Pra Esther Pe Ŋuchlɔ
2
Yire kee nyjɛ kɔkro, ŋga Ŋunu Xerxes krɔ na nyjii kre, wra tni mna kee ŋga Vashti na pe u na kre, na mbra nyjɛ wra le u na kre kee jawa. 2 Ki ble ka ŋunu loplombo mblɛ praa mbra u na pre plɛ na pan mu yo u pan mbo, “Tolɛɛ ti mbe o kila mbe bichabɛɛlɛ chichiele mblɛ pe n bilɛ chin cha, mbe paan mu ŋga. 3 Ndee na mu chaa mu jaa leele wɔ mu trɛ yire kro nu, mbe pe kila mbe chiɛlɛ mblɛ pe nyu, a pe n ta mu bilɛ chin tun cha, mbe pan na pe ni o kakpɔɔ Susa ŋga na mna, mbe sɛ pe tɛɛ chiɛlɛ katoo, mbe pe le Hegai ŋmba pe san, a wraa chiɛlɛ mblɛ pee wa ŋunu katoo wa le wre kɛɛ, mbe pe pe fa tuwe ndiom tɛɛn ni mbe ki ti pe nyu nyu mbe ya. 4 Na pe kɔ, kena mu bichabɛɛlɛ pre wa le mbe wɔ mbe u pe mu chɔ mbe tni Vashti titɛɛ.” A ŋunu na le na kre jawala kre nyu, ki tia wra taa ki na.5 Judae wo wa naa wa Susa na wa, u mɛɛ naa Mordecai, a wra yiri Benjamin jlom nu, a u lɛ mɛɛ na yi Jair, a u tolɛɛ na wi Shimei, a Shimei lɛ na wi Kish. 6 Ŋga ŋunu Nebuchadnezzar, ŋmba wra yiri Babylon na wre, na Judah ŋunu Jehoiachin, na u leele plɛ yii Jerusalem na kre, Mordecai na chaa leele mblɛ ni wra sɛ kre nu. 7 Mordecai na u nalɔ pɔ bichable wa pɔɔri, Hebrew yolo nu praa u yeeri Hadassah, a pra ndru na u yeeri Esther, bichable wre na nyu titi. Ŋga u lo na u lɛ na ku mu u ti kre, a Mordecai na u wru mu pe u pɔ.
8 Ŋga ŋunu na u mbra kre le kre, bichabɛɛlɛ tataara mblɛ ni pra pan Susa na kre, Esther na chaa pe nu. Pra pan na u ni chiɛlɛ katoo wa, mna pan mu u le Hegai, ŋmba wraa chiɛlɛ mblɛ praa wa ŋunu katoo wa le wre kɛɛ. 9 Esther kee na tna Hegai pan, a u kee na u yiɛ nyi. Ki tia wra u ŋga u tuwe ndiom tɛɛn yire nyaanyaa, mnaa u kaan sroe chichiele, mna u ŋga lawee chiriri chiɛlɛ katoo wa, mna bichabɛɛlɛ kɔɔnashin wɔ chiɛlɛ katoo wa, a praa u le.
10 Mordecai na Esther jaari na waa shia ti mbe pe chin na Judah ndro wi, ki tia u nsra tia pra ki chin. 11 Blenyini ŋga Mordecai we sɛ nyaari nyaari mbe tro chiɛlɛ katoo kre yiɛ mbe Esther dɔɔ ta na uu gbaŋmba.
12 Na bichabɛɛlɛ pre wa we sɛ sni ŋunu Xerxes pan kre, we tuwe ndiom tɛɛn weli yɛlɛ nyu tun mbe chiin sɛ wa, we kroboo fa nyiɛpɔ kɔɔnanu, mbe tuwe ndiom tɛɛn fa nyiɛpɔ kɔɔnanu. Na yire nyu waa to mbe u chiin sɛ sni ŋunu wre kro. 13 Na ki da na bichabɛɛlɛ pre wa we yili chiɛlɛ katoo wa mbe sɛ ŋunu katoo wa kre, yira ŋga u chaa mbe le uyɛ na kpan, kre ki fna mbe pe u ŋga. 14 We sɛ wa yilakɔŋgɔ, mbe yili wa bnimi mbe sɛ tni ŋunu bichilɛ katoo, mbe pe sɛ u le ŋmba u ŋunu bichilɛ le wre kɛɛ, wre ndro wre mɛɛ naa Shaashgaz, pra wre blɔ wre san a wraa pre le. Na ki pan ma, bichable wre wa ndru mbe sɛ sni ŋunu pan na, fɔna ŋunu wre titi we u mɛɛ yeeri mbe ti mbe pe u yeeri mbe u ŋga.
15 Esther rɛ, u nalɔ na wi Abihail, a Mordecai wra u pɔɔri mna u wru mu pe u pɔ. A ndro ŋmba we Esther nya kpan, wraa u kee chaa. Ŋga u nyjila na da mbe u sɛ sni ŋunu pan kre, yirɛ nyjɛ Hegai chiɛlɛ lefun wre na yo u pan na u le to, yire wra le uyɛ na. 16 Ŋga ŋunu Xerxes na jɔɔn kre li kre, u yɛlɛ kɔɔnashin wo na, ki nyiɛpɔ kɛ wo ŋga praa yeeri Tebeth kre nu pra pan na Esther ni ŋunu pan u katoo wa. 17 Ŋunu naa u chaa mu wɛ bichabɛɛlɛ pre kro na, a wra u yiɛ nyi kolo kro na mu wɛ pe hamblɛ pre kro na. A wra ŋuchlɔ ŋujuulee ŋga pe u leni kre wru mna Esther le, a wra tni ŋuchlɔ Vashti titɛɛ. 18 A ŋunu na kɛ wa mna u loplombo, na lekpɔɛ kro yeeri u trɛ yire kro nu mbe pe paan sukpɔɔ li mbe Esther le yɛnyiŋge. Ŋunu wre na ki ble kre pe wuuble u trɛ yire nu poŋgo, mna leele kɛ yirɛ imi na ki fna ŋunu ni.
Mordecai Na Ŋunu Ndra Lɔ
19 Ŋga pra bichabɛɛlɛ pre nyu ble shiinwo na kre, na Mordecai wa mu tni ŋunu katoo kre jlonwee nyu na wa. 20 Kre nyjila kre krɛrɛ na Esther n tia pe chin na Judae ndro wi imi na Mordecai na yo u pan kre, ŋgi na hin? Wraa lii Mordecai kee na, imi na nyjila ŋga ni wraa wa mu tni u jaara kre yi.
21 Nyjila ŋga ni Mordecai naa wa mu tni ŋunu katoo jlonwee nyu na wa kre, na ŋunu nyuŋgo nyu shiefɛɛnlɛ loplombo shiin mblɛ, praa yeeri Bigthana na Teresh pre krɔ kun na ŋunu ni, a pra jina to na pie u gbo. 22 A Mordecai na ki loo, mna sɛ ki bɔ ŋuchlɔ Esther pan, a wre na sɛ ŋunu wɔ ndie. 23 A pra leele wɔ, a pra kee kre dɔɔta mna nya na kee kre pe kpra, a kra tia pra sɛ bilɛ shiin pre le maŋa. A ŋunu na tia pra kre kee kre nyunɔ hlɛ nu mu tɛɛ.