Esther 9

Judae Na Pe Loŋgoolo Pre Kla

Pe nyiɛpɔ kɛmbɔshiinwo ŋga praa yeeri Adar kre ble kɛmbɔtaarɛ wo kre na to, a imi na ŋunu mbra ŋga wra le kre na nyina kre, kre ble kre Judae loŋgoolo pre naa chaa mbe pe gbo. La, Judae pre na kna mu pe loŋgoolo pre ja. 2 Judae pre na peyɛ nyu ble ble chiɛ nyjɛ na pra nyi kro na Ŋunu Xerxes trɛ yire nu kro, mbe wi na leele mblɛ pie na pe chaa mbe kla kro ni. Ŋga kra pan ma kre, leele kro na pe fiɛ, a ndro nsra n wa mbe jaa yire pe yiɛ. 3 Abani loplombo, na tra kre loplombo, na pe mblɛ praa tnumu tuni ŋunu wre pan pre kro na yiri mu yire Judae pre kro. Ŋgi na hin? Praa Mordecai fiɛ. 4 Mordecai na pe lekpɔɔ ŋunu katoo wa, a kra tia u mɛɛ na kpali trɛ yire nu kro, a kra tia wraa jaŋga taa na yaa nyjila kro nu. 5 Judae pre na pe loŋgoolo pre kro gbo na brɔfiɛn yiɛ shiin ni.

6 Pe kakpɔɔ titi Susa kre na wa kre, Judae pre na gbo leele lafɛɛ kunɔ. 7-10 Leelee mblɛ pra gbo pre Haman Hamedata pɔ wre bibilɛ kɛ na chaa pe nu, Haman na pe Judae pre loŋgo. U biile pre na lɛ Parshandatha, na Dalphon, na Aspatha, na Poratha, na Adalia, na Aridatha, na Parmashta, na Arisai, na Aridai, na Vaizatha, la, ŋga pra pe gbo mu kɔ kre, pe nsra pe yirɛ wru. 11 Ki ble kre lam leele mblɛ pra gbo Susa na wa kro pra sɛ ki yo ŋunu wre pan. 12 A ŋunu wre na ŋuchlɔ Esther wie mbo, “Susa chia ŋga chiin na, Judae pre leele lafɛɛ kunɔ gbo, a Haman bibilɛ kɛ pre chaa, kena kee ŋgi pe pe ni trɛ yire hɛnyi nu hin? A ŋgi mu chaa ni pe na hin? Ki yo mbe ni ki pe mu pan. Kee ŋga ki mu shian kpan yo ni pan, mbe ki pe mbe mu ŋga.”

13 A Esther na kna mbo, “Tolɛɛ, na ki tna mu pan, ti mbe Judae mblɛ pee wa Susa na mna kre kee ŋga pe pe aŋga ŋga ka pe na baŋga, mbe Haman biile kɛ pre gboolo hlu kɛɛn na.” 14 A ŋunu na kolo ŋga na pe ki pe, a pra kre mbra kre kpali Susa na. A pra Haman biile kɛ pre gboolo hlu kɛɛn na lete na. 15 Adar nyiɛpɔ kre ble kɛmbɔjijirɛwo kre na kre, Judae mblɛ praa wa Susa na pre na peyɛ nyu ble, mna gbo leele lafɛɛ taarɛ chia kre na mu ya, la, pe nsra kɛ taa pe yaka na.

16 Judae hamblɛ mblɛ praa wa ŋunu wre trɛ yire nu kro na peyɛ nyu ble ble mna wi mu peyɛ shɔ. Pra wi mna pe loŋgoolo pre leele kagbenyi fuloe taarɛ na kɛmbɔkunɔ gbo. La, pe nsra ndro yaka wru. 17 Adar nyiɛpɔ kre ble kɛmbɔtaarɛ wo kre na pra pre leele pre gbo. La, pe n na yaka pe ble kɛmbɔjijirɛwo kre na. Pra wuu ki ble kre, mna ble kpɔɔ li, mna peyɛ yiɛ shɔ. 18 La, Judae mblɛ praa wa Susa na pre rɛ, nyiɛpɔ kre ble kɛmbɔkunɔ wo kre nu pre na wuu. Ŋgi na hin? Ŋga pra pe loŋgoolo gbo gbo ble kɛmbɔtaarɛ na kɛmbɔjijirɛwo kre na kre kra tia. 19 Kre ki tia Judae mblɛ pee wa Seechiɛ na pre Adar nyiɛpɔ kre ble kɛmbɔjijirɛwo pe pe yɛshɔɔrɔ wuu ble, kre nu pe peyɛ nyu lii, na peyɛ kee sro.

