2 Ŋmba wra yiri Phinehas nanae nu na wi Gershom, a ŋmba wra yiri Ithamar nanae nu na wi Daniel.

Ŋmba wra yiri Ŋunu David nanae nu na wi Hattush, 3 a u lɛ mɛɛ naa Shecaniah.

A ŋmba wra yiri Parosh nanae nu na wi Zechariah, a mblɛ mɛɛ pra nyunɔ mu ya u na naa bilɛ lafaa na fuloe shiin na kɛ.

4 Ŋmba wra yiri Pahath-Moab nanae nu na wi Eliehoenai, Zerahiah biblɔ na wi, a leele mblɛ pra ya u na naa bilɛ lafɛɛ shiin.

5 Ŋmba wra yiri Zattu nanae nu na wi Shecaniah, Jahaziel biblɔ na wi, a mblɛ pra ya u na naa bilɛ lafɛɛ taarɛ.

6 Ŋmba wra yiri Adin nanae nu na wi Ebed, Jonathan biblɔ na wi, a mblɛ pra ya u na naa bilɛ fuloe shiin na kɛ.

7 Ŋmba wra yiri Elam nanae nu na wi Jeshaiah, Athaliah biblɔ na wi, a mblɛ pra ya u na naa fuloe taarɛ na kɛ.

8 Ŋmba wra yiri Shephatiah nanae nu na wi Zebadiah, Michael biblɔ na wi, a mblɛ pra ya u na naa fuloe jijirɛ.

9 Ŋmba wra yiri Joab nanae nu na wi Obadiah, Jehiel biblɔ na wi, a mblɛ pra ya u na naa bilɛ lafɛɛ shiin na kɛmbɔkɔɔnatarɛ.

10 Ŋmba wra yiri Bani nanae nu na wi Shelomith, Josiphiah biblɔ na wi, mblɛ pra ya u na naa bilɛ lafaa na fuloe taarɛ.

11 Ŋmba wra yiri Bebai nanae nu na wi Zechariah, Bebai biblɔ na wi, mblɛ pra ya u na naa fulo na kɔɔnatarɛ.

12 Ŋmba wra yiri Azgad nanae nu na wi Johanan, Hakkatan biblɔ na wi, a mblɛ pra ya u na naa bilɛ lafaa na kɛ.

13 Mblɛ pra yiri Adonikam nanae nu mna kro tɔ mu pan na lɛ Eliphelet, na Jeuel, na Shemaiah, mblɛ pra ya pe na naa bilɛ fuloe taarɛ.

14 Mblɛ pra yiri Bigvai nanae nu na lɛ, Uthai, na Zaccur, mblɛ pra ya pe na naa bilɛ fuloe taarɛ na kɛ.

15 Ndaa sɛ leele pre kro ble lɔɔ ŋga kraa fuu na shie chia ŋga praa yeeri Ahava na kre lawee, a o na tni wa ble taarɛ. Bawa ndaa leele pre, na srawɔfɛɛnlɛ pre le, a ni nsra Levi leele pre plɛ nya pe nu. 16 A ndaa kɛ wa mna Eliezer, na Ariel, na Shemaiah, na Elnathan, na Jarib, na Elnathan, na Nathan, na Zechariah, na Meshullam mblɛ na lɛ loplombo, na nyinafɛɛnlɛ shiