4 Nyjila ŋga nu yire kee nyjɛ krɛrɛ nsra ta mu pan kre, na srawɔfun Eliashib wraa Suminyuŋgo kre yirɛ tɛɛ haan le, a u nunu titi na wi Tobiah. 5 Ki tia wra tia Tobiah na sɛ tni yire yirɛ tɛɛ nyinyi yire ka nu, bawa praa shɔlɔ nyjɛ ni praa paan na sra woni kre, na tuwe ndiom tɛɛn, na Suminyuŋgo kre yirɛ bɛɛlɛ, na shɔlɔ nyjɛ praa yɔɔlɛ kɛ kɛ na yi nununu woni na paan kre, na simi gbɔ wee, na olive simi nyjɛ praa woni mbe Levi leele pre, na mɛkɔmblɔ pre, na Suminyuŋgo kre shiefɛɛnlɛ pre kaan yire, yire na yirɛ nyjɛ praa paan na srawɔfɛɛnlɛ pre kaan yire ni kro teeri.

6 La, ŋga yire kee nyjɛ krɛrɛ naa pini kre, na ni n wa Jerusalem na, ŋgi na hin? Ŋga Babylon ŋunu Artaxerxes na jɔɔn li kre, ki yɛlɛ fulo na kɛmbɔshiin na ndaa ndru mu sɛ ŋunu wre pan. Kraa wa wa a ndaa kolo tali u pan, 7 mna ndru mu pan Jerusalem na. Bawa ndaa kefɔɔn ŋga srawɔfun Eliashib na pe, mna tia Tobiah na sɛ tni Suminyuŋgo nyinyi yire ka nu kre loo. 8 Kra tia krɔ na ni kun titi, a ndaa sɛ Tobiah yirɛ kro koli mna wo fimi na. 9 A ndaa tia pra paala pe mna nɛɛrɛ laa nyinyi yire na, a ndaa chin mna tia pra Suminyuŋgo kre yirɛ yire koli mu sɛ le wa, yire na shɔlɔ nyjɛ ni pra pan mu sra wɔ yire, na tuwe ndiom tɛɛn yire ni.

10 A ndaa ndru mu loo na pe nsraa Levi leele pre kaan sro nyjɛ ki fna mbe praa pe kaan yire, a ki tia Levi leele pre na mɛkɔmblɔ mblɛ pe fna mbra tunumu tuni Suminyuŋgo wa pre plɛ ndru mu sɛ na pe seele tnumu tuni. 11 Ki tia ndaa loplombo pre yeeri mu ble, mna pe yiɛ kee yo pe pan mna pe wie na, “Mni a e Nyiɛkpɔɔ katoo kre tnumu wa kamɛŋɛ hin?” A ndaa Levi leele pre, na mɛkɔmblɔ pre yeeri mu pan, mna ndru mu pe tnumu wru mu le pe kɛɛ.

12 Ŋga kra pan ma kre, Israel leele pre kro na ndru na paan na shɔlɔ nyjɛ praa yɔɔlɛ kɛ kɛ na nununu woni na paan yire ni, yire na simi fɔŋgɔ, na olive simi yire ni na teeri nyinyi yire nu. 13 A ndaa srawɔfun Shelemiah, na Zadok mbra nyinafun wre, na Levi ndro ŋmba praa yeeri Pedaiah wre wɔ, mna yirɛ tɛɛ haa nyinyi yire le pe kɛɛ, mna tia Zaccur biblɔ Hanan, ŋmba tolɛɛ na wi Mattaniah wre naa yaa pe na, ŋgi na hin? Ndaa dankna pe na. Pre praa yirɛ nyjɛ ni praa paan na pe wolo pre kaan yire yɔɔlɛ na pe kaan. 14 Ndaa Nyiɛkpɔɔ tali na, “Jande Nyiɛkpɔɔ, kee nyjɛ ni pini ŋga le mu ni sɔɔnri, mbe ma ti kee nyjɛ ni lɛɛ wɔ mu pe mu Suminyuŋgo wa kre, na tnumu nyjɛ pe fna mbra pini wa kre pe waara.”

