Ezra 10

Israel Leele Pre Na Pe Sisam Yo

Nyjila ŋga nu Ezra naa nyiɛtali, na leele pre sisam yuu, na nyɛni na gbila tra Nyiɛkpɔɔ Suminyuŋgo kre yiɛ wa kre, Israel leele pre tataara, bilɛ, na chiɛlɛ na pe biile, na pan mu u fɛ mu kun, a pe kro na nyɛni chichie. 2 A Jehiel biblɔ Shecaniah, ŋmba na wi Elam nanae pre wa, na yo Ezra pan mbo, “Wre o ndikana pe o Nyiɛkpɔɔ wre na, mu sɛ waŋgrɛ nyjɛ leele pe o fɛ mu kun yire chiɛlɛ wru mu leŋge. Hali yire kee nyjɛ krɛrɛ kɔkro ni kre, dankna wa o pan tɛ. 3 Kena e ti mbe wre na Nyiɛkpɔɔ wre nyu nunu pe, mbe o yire ki na mbe pre chiɛlɛ pre, na pe biile pre ni mbe pe sɛ. Ŋu wi o tafun, kena jawala ŋga ŋu na leele mblɛ pe Nyiɛkpɔɔ mbra yire fiɛ kre we o ŋga kro, oo li Nyiɛkpɔɔ mbra yire na. 4 Kena yiri sholo, kre kee ŋga wa mu kɛɛ, a oo wa mbe ya mu na, kena gbun ta mu ki pe ma.”

5 A Ezra na taan mu yiri, mna srawɔfɛɛnlɛ pre yɛkulo pre, na Levi leele pre, na leele pre yeeri, mna tia pra pan mu da na pie li jawala ŋga Shecaniah ŋga kre na, a pe kro na daŋga kre da. 6 A Ezra na yili Nyiɛkpɔɔ Suminyuŋgo wa mna sɛ Eliashib biblɔ Jehohanan wre nyuŋgo. Ŋga wraa wa wa kre krɛrɛ na wa sro le nyuu, a wa nyumu gbɔ, ŋgi na hin? Na uu wa na nyɛni imi na leele pre pra yiri Babylon na mu pan pre na ndikana pe Nyiɛkpɔɔ na kre ndra na.

7 Loplombo pre na tia pra kila mu mandiɛ kre kpali mu tro Judah na Jerusalem na, na leele mblɛ pra yiri Babylon na mu pan pre kro pe pan mbe fni Jerusalem na. 8 Ndro ŋmba u n shia pan ble taarɛ wo na kre, pie u yirɛ kro shɔ u pan, a loplombo pre kee ŋga pra yo mu ya na yi na, ŋmba u n shia pan kpan, pia u le na leele mblɛ pe yiri Babylon tra nu mu pan pre wa wi.

9 Ŋga ble taarɛ yire na da, na kre yi nyiɛpɔ kɔɔnanyjirɛ wo kre ble fulo, a Judah, na Benjamin bilɛ pre kro pan mu fni Jerusalem na Nyiɛkpɔɔ Suminyuŋgo lawee vankam kre nu. Ki ble kre na pe nyibinyiɛ ble, a na nyiɛ paan, a kra tia leele pre naa seeri.

10 A srawɔfun Ezra na yiri mna paara pe pan mbo, “E ndikana pe mu waŋgrɛ chiɛlɛ wru mu leŋge, mu tia ka ya Israel leele pimi na. 11 Kena e nyu nyaa e e sisam yo e tolɛɛlɛ Nyiɛkpɔɔ wre pan fuŋgaami, e yo u pan na ee li u kee na, mbe eyɛ kun mbe laa leele mblɛ pe e fɛ mu kun pre na, mbe laa waŋgrɛ chiɛlɛ mblɛ e wru mu leŋge pre na.”

12 A leele pre kro na mana kpɔɔ tɛɛ mna yo mbo, “Kee ŋga mu yo ŋga fraka, ki fna o li ki na.” 13 A leele pre na kna na yuu mbo, “Leele pre nɛɛ mna, a wre mblɛ o yire fimi na, a nyiɛ na woni o na. A waa jaa kre kee ŋga pe ble nunu ndee shiin ni. Ŋgi na hin? O tataara kre sisam ŋga pimi li. 14 Kena ki fna mbe loplombo pre tni Jerusalem na mna, mbe ble le leele mblɛ pe waŋgrɛ chiɛlɛ wru mu leŋge pre, na pe chiɛ yire loplombo, na pe kprakunfɛɛnlɛ pre pan, mbe pe yire kalɛɛ yire le mbe yo, mbe sɛ su na Nyiɛkpɔɔ krɔ ŋga ki kun na o ni kpɔɔ kee ŋga na kre we nyjii.” 15 Asahel biblɔ Jonathan wre, na Tikvah biblɔ Jahzeiah wre, na Levi leele Meshullam, na Shabbethai pre na kre kee kre je.

