n,
yurɔ ta mbe yii mbe ka,
we ku, mbe u biile fɛ,
mbe nyina.
12 Pra kee ka ju mu yo ni pan,
a kee kre na le ni ndie.
13 Kee ŋga kraa,
ni jawala tɔɔra ndroo kre,
ki nsra tia ndaa ŋunu.
14 Fiɛrɛ na ni yii,
a ndaa seeri.
15 A ŋumu ka na tro ni yiɛ na,
a ni nyjure na yiri,
mu yire sholo.
16 Ŋumu kre na yire,
a ndaa yira ka nya ni yiɛ,
la, ni nsra chin yira ŋga nyini yi,
a ndaa mana ka loo brɛmm mbo,
17 ‘Lewo na nyjuro we jaa fraka,
mbe wɛ Nyiɛkpɔɔ naa?
Lewo we jaa pe chasi,
mbe wɛ u gbeelefun naa?
18 Kena na kra pan na,
Nyiɛkpɔɔ nsraa kaan,
u sumifɛɛnlɛ mblɛ pee wa,
nyjeeri kre na,
mna punɔɔ kee ka nya,
u nyjeeri bitumblɔ pre na,
19 kena lewo ŋmba ŋmaa,
kii wa choo nyuŋgo nu,
wre ŋmba nyuŋgo nɔɔ,
pe le pooro ni,
mbe mu jaa u fɛɛri,
mbe gbo to na miuŋu wi.
20 Na pe u se bnimi,
yila naa kɔɔ na u ku,
na mu u chaa,
ma u nya na fio.
21 Na pe yira,
ŋga kii wa u pan,
kro wru mu sɛ,
a u yili tnimu ŋga nu,
na u n kala chin.’