8 Levi leele mblɛ pra ndru mu pan pre na lɛ, Jeshua, na Binnui, na Kadmiel, na Sherebiah, na Judah, na Mattaniah. Pre na pe yafɛɛnlɛ praa mboo ŋgaa mɛɛ kɔfɛɛnlɛ pre le. 9 Na pe mɛɛ yire koni, Bakbukiah, na Unni, praa shio pe pan.

10 Jeshua wra Joiakim se, a Joiakim na Eliashib se, a Eliashib na Joiada se, 11 a Joiada na Jonathan se, a Jonathan na Jaddua se.

12 Nyjila ŋga ni Joiakim na pe Srawɔfun lopom kre, na pre srawɔfɛɛnlɛ mblɛ lɛ pe kalonyi yire loplombo, Meraiah na wi Seraiah katoo kre lopom, a Hananiah na wi Jeremiah katoo lopom, 13 Meshullam na wi Ezra katoo lopom, a Jehohanan na wi Amariah katoo lopom, 14 Jonathan na wi Malluch katoo lopom, a Joseph na wi Shecaniah katoo lopom, 15 a Adna na wi Harim katoo lopom, a Helkai na wi Meraioth katoo kre lopom, 16 a Zechariah na wi Iddo katoo kre lopom, a Meshullam na wi Ginnethon katoo kre lopom, 17 a Zicri na wi Abijah katoo kre lopom, a Piltai na wi Miniamin na Moadiah katoo lopom, 18 a Shammua na wi Bilgah katoo kre lopom, a Jehonathan na wi Shemaiah katoo kre lopom, 19 a Mattenai na wi Joiarib katoo kre lopom, a Uzzi na wi Jedaiah katoo kre lopom, 20 Kallai na wi Sallu katoo kre lopom, Eber na wi Amok katoo kre lopom, 21 Hashabiah na wi Hilkiah katoo kre lopom, a Nethanel na wi Jedaiah katoo kre lopom.

22 Srawɔfun lopom Eliashib nyjila kre, pre Levi leele mblɛ na lɛ katoo loplombo, Joiada, na Johanan, na Jaddua, pre na srawɔfɛɛnlɛ pre krɛrɛ pra pe mɛɛ nyunɔ mu tɛɛ Persia ŋunu Darius nyjila. 23 Levi nɔɔ leele pre katoo loplombo pre, Eliashib nana Johanan wre kum kɔkro kre, pe nsra wa mɛɛ nyunɔi mu tɛɛ na. 24 Levi loplombo pre na lɛ Hashabiah, na Sherebiah, na Kadmiel biblɔ Jeshua, pre pra mɛkɔmblɔ pre yɔ shiin, a praa mboo ŋgaa mɛɛ yire koni, na plɛ koni, mbe plɛ na shio pe pan imi na Nyiɛkpɔɔ ndro Ŋunu David na yo pe pan kre.

25 Pre Suminyuŋgo kre shiefɛɛnlɛ mblɛ pre praa yirɛ tɛɛ haa nyinyi nyjɛ yiraa wa jlonwee nyu na yire sri, pre na lɛ Mattaniah, na Bakbukiah, na Obadiah, na Meshullam, na Talmon, na Akkub. 26 Pre leele mblɛ krɛrɛ Jeshua biblɔ Joiakim Jozadak nana wre nyjila na pee wa. A nyjila ŋga ni mi Nehemiah na pe abani lopom kre, na Ezra wi sɔfu, na Moses mbra nyinafun.

27 Ŋga pra paala pe mna Jerusalem mboo kre wru mbe le Nyiɛkpɔɔ kɛɛ kre, pra kɛ wa mna Levi leele mblɛ praa wa Judah tra nu kro yeeri mbe pe paan ya mbe pe mboo ŋgaa mɛɛ kɔ, mbe yambrawa nyaara, mbe saŋgo na juru gbun mbe ble kre li. 28-29 Na Levi mɛkɔmblɔ pree wa kabɛɛlɛ nyjɛ yira Jerusalem fɛ mu kun kre na, ki tia pra yiri wa mu pan, a pe plɛ na yiri kabɛɛlɛ nyjɛ pre titi na pɔ, a yira Netophah, na Beth-Gilgal, na Geba, na Azmaveth fɛ mu kun yire na mu pan. 30 Ŋga srawɔfɛɛnlɛ pre na Levi leele pre na paala pe mna nɛɛrɛ laa peyɛ na mu kɔ kre, a pra nɛɛrɛ laa leele pre, na jlonwee nyu krɔɛ yire, na mboo kre na paala kolo na.

31 Ndaa nduu na Judah loplombo pre ni mboo kre ndra na, a ndaa mɛkɔmblɔ nɛɛrɛ feko shiin le pe kɛɛ, pre pie na mboo ŋgaa mɛɛ koni mbe fɛ mbe kakpɔɔ kre kun.