16 Leele pre hamblɛ pre kro na taa jawala ŋga pra ŋga kre na. A srawɔfun Ezra na jlom loplombo plɛ wɔ, pra leele nununu wɔ imi pra pe yɔɔlɛ sele sele yire nu, a pra pe kro mɛɛ nyunɔ mu le hlɛ nu. Nyiɛpɔ kɛ wo kre ble ŋga kra yiɛ klu kre nu pra tni na pe kee yire le na yuu. 17 Pra bilɛ mblɛ pra waŋgrɛ chiɛlɛ wru mu leŋge pre kaalɛɛ yire yo mu kɔ nyiɛpɔ jle kre ble ŋga kra yiɛklu na.

18 Srawɔfɛɛnlɛ pre nanae mblɛ pra waŋgrɛ chiɛlɛ pre plɛ leŋge na lɛ kre.

Pe mblɛ pra yiri Jozadak biblɔ Jeshua wre, na u lɛbiile pre nɔɔ leele nu na lɛ, Maaseiah, na Eliezer, na Jarib, na Gedaliah. 19 Pe kro na li ki na, mna nyu yo na pie pe waŋgrɛ chiɛlɛ pre je. Ŋga pra pimi li kre ndra na, pe kro na mbapilɛ nununu wɔ, mna tɛɛ mu pe pimi sra wɔ.

20 Mblɛ pra yiri Immer nanae nu na lɛ, Hanani, na Zebadiah.

21 Mblɛ pra yiri Harim nanae nu na lɛ, Maaseiah, na Elijah, na Shemaiah, na Jehiel, na Uzziah.

22 Mblɛ pra yiri Pashhur nanae nu na lɛ, Elioenai, na Maaseiah, na Ishmael, na Nethanel, na Jozabad, na Elasah.

23 Mblɛ pra yiri Levi nanae na lɛ, Jozabad, na Shimei, na Kelaiah, wre chɔɔ praa yeeri Kelita kre, na Pethahiah, na Judah, na Eliezer.

24 A ŋmba wra yiri mɛkɔmblɔ pre nu na wi, Eliashib.

Mblɛ pra yiri Suminyuŋgo shiefɛɛnlɛ pre nu na lɛ, Shallum, na Telem, na Uri.

25 Pe mblɛ pra yiri Israel leele pre hamblɛ nu na lɛ kre,

Parosh nanae na lɛ, Ramiah, na Izziah, na Malkijah, na Mijamin, na Eleazar, na Malkijah, na Benaiah.

26 Elam nanae na lɛ, Mattaniah, na Zechariah, na Jehiel, na Abdi, na Jeremoth, na Elijah.

27 Zattu nanae na lɛ, Elioenai, na Eliashib, na Mattaniah, na Jeremoth, na Zabad, na Aziza.

28 Bebai nanae na lɛ, Jehohanan, na Hananiah, na Zabbai, na Athlai.

29 Bani nanae na lɛ, Meshullam, na Malluch, na Adaiah, na Jashub, na Sheal, na Jeremoth.

30 Pahath-Moab nanae na lɛ, Adna, na Kelal, na Benaiah, na Maaseiah, na Mattaniah, na Bezalel, na Binnui, na Manasseh.

31-32 Harim nanae na lɛ, Eliezer, na Ishijah, na Malkijah, na Shemaiah, na Shimeon, na Benjamin, na Malluch, na Shemariah.

33 Hashum nanae na lɛ, Mattenai, na Mattattah, na Zabad, na Eliphelet, na Jeremai, na Manasseh, na Shimei.

34-37 Bani nanae na lɛ, Maadai, na Amram, na Uel, na Benaiah, na Bedeiah, na Keluhi, na Vaniah, na Meremoth, na Eliashib, na Mattaniah, na Mattenai, na Jaasu.

38-42 Binnui nanae na lɛ, Shimei, na Shelemiah, na Nathan, na Adaiah, na Macnadebai, na Shashai, na Sharai, na Azarel, na Shelemiah, na Shemariah, na Shallum, na Amariah, na Joseph.

43 Nebo nanae na lɛ, Jeiel, na Mattithiah, na Zabad, na Zebina, na Jaddai, na Joel, na Benaiah.

44 Pre bilɛ mblɛ kro na waŋgrɛ chiɛlɛ pre plɛ wru mu leŋge, ŋga kra pan ma kre, pra chiɛlɛ pre, na pe biile kro je, a pra sɛ.