Haman Na Jawala Le Mbe Judah Leele Gbo
3
Yire kee nyjɛ kɔkro kre Ŋunu Xerxes na blɔ wa yire mna u pe lekpɔɔ, mu wɛ loplombo hamblɛ pre na na kro, u mɛɛ naa Haman. Blɔ wre lɛ mɛɛ naa Hammedatha, a Agag ndro na wi. 2 Ŋunu na u sumifɛɛnlɛ pre kro yeeri u jlonwee nyu na wa mna yo pe pan na pra Haman kaan buuro, mbra kosie kani u yiɛ. A pe kro naa u pini ma, la, Mordecai rɛ, wre na ki je. 3 Ŋunu sumifɛɛnlɛ hamblɛ pre na Mordecai wie na yira ŋga ki tia u n na lii kee ŋga ŋunu yo kre na hin? 4 Blenyini ŋga pan praa u tali na u li ŋunu mbra kre na, a na pe ki yo wa ki loo, mbo, “Judah ndro wi mi, a mba ja mbe kosie kan Haman yiɛ.” Ki tia pra kee kre yo Haman pan, mbe le na Mordecai kee kre we jaa tnumu tun ree, ndee kia jaa tnumu tun.5 Ŋga Haman na nya na Mordecai n na kosie kani u yiɛ kre, u krɔ na kun na u ni kpɔɔ, a wra nyi uyɛ nu. 6 A ŋga Haman na loo na Judah ndro wi kre, Mordecai chiin ma wraa chaa mbe kla, la, wra u jawala pe na we Judae mblɛ pee wa Ŋunu Xerxes trɛ nu pre kro gbo.
7 Ŋga Ŋunu Xerxes na li yɛlɛ kɛmbɔshiin jɔɔn na kre, ki nyiɛpɔ ŋga kra yiɛ klu a praa ki yeeri Nisan kre, Haman na tia pra kɛɛn tɛɛ, pe yolo nu praa ki yeeri Pur, wra yi tɛɛ mbe nyjila chichie cha mbe ki tɛɛ mbe Judae pre gbo. Kɛɛn nyjɛ pra tɛɛ yire na nyiɛpɔ kɛmbɔshiin wo ŋga pe yeeri Adar kre wɔ, na kre ki nyu.
8 A Haman na sɛ yo ŋunu pan mbo, “Tolɛɛ, leele plɛ nyinii wa o tra ŋga nu, pe nyina tra kre nu poŋgo, mna mu tro kpan pe plɛɛ wa wa. A pe paala yili kiyɛ na o leele pre hamblɛ paala ni. A ŋga ki ya kuraa yi na pe n na lii o waŋgra ŋga mbra ka na, kena ki n fna mbe mu kaa li na pe ni. 9 Kena na ki tna ŋu ŋunu pan, hlɛ nyunɔ mu ti mbe pe pre leele pre gbo peii. Na mu ki pe ma kre, mbe mu ŋga swafiŋge swabie tataara mbe mu tɛɛ mbe waŋgra kre tnumu tun.”
10 A ŋunu na u feelee ŋga ni u yira tnɔ yi wɔ kɛ na mna Haman Agag ndro ŋmba lɛ na wi Hamedata, a wra pe Judae loŋgo wre ŋga ki yi. 11 A ŋunu wre na yo Haman pan mbo, “Swa kre ti, mu leele pre pe imi na mu chaa.”
12 Nyiɛpɔ jle kre ble kɛmbɔtaarɛ na Haman na ŋunu krachie pre yeeri, a pra pan mu fni, a wra tia pra ŋunu mɛɛ tɛɛ mu hlɛ nyunɔ mna sɛ waŋgra kre abani loplombo, na u ŋulo bɛɛlɛ, na pe loplombo kro ŋga. Pra hlɛ yire nyunɔ pe nyunɔmu nyini, na yolo nyininyini nyjɛ praa yuu tra kre nu kro nu. Mna ŋunu feelee ŋga ni u yirɛ tnɔ yi kan kan yi na. 13 Pra hlɛ yire wru mna le bitumblɔ mblɛ praa nyaa nyaa kɛɛ, a pra kila na yi ni tra kre nu, hlɛ yire lam kee na nyina na, Adar nyiɛpɔ kre ble kɛmbɔtaarɛ na, kre ble nunu kre na pe Judae leele pre kro gbo tra kre nu kro, loplombo na yirifumblɔ, chiɛlɛ na biile kro, pe pe gbo. Pia shia pe wa fooro le, pe pe gbo peii mbe pe yirɛ wru. 14 A hlɛ yire lam kee fna mbe pe yire lete na mbe yi tɔɔnri mbe ndro kro ki loo, mbra uyɛ kna mbra ble kre sri.
15 Imi na ŋunu na yo kre ndra na, ki tia pra hlɛ kre tɔɔnri pe kakpɔɔ Susa kre lete na, a bitumblɔ pre na fɛ nyaanyaa mna sɛ na hlɛ yire ni waŋgrɛ yire kro nu. A ŋunu na Haman na sɛ tni na pe simi gboo wejinyiŋge ni, a chia kre leele jawala na chaa poŋgo, a praa kawa na kee kre ni.