15 Yire ble yire nu ndaa Judah bilɛ plɛ nya na pe simi yuwi ki fɛɛri ndoo Wuuble, a plɛ naa shɔlɔ, na simi gbɔ wee, na tinyi sɛnyi, na tuuro nyininyini poo na taari pe bubunlɔ na, na paan na yi prɛ Jerusalem na Wuuble. Ki tia ndaa pe jaari na pia na paan mbra yirɛ prɛ kre ble kre na. 16 Tyre kakpɔɔ kre leele mblɛ praa wa mu tni Jerusalem na pre naa paan na mbroe, na yirɛ nyininyini ni na prɛ Jerusalem, na Judah leele pre pan Wuuble. 17 Ni krɔ na kun na Judah loplombo pre ni, a ndaa pe yiɛ kee yo pe pan na, “Kre sisam kee ŋga e pini ŋga tia e Wuuble kre le fiɛn. 18 Yire kee nyjɛ ma e tolɛɛlɛ pre naa pini, a kra tia o Nyiɛkpɔɔ wre na o ndie tini, mna tia pra o kakpɔɔ ŋga ja kree? Kre e ndru na Wuuble kre le fiɛn, mbe u krɔ sisaa kre nyi mbe wa o na ŋgaa?”

19 Na nyiŋge we se mbe o Wuuble li kre, ki yilakɔŋgɔ nyu na, na nyimi to Jerusalem jlonwee nyu krɔɛ yire na to, mbe ni ti pe krɔɛ yire yii mbe kan, pia yi nyaa na mbe sɛ su na Wuuble kre we tro. Ndaa mi titi leele pre plɛ woni mbe pe yire jlonwee kre nyu na, imi kie pe mbe pia le na tuuro ni chia kre na Wuuble kre nu. 20 Jafa lifɛɛnlɛ mblɛ praa paan na yirɛ nyininyini prɛ pre na pan mu ŋunu Jerusalem mboo krɔ gbee nunu ndee shiin. 21 La, ndaa pe jaari mna yo pe na, “Mni a e na paan na ŋunu chia kre mboo krɔ hin? Na e waa pe ma na, mbe ti mbe pe e yii.” Mu yire kre ble kre pe nsraa paan Wuuble nu na. 22 Ndaa yo Levi leele pre pan na, pe paala pe mbe nɛɛrɛ laa peyɛ na, mbra jlonwee yire sri, imi kie pe mbe Wuuble kre na pini cheche.

Ni Nyiɛkpɔɔ, jande mu koroo kpɔɔ kre ndra na, nyu ni na kre kee ŋga na.

23 Kre nyjila kre nu ndaa Judah bilɛ pre plɛ nya na pe chiɛlɛ wru Ashdod, na Ammon, na Moab leele nu mu leŋge. 24 A pe biile pre yɔɔ naa Ashdod yolo, ndee yolo fɔnyi yuu Judah tra nu, a pe nsra ja na o yolo yuu. 25 Krɔ na ni kun, a ndaa pre bilɛ pre yeeri mna pe yiɛ kee yo pe pan, mna pe sun. Hali ndaa pe plɛ gbun, mna pe ndrɛ nyjure tini mu klɔ. A ndaa tia pra Nyiɛkpɔɔ da na pia ti mbe pe bibilɛ waŋgrɛ chiɛlɛ leŋge, ndee mbe pe bichiɛlɛ shɔ mbe pe bibilɛ ŋga mbe pe leŋge, a pre titi wa pe plɛ leŋge. 26 Kre leŋgeere ŋga ka ma Israel ŋunu Solomon na leŋge mna le sisam nu kree? Waŋgra ka ŋunu nsraa wa mna da na u ni. Nyiɛkpɔɔ na u kori, a wre Nyiɛkpɔɔ wre wra u pe ŋunu Israel tra nu, la, waŋgrɛ chiɛlɛ mblɛ wra wru mu leŋge pre pra u le sisam nu. 27 Kena ki n fna mbe o yire sisam kee nyjɛ loo e nu, na e ayɛte Nyiɛkpɔɔ wre na, mu sɛ na waŋgrɛ chiɛlɛ leŋgei na.

28 Srawɔfun lopom Eliashib biblɔ Joiada wre bibilɛ pre wa na sɛ Sanballat ŋmba wra yiri Beth-Horon na wre bichlɔ wru mu leŋge, ki tia ndaa u ni mu laa niyɛ na.

29 A ndaa Nyiɛkpɔɔ tali na u sɔɔnri na, pre leele mblɛ srawɔɔ tnumu kre, na nyu nunu ŋga wra pe na srawɔfɛɛnlɛ, na Levi leele pre ni kre tɔ nɛɛrɛ ni.

30 Ki tia ndaa paala pe mna srawɔfɛɛnlɛ pre, na Levi leele pre kro wɔ nɛɛrɛ nu, mna pe kro nyina pe tnumu peyɛ yɛ. 31 A ndaa pe nyina nyjila ŋga ni pie na paan na kejenyi ni, mbe pe yi tɛɛ mbra yurɛ sroo sra kre woni, mna pe nyina nyjila ŋga pie na pe shɔlɔ, na tinyi sɛnyi jle wee woni.

Ni Nyiɛkpɔɔ, jande, yire kee nyjɛ krɛrɛ sɔɔnri, mu ni dwan yi na.