5
Ŋga pra blefun kre, ki ble taarɛ wo na, Esther na uyɛ san na ŋuchlɔ yirɛ ni, mna sɛ yire ŋunu katoo lam wa, na ŋunu wa mu tni u ŋujɔɔn na ŋunu katoo kagbala kpɔɔ wa, katoo lam titi wa, mu yiɛ kan jlonwee nyu kre na. 2 Ŋga ŋunu na Esther nya wa kre, u yiɛ na shɔ u na. A ŋunu na u swanyiɛ kanyie kre nyini u na, a Esther na flo mu da u na, mna sɛ kɛ taa ki nyu na. 3 A ŋunu na kna mu Esther wie mbo, “Ŋuchlɔ Esther, yira ŋgi yi hin? Yira ŋga mu chaa kpan, yo ni pan mbe ni mu ŋga ki yi, hali na ni ŋunumu ŋga yɔɔ mu chaa yo mbe mu ŋga ki yi.”4 Esther na yo u pan mbo, “Tolɛɛ, na ki tna mu pan, ni chaa mbe ŋu na Haman pan mbe sukpɔɔ ŋga mbe pe li ni lawee aŋga ble ŋga.”
5 A ŋunu na tia pra Haman yeeri na u pan nyaanyaa, mbe pe sɛ Esther lawee mbe pe sɛ li, a Haman na pan a pra sɛ kee ŋga Esther chaa kre pe. 6 Ŋga pra tni na simi gboo kre, a ŋunu na Esther wie na mbo, “Yira ŋgi mu chaa hin? Ki yo ni pan mbe ni mu ŋga ki yi, hali na ni ŋunumu ŋga ni lii ŋga yɔɔ mu ni wie kuraa kre mbe mu ŋga ki yi.”
7-8 A Esther na yo u pan mbo, “Tolɛɛ, na mu yo mu ŋga ni chaa pe mbe ni ŋga kre, kena ni chaa mbe ŋu na Haman ndru mbe paan sukpɔɔ ŋga mbe pe li ni pan mna baŋga, kre mbe yira ŋga ni chaa kre yo mu pan.”
Haman Chaa Mbe Mordecai Gbo
9 Ŋga Haman na yili Esther pan wa kre, na u yiɛshɔ, a gbun nyjii u na. Ŋga wraa yilii ŋunu katoo wa kre, wra Mordecai nya jlonwee nyu na wa, a u nsra yiri mu yire sholo mu u ŋga buuro, kra tia Haman krɔ na kun na u ni kpɔɔ, a wra nyi uyɛ nu. 10 La, Haman na frɔ ta mna tro mu sɛ u katoo. Ŋga wra sɛ katoo kre, wra kɛ wa mu u nɔɔlɔ yeeri, mna u chɔ Zeresh yeeri mna pan wa na. 11 Haman na paara mu uyɛ kpɔɔ leele pre pan, imi wra uyɛ ta mu da, na imi na u biile nɛɛ, a ŋunu u pe lekpɔɔ, a u kee shian mu wɛ ŋunu loplombo hamblɛ pre na. 12 A Haman na ndru mu yo mbo, “Ŋga ki ya yi na, Ŋuchlɔ Esther kɛ wa mu wre na ŋunu yeeri a pe sɛ chaa mu li aŋga, a u ndru mu yo u pan na u sɛ li wa baŋga. 13 La, yire kee nyjɛ krɛrɛ nu kre, kee ŋga ki ni yiɛ je yi na, ni Judae ndro Mordecai nya na uu wa mu tni ŋunu katoo kre jlonwee nyu na.”
14 A u chɔ na u nɔɔlɔ pre na yo u pan mbo, “Ti mbe pe kaan kan mbe ki gedem pe fiiti fuloe taarɛ na kɛmbɔkunɔ. Kena baŋga bnimi mu ŋunu tali mbe u ti mbe pe Mordecai le maŋa ki na, mbe ki ti mbe mu yɛshɔɔrɔ tɛɛ mbe ŋu na ŋunu sɛ sro kre li Esther lawee.”
Haman na le na pe u ŋga jawala chichie, a wra tia pra sɛ kaan kre kan.