Ŋunu Wre Na Mordecai Le Yɛnyiŋge
6
Ki ble kre blee ŋunu na sni mu ŋunu mu pra, a wra tia pra sɛ u ŋunumu nyjila kee nyjɛ pe nyunɔ mu le hlɛ nu wru mu pan mbe yi tɔɔnri mbe u loo. 2 Kra pan na pra tɔɔnri mu sɛ yili kee ŋga Mordecai na sɛ yo ŋunu pan nyjila ŋga ni Bigthana, na Teresh na jina to mbe ŋunu gbo kre na, pra pre bilɛ shiin pre san a praa ŋunu nyinyi nyu sri. 3 A ŋunu na kna mu wie mbo, “Ŋga Mordecai na kre kee ŋga pe kre, chichie fɔtɔɔrɔ ŋgi o na u ŋga hin?” A u sumifɛɛnlɛ pre na yo mbo, “U n sra fɔtɔɔrɔ ka ta.” 4 A ŋunu na kna mbo, “Ndro ŋmbi wi ŋunu katoo lam wa ŋga hin?” Kre nyjila kre na Haman pan mbe paan yo ŋunu pan mbe u ti pe Mordecai le maŋa, kaan ŋga wre titi Haman kan kre na. 5 A ŋunu sumifɛɛnlɛ pre na kna mbo, “Haman pan na mu chaa mbe nya.” A ŋunu na kna mbo, “U yeeri mbe u pan.” 6 A Haman na le ŋunu kro, a ŋunu na yo u pan mbo, “Ndro waa wa a u kee wa ni gbun na, a ndaa chaa mbe u le yɛnyiŋge. Yira ŋgi mu jawa na ki fna ni pe mbe ufun ŋga hin?” A Haman na yo u jawala nu mbo, ni chin na mi ŋunu chaa mbe le kre yɛnyiŋge ŋga. 7 A wra yo ŋunu wre pan mbo, Ndro ŋmba kee kii wa mu gbun na a mna chaa mbe u le yɛnyiŋge kre, 8 ti mbe pe pan na ŋunumu dodoŋgi titnɔŋɔ ŋga mu da mu le, na soo ŋmba na mu da mu tni ni, mbe pe u san na lebiile soo san yirɛ ni, 9 mbe mu ti mu loplombo titie pre wa pan mbe ndro wre fun le dodoŋgi kre, mbe u ndro soo wre na, mbe mu lopom wre yiɛklu u pan, mbe pe tro chia lete na, mbe lopom ŋmba we yiɛklu u pan wre na gble kpɔɔ mbra yuu mbo, “E le, ndro ŋmba ŋunu chaa mbe le yɛnyiŋge kre, fɔtɔɔrɔ ŋga u u kaan yi kre.”10 A ŋunu na kna mu yo Haman pan mbo, “Pe nyaanyaa mu ŋunumu dodoŋgi titnɔŋɔ kre, na soo wre wru, mu sɛ Judae wo Mordecai wre pan ni katoo jlonwee nyu na wa, mu gbeŋmba na mu kee nyjɛ mu yo mu pe yire kro pe.” 11 A Haman na sɛ dodonyi na soo wre wru mna pan mna Mordecai le dodoŋgi kre. A Mordecai na nduu mu tni soo wre na, a Haman na yiɛklu u pan na gble kpɔɔ na yuu mbo, “E le, kee ŋga ŋunu chaa mbe ndro ŋmba u le yɛnyiŋge pe yi kre.”
12 Ŋga pra kila mu kɔ kre, a Mordecai na ndru mu sɛ tni ŋunu katoo jlonwee nyu na wa, a Haman na nyifɛɛrɛ tɛɛ mna ndra tɔ mna sɛ u katoo nyaanyaa. 13 A wra sɛ kee ŋga ki pan kro bɔ u chɔ Zeresh na u nɔɔlɔ pan peii. A u paaranyinafɛɛnlɛ na u chɔ na yo u pan mbo, “Mu jaŋga kre chaa mbe kna mbe sɛ Mordecai pan, a u pe Judah ndro, ki tia ma u ja kolo ka na, imi na kie pe kpan mu to u yiɛ.” 14 Ŋga praa wa mu na paara kre to, a ŋunu katoo sumifɛɛnlɛ pre na da wa, mbe paan Haman wru nyaanyaa mbe sɛ Esther lawee mbe wre na ŋunu sɛ sukpɔɔ li.