Feko nunu we na tro mboo kre ndra na mbe yiɛ le kalie haa mbra shie Kafuŋgo Jlonwee kre haa. 32 Mbe Hoshaiah, na Judah loplombo pre yɔɔ taa pe kro, 33 pre na Azariah, na Ezra, na Meshullam, 34 na Judah, na Benjamin, na Shemaiah, na Jeremiah, 35 mbe srawɔfɛɛnlɛ pre plɛ na pe bnɔɛ foo mbe taa pe kro, pre na Jonathan biblɔ Zechariah, ŋmba tolɛɛlɛ lɛ Shemaiah, na Mattaniah, na Micaiah, na Zaccur, na Asaph, 36 na mblɛ pe yaa u na pre lɛ, Shemaiah, na Azarel, na Milalai, na Gilalai, na Maai, na Nethanel, na Judah, na Hanani, a pra mɛɛ kɔyirɛ nyjɛ yira pe na nyjɛ Ŋunu David naa gbuun yire, yɛ wru na gbuun mu taa pe kro. A mbra nyinafun Ezra na yiɛklu pe pan. 37 Ŋga pra da Blo Jlonwee kre na kre, a pra taan mu nduu yirɛ nyjɛ na pe ndru yire na mna sɛ David kakpɔɔ kre na, mna sɛ ŋunu katoo kre wa mu tro, mna sɛ su Nyumu Jlonwee ŋga kii wa na shie yila finhaa mboo kre lawee kre na.

38 Mɛkɔmblɔ feko shiinwo kre, pre na kna mu yiɛ tɛɛ kamɛŋɛ haa. A mi Nehemiah na taa pe kro, mi na leele pre yɔɔ ni, o na nyaari mu sɛ fnunu nyuŋgo gedeŋge kre wa mu tro, mna sɛ su Mboo vala wo kre na. 39 O na yiri wa mna sɛ Ephraim Jlonwee kre, na Jeshanah Jlonwee kre, na Mbro Jlonwee kre, Hananel Nyuŋgo Gedeŋge kre, na Lafaa Nyuŋgo Gedeŋge kre wa mu tro mna sɛ su Mbaala Jlonwee kre na. Ŋga o na da Shiefɛɛnlɛ Jlonwee kre na kre, a o na yire wa.

40 Ŋga mɛkɔmblɔ feko shiin wolo mblɛ praa mboo ŋgaa mɛɛ koni pre nyu na to kre, a pe kro na pan mu fni Suminyuŋgo wa, a mi na loplombo pre yɔɔ hamblɛ pre na pan wa na. 41 Wre na srawɔfɛɛnlɛ pre plɛ na lɛ, na pe bnɔɛ ni kɛɛ, pre na lɛ Eliakim, na Maaseiah, na Miniamin, na Micaiah, na Elioenai, na Zechariah, na Hananiah. 42 Pe mblɛ pra ya na lɛ, Maaseiah, na Shemaiah, na Eleazar, na Uzzi, na Jehohanan, na Malkijah, na Elam, na Ezer. Jezrahiah wra yiɛklu mɛkɔmblɔ pre pan. 43 Ki ble kre pra sra wɔ tataara, pe yiɛ na shɔ, ŋgi ndra na hin? Nyiɛkpɔɔ na tia pe yɛshɔɔrɔ na kpɔɔ ki ble kre. Chiɛlɛ na biile kro na yɛshɔɔrɔ li. Ki ble kre na mu yire haalee mu Jerusalem yɛshɔɔrɔ gblee ndru.

44 Ki ble kre pra leele wɔ, mna yirɛ nyjɛ leele pre woni na paan yire, na nyinyi nyjɛ nu pie yi tɛɛ kre le pe kɛɛ. Pre chɔɔ praa shɔlɔ jle, na tinyi sɛnyi jle, na see yirɛ, na pe yurɛ mblɛ praa yɔɔlɛ kɛ kɛ na nununu woni na paan na Nyiɛkpɔɔ kaan kre shio. Pre leele pre chɔɔ praa sroe nyjɛ Moses na yo na pra woni mbra Levi leele pre, na srawɔfɛɛnlɛ pre kaan yire shio. Judah leele pre kro yiɛ na shɔ tnumu nyjɛ srawɔfɛɛnlɛ na Levi leele pre naa tuni yire na. 45 Praa tnumu nyjɛ ki fna mbe praa tuni mbe Nyiɛkpɔɔ ŋga kre tuni, na nɛɛrɛ laari leele pre na, mbe pe jaa Nyiɛkpɔɔ sumi. A mɛkɔmblɔ pre, na Suminyuŋgo kre shiefɛɛnlɛ pre naa pe tnumu tuni imi na Ŋunu David, na u biblɔ Solomon na yo kre. 46 Hali mu yire Ŋunu David, na Asaph nyjila pra mɛkɔmblɔ yɛkulo wɔ, a praa mboo ŋgaa mɛɛ koni na sumi. 47 Kena nyjila ŋga ni Zerubbabel na mi naa pe le kre, Israel leele pre naa blenyini yirɛ nyjɛ ki fna mbe pe wɔ mbe mɛkɔmblɔ pre, na Suminyuŋgo kre shiefɛɛnlɛ, na Levi leele pre ŋga yire woni kama. Na yi pan mbe Levi leele pre Aaron nanae srawɔfɛɛnlɛ pre wee wɔ mbe pe ŋga.