Mordecai Na Esther Tali Mbe U Ya Pe Na
4
Ŋga Mordecai na mandiɛ kre loo ma kre, a wra u dodonyi tini mu wla uyɛ na. Mna sɛ kumu yonyi wru mu tɔ, mu tɔɔnrɔ tɛɛ mu u ndra fa, mnaa nyɛni kpɔɔ na tro chia kre lete na, 2 mna sɛ ŋunu katoo kre jlonwee nyu na. La, u nsra le ki lam, ŋgi na hin? Na ki pan na ndro kumu yoŋgo tɔ, ki n fna mbe u le ŋunu katoo na ki ni. 3 Lawee ŋga nu ŋunu hlɛ yire na da kpan, nyɛnɛɛ na yi mu Judae kro ŋga. A pra ble fun, na nyɛni kpɔɔ na gble leni, a pe nɛɛrɛ na zaabɔtɔe yonyi tɔ tɔ, mnaa sni tɔɔnrɔ nu.4 Bichabɛɛlɛ mblɛ pe Esther sumi kre, na blɔ ŋmba pra san a wraa u le wre na sɛ Mordecai kee nyjɛ u pini yire bɔ Esther pan, kee kre na Esther jawala tɔɔra, a wra tia pra sɛ Mordecai ŋga yonyi mbe u paari mbe kumu yonyi yire laa mbe tɛɛ. A Mordecai na je u n sra yi shɔ. 5 A Esther na Hathach yeeri, Hathach na pe ŋunu katoo sumifɛɛnlɛ pre wa, a wre wraa Esther sumi. A Esther na u tun na u sɛ Mordecai wie ŋga ki u ta. 6 A Hathach na sɛ Mordecai pan ŋunu katoo jlonwee yiɛ na wa. 7 A Mordecai na kee nyjɛ yi pan kro yo u pan, na imi Haman yo na we ŋunu ŋga swa, mbe u Judae mblɛ pee wa tra kre nu kro gbo. 8 A wra hlɛ nyjɛ Haman na tia pra nyunɔ, a pe yi tɔɔnri Susa lete na kre ka wɔ mna u ŋga, mbe u sɛ Esther ŋga ki yi, mbe u chin imi Haman yo na we Judae kro kla.
A Mordecai na yo u pan na u sɛ Esther ŋga ki yi, mbe mandiɛ kre bɔ u pan chiriri, mbe u sɛ ki yo ŋunu pan mbe u pre Judae pre fooro le. 9 A Hathach na sɛ mandiɛ kre ni. 10 A Esther na ndru mu u tun na mandiɛ fɔŋgɔ ni mbe u ndruu sɛ yo Mordecai pan mbo, 11 “Ŋunu loplombo pre kro na leele mblɛ pee wa u tra nu kro chin na, blɔ ndee chlɔ ŋmba we le ŋunu katoo lam titi, mna u nyi kre, a ŋunu ma u u yeeri kre, kii wa o mbra nu na ki fna pe u fun gbo. La, na ŋunu waa u swanyiɛ kanyie nyini u fun na pia u gbo, kie pe nyiɛpɔ yi kre, ŋunu n ni yeeri na ni pan u jaara tun.”
12 Ŋga Mordecai na Esther kee kre nyu wɔɔ loo kre, a wra yo pe sɛ Esther jaari mbo, 13 “Ŋga mu pe Judah ndro mu wa ŋunu katoo ŋga, maa shia jawa na mu shɔ ki nu. 14 Na mu pieri a mu n paara kre nyjila ŋga nu, yafun wa we yiri haka mbe pan mbe o shɔ, la, ŋu rɛ, mu ku, mbe mu lɛ sele nɔɔ fun. A ŋmbi u chin hin? Aada kre kee ŋga ki tia pe mu pe ŋuchlɔ kre?” 15 A Esther na ndru mu tia pra pan mu yo Mordecai pan mbo, 16 “Sɛ Judae mblɛ pee wa Susa na kro yeeri, mbe pe fni titɛɛ mbe e blefun mbe nyiɛtali mbe ni ŋga. Yaa shia li, ndee mbe gbɔ ble taarɛ lafo na ble. A mi na ni bichabɛɛlɛ mblɛ pe ni sumi kre we pe ma na. Kre kɔkro mbe sɛ ŋunu pan, la, ki mbra taan ya, nde mbe sɛ, na mbe ku kuraa ni ku.” 17 A Mordecai na yili wa mna sɛ kee ŋga Esther na yo u pe yire kro pe.