Ezra Fumblɔ Leŋgeere Je
9
Yire kee nyjɛ kɔkro kre, Israel loplombo pre, na pan mna yo ni pan mbo, “Israel leele pre, na srawɔfɛɛnlɛ pre, na Levi leele pre n ja mu peyɛ kun mu laa pe tnifɛɛnlɛ mblɛ pe pe fɛ mu kun pre afunyi kee nyjɛ pe pini, a yi pe na nyjɛ Canaan leele, na Hittite leele, na Perizzite leele, na Jebusite leele, na Ammon leele, na Moab leele, na Egypt leele, na Amora leele naa pini yire yi. 2 Pe sɛ pe tnifɛɛnlɛ pre chiɛlɛ pre plɛ wru mu leŋge, mu tia pe bibilɛ pe plɛ wru mu leŋge na. Ki tia Nyiɛkpɔɔ leele mblɛ pe pe cheche pre, na leele mblɛ pe pe fɛ mu kun pre chaa. Israel yɛkulo pre, na loplombo pre pe ndikana pe mu yiɛklu na yire kee nyjɛ pini.”3 Ŋga ndaa kre kee ŋga loo kre, a ndaa ni dodonyi lam na fimi wo tini mu wla niyɛ na, mna ni ndra nyjure, na ni nyutanyooro tini mu klɔ, mna tni tra na fooro lii. 4 Ndaa wa mu tni wa na fooro lii, a yilakɔŋgɔ nyu sra wɔ nyjila kre na da, a leele na chin mu pan mu ni fɛ mu kun, pre leele mblɛ, praa Nyiɛkpɔɔ fiɛ kee ŋga wra yo mu wru Israel leele mblɛ pra yiri Babylon tra nu mu pan pre sisam haa.
5 Ŋga yilakɔŋgɔ sra wɔ nyjila na da kre, ndaa yiri lawee ŋga nu ndaa nyi mu tni na fooro lii kre nu, na ni dodonyi wlɛɛ yire ni, a ndaa kosie kan, mna kɛnyi yire nyjeeri ni Tafun Nyiɛkpɔɔ pan, 6 mna nyiɛ tali na,
“Ni Nyiɛkpɔɔ, nyifɛɛrɛ ni gbo titi na mbe yiɛ yire mbe mu le. O sisam nɛɛ, a na o yi ble titɛɛ yi gedem we wɛ o na, hali yie da nyiɛ na. 7 Mu yire o tolɛɛlɛ nyjila, mu pan mu su aŋga na, o kro pimi kpɔɔ li mu yiɛ. O sisam ndra na, wre na o ŋunu, na o srawɔfɛɛnlɛ, kro to waŋgrɛ ŋulo kɛɛ, a pe o plɛ gbo brɔfiɛn yiɛshiin ni, mu o yirɛ foolo, mu o hamblɛ yii mu sɛ na o ni, a ki o gbo nyifɛɛrɛ, imi na o ki nyaa ŋga. 8 La, fuŋgaami ŋga rɛ, kie pe nyjila chiɛri yi ŋga, o Tafun Nyiɛkpɔɔ wre nyu o na, mu tia o plɛ ŋmaa li. A u tia o lawee ta mu tni u lawee cheche kre nu, a ki tia o na nyaa chasi fuŋga. Nyiɛkpɔɔ mu tia o wuu o tnibim nu chiɛri. 9 Tinlɛ na lɛ wre, la, o Nyiɛkpɔɔ wre n o ti o tnibim nu. U nyu o na Persia ŋunu yiɛ na, mu tia o kolo ta mu sɛ o Nyiɛkpɔɔ Suminyuŋgo ŋga ki ja kre gbeele mu sin, a u kɛ tɔ o na Judah na Jerusalem tra nu.
10 Nyiɛkpɔɔ, kee ŋgi oo jaa yo fuŋgaami hin? Yire kee nyjɛ krɛrɛ kɔkro ni, o je mu ndikana pe mu mbra, 11 nyjɛ mna yire mu sumifɛɛnlɛ mblɛ na lɛ mu keenyanyofɛɛnlɛ pre na mna o ŋga yire na. Pra yo o pan na, ‘Tra ŋga o shie mbe sɛ wru mbe tni kre, sisam na afunyi kee bribri ki leele naa pini, a ki tra kre kla poŋgo. 12 Kena yaa shia e bichiɛlɛ wru mbe pe bibilɛ ŋga mbe pe leŋge, ndee mbe pe bichiɛlɛ shɔ mbe e bibilɛ ŋga mbe pe leŋge. A yire na pre waa shia nyu nunu pe kee ka na, ndee mbe nɔɔlɔ wru na pe ni fio. Na e ja mu li kre kee kre na, kie ti mbe e faŋga ta, mbe tra kre yirɛ tɛɛn ta mbe li, mbe e biile yiri mbe ki ta krɔ yira nyjila kro nu.’a 13 O kefuɛn nyjɛ o pe, na pimi kpɔɔ ŋga o li ki tia yire kaalɛɛ nyjɛ o da. O nya na ki fna mbe mna o ndie tini kpɔɔ, a nde mu n ki pe ma, a mu tia o plɛ ŋmaa li. 14 Kena yira ŋgi ki ti mbe o ndru mbe ndikana pe mu mbra yire na, mbe wre na pre leele mblɛ pe yire afunyi kee nyjɛ nyini pini ŋga oyɛ wru mbe leŋge hin? Na ki pan ma kie ti mbe mu krɔ kun kpɔɔ, mbe mu o kla kro, ndro nunu chom kuraa wa ŋmaa ta o nu. 15 O Tafun Israel Nyiɛkpɔɔ, mu fraka. A ŋu mu ya o na mu tia o plɛ ŋmaa li. A o ndru mu pimi li mu yiɛ na, a ki tia o wa wa jaa paan yire mu yiɛ.”