3 Esther na ndru mna sɛ paara ŋunu wre pan, mna kosie kan u yiɛ mna nyɛni, mna u tali na u tro kolo ka na mbe Haman, Agag ndro wre sisam kolo ŋga u wru na Judae ni kre nyu gbo. 4 A ŋunu wre na u swanyiɛ kanyie kre nyini Esther na, a Esther na yiri mu yire mna yo mbo, 5 “Tolɛɛ, na mu ni kee chaa, a kee ŋga mbe yo ŋga tna, mu fraka mu pan kre, kena jande, ti mbe pe hlɛ nyunɔ mbe mbra ŋga Haman le na pe Judae kro gbo mu tra ŋga nu kre kun. 6 Mba jaa tni mbra le mbe kre kee ŋga nyini paan tuu ni leele na, ndee mbe paan ni sele leele mblɛ gbo.”

7 A Ŋunu Xerxes na yo Ŋuchlɔ Esther, na Mordecai pan mbo, “E le, ni tia pe Haman hlu kaan na mu u gbo, jawala sisaa ŋga wra ta Judae ni kre ndra na. A ni u yirɛ wru mu ŋu Esther ŋga. 8 Kena yire titi e hlɛ nyunɔ na ni mɛɛ ni imi na e chaa, mbe ki tro Judae pre haa. E ni feelee ŋga ni tɛɛ na yirɛ tnɔ yi kre tɛɛ e ki nyu yii, ŋgi na hin? Kee ŋga pie nyunɔ na ŋunu mɛɛ ni a pe u feelee kan ki na kpan, ndro wa jaa ki kna.”

9 Mordecai na kɛ wa mna ŋunu krachie pre yeeri, a pra pan mu fni nyiɛpɔ taarɛwo ŋga praa yeeri Sivan kre ble fulo na taarɛ na. A Mordecai na paara a pra u kee yire nyunɔ hlɛ nu, mna sɛ Judae na abani loplombo, na waŋgra loplombo mblɛ praa wa trɛ lafaa na fulo na kɔɔnashin nyjɛ yiraa wa mu yire India tra nu mu sɛ su Ethiopia tra na pre ŋga. Pra hlɛ yire nyunɔ waŋgrɛ yire kro yolo nyininyini nyjɛ praa yuu nu, na imi na praa nyunɔi nu, na Judae yolo na pe nyunɔmu nu. 10 Ŋunu Xerxes mɛɛ ni Mordecai na hlɛ kre nyunɔ, mna ŋunu feelee ŋga ni u yirɛ tnɔ yi tɛɛ mu ki nyu yii. A pra ŋunu soolo mblɛ praa nyaanyaa na pe nduufɛɛnlɛ wɔ mbe pe hlɛ yire kɛ mbe tro. 11 Kee nyjɛ yiraa wa hlɛ kre nu na yi na, ŋunu yo na Judae pe peyɛ kna waŋgra kre nu kro mbra sri, na ki waa pan na waŋgra kre leele plɛ paan mbe wi na pe ni, pre na pe chiɛlɛ na pe biile ni kre, kena pe kolo ŋga mbe pe wi na pre leele pre ni mbe pe kla, na pe ja, pe pe gbo peii mbe pe yirɛ wru mbe ta. 12 Hlɛ kre fna mbe tnumu tun nyiɛpɔ kɛmbɔshiinwo ŋga pe yeeri Adar kre ble kɛmbɔtaarɛ wo na trɛ nyjɛ yiraa wa ŋunu wre jaara kro nu. Kre ble kre pra tɛɛ mbe Judae pre gbo peii kre. 13 Hlɛ kre lam kee fna mbe pe ki kpali, mbe ki pe mbra lawee kro nu tra kre nu, mbe ki ti mna Judae nyi kpan, mbe pe jaa peyɛ kna mbe wi na pe loŋgoolo pre ni. 14 Soolo nduufɛɛnlɛ pre na yire ŋunu nyu kee na mna peyɛ kna mu u soolo pre wru mna fɛ nyaanyaa mna sɛ hlɛ yire ni lawee kro nu, pra kee kre kpali Susa pe kakpɔɔ kre na na.

15 Ŋga Mordecai na yili ŋunu katoo wa na pe u le lebiile dodoŋgi ŋga ki pe mbruku, a finyi chaa ki nu, dodoŋgi kre ka naa wa mu wo ki na badaaŋga mna nyina duu, a pra u le swanyiɛ ŋujuulee chichie ka. A leele mblɛ praa wa Susa lete na pre naa yɛshɔɔrɔ gble leni. 16 Ŋga kra pan ma kre, Judae pre praa wa wa pre yiɛ na shɔ, a wejiŋge na nyjii pe na, a kra pe pe na pe wi mu yili. 17 Lawee ŋga nu pra sɛ na hlɛ yire ka ni, a pra ki tɔɔnri kpan, Judae leele mblɛ praa wa wa kro yiɛ na shɔ kpɔɔ, a praa ble kpɔɔ lii, na peyɛ nyu lii. Kre kee kre na tia leele plɛ na peyɛ kaari Judae wolo jaŋga na, ŋgi na hin? Judae pre fiɛrɛ na wo pe na.