Purim Ble Lie

20 Mordecai na yire kee nyjɛ yira pe yire kro nyunɔ mu tɛɛ. Mna hlɛ nyunɔ mna sɛ Judae mblɛ praa wa nyjɔ na haalee Ŋunu Xerxes trɛ yire nu kre kro ŋga. 21 A Mordecai na yo pe pan na pe Adar nyiɛpɔ kre ble kɛmbɔjijirɛ na kɛmbɔkunɔ ble yire pe pe wuu ble yɛlɛ nyini. 22 Yire ble yire nu Judae na peyɛ ta pe loŋgoolo kɛɛ. Kre nyiɛpɔ kre nu, pe nyibinyiɛ, na pe yɛjeere na kaari yɛshɔɔrɔ, na yɛliire ble. Pra yo pe pan na pe ble yire pe yɛshɔɔrɔ na yɛliire ble, mbra peyɛ kee sro, mbra shianfɛɛnlɛ kee. 23 Judae pre na li kee nyjɛ Mordecai na nyunɔ mna sɛ pe ŋga yire kro na, a yire ble shiin yire lie na kaari pe yɛlɛ nyini paala pe pan.

24 Hamedata pɔ ŋmba praa yeeri Haman, a wra pe Agag ndro wre, ŋmba wra pe Judae loŋgo mnaa pe chaa mbe gbo wre na tia pra kɛɛn tɛɛ, kre praa yeeri, Purim. Kre kɛɛn tɛɛ kre na pra yire mna ble ta mbe Judae pre kla, mbra pe nɔɔ pɔ peii. 25 La, Esther na sɛ ki yo ŋunu pan, a ŋunu na tia pra hlɛ nyunɔ, a kra yire ki na a Haman jawala fɔɔn ŋga wra le na Judae ni kre na ndru mu kna mu tuu u na, a pra wre na u biile hlu kɛɛn na, 26 Mordecai na yo u hlɛ kre nu na, Judae pre fna mbra Purim ble yire lii yɛlɛ nyini, kee nyjɛ yira pe da kre ndra na. Kɛɛn tɛɛ pe yeeri Judae yolo nu “Purim.” Mordecai hlɛ kre wra nyunɔ na kee nyjɛ yira pe kre na. 27 Judae pre na ki pe mbra peyɛ pan, mna ki le mu tɛɛ pe nanae, na mblɛ pie peyɛ kaari Judae kro pan na, yɛlɛ nyini na yire ble shiin yire da, ki fna mbe pe yi li imi na Mordecai ki yo mu tɛɛ kre. 28 Mu yire fuŋga na shie, Judae sele yire kro fna mbe Purim ble shiin yire sɔɔnri mbra yi lii.

29 A Ŋuchlɔ Esther Abihail pɔ wre na Mordecai na hlɛ nyunɔ shiinwo na, mbe ki ti Purim mbra hlɛ ŋga Mordecai na klu mu nyunɔ kre jaŋga ta. 30 Pra hlɛ kre nyunɔ mna sɛ Judae kro ŋga, a pra sɛ na hlɛ yire yɛ ni lawee lafaa na fulo na kɔɔnashin nyjɛ yiraa wa Ŋunu Xerxes tra nu kre kro na, wejinyiŋge na gbeŋmbaa lee kee naa wa hlɛ kre nu na. 31 A wra pe nyina na ki fna mbe pe pe kro leele nyina, mbe praa Purim ble yire lii nyjila ŋga ki fna nu, imi na pe tia pe blefɔnyi, na pe nyɛnɛɛ ble pe mbra kre, pe yire ble yire pe ma. Pan Mordecai na Ŋuchlɔ Esther na yo pe pe. 32 Esther kee nyjɛ wra nyunɔ mbe ki ti mbe Purim mbra kre yire kre, hlɛ nu wra yi nyunɔ mu tɛɛ.