Pra Haman Gbo
7
Ŋunu na Haman na sɛ Esther lawee lihaa. 2 Ŋga pra tni na simi gboo bleshiin wo kre na kre, a ŋunu na Esther wie na mbo, “Ŋuchlɔ Esther, yira ŋgi mu chaa hin? Ki yo ni pan mbe ni mu ŋga ki yi, hali na ni ŋunumu ŋga yɔɔ mu chaa kuraa mbe mu ŋga ki yi.” 3 A Ŋuchlɔ Esther na kna mbo, “Tolɛɛ, na ki tna mu pan, jande ni kee ŋga mbe mu wie ŋga pe mu ni ŋga. Ŋga ni chaa yi na mu ti mbe ni ŋmaa ta, mbe ni leele ŋmaa ta na. 4 Pe mi na ni leele pre kro prɛ mbe pe o gbo, na kra pe na prɛ pie o prɛ mbe o na pe tinlɛ kuraa kre, mba na nyu kun, la, chaa pe chaa mbe o kla mbe o dɔɔya.”5 A Ŋunu Xerxes na Ŋuchlɔ Esther wie mbo, “Leele mblɛ lɛ hin? Leele mblɛ pe gbun ta mbe kre kee ŋga nyini pe hin?” 6 A Esther na kna mbo, “O loŋgo sisampefun Haman wi.” A Haman na tni na ŋunu na ŋuchlɔ yiɛ le na seeri. 7 A krɔ na ŋunu kun kpɔɔ a wra nyi uyɛ nu, mna taan mu yiri mu simi yire ti nyuŋgo wa, mna sɛ yire kagbala kpɔɔ wa. Ŋga Haman na nya na ŋunu krɔ kun, a wraa chaa mbe u ndie tini kre, a wra yiri mu yire Esther yiɛ na u ŋmaa tali, wra chin na ŋunu wa u ti. 8 Ŋga ŋumu na ndru mu le nyuŋgo wa kre, na Haman wa mu juule Esther jɔɔn na, na u tali mbe u u fooro le. A ŋunu na gble fɔɔri mu le mbo, “Haman pan mbe ŋuchlɔ cha ni yiɛ na mi titi katoo.” Ŋga ŋunu nyu na to to, na ŋga ŋunu katoo sumifɛɛnlɛ pre Haman yiɛ pɔ mu tɔ, kii nunu.
9 Bawa ŋunu sumifɛɛnlɛ pre ŋmba praa yeeri Harbona na kna mbo, “Tolɛɛ, Haman wre titi na kaan kan u katoo mbɛɛ na mbe Mordecai ŋmba wra ŋunu ndra lɔ, a pe nsra u gbo kre hlu ki na mbra u gbo, kaan kre gedem naa fiiti fuloe taarɛ na kɛmbɔkunɔ.” A ŋunu na kna mbo, “E sɛ Haman hlu kaan kre na.” 10 A pra sɛ Haman hlu kaan ŋga wra kan na Mordecai sri kre na, a ŋunu krɔ na chin mu nyjii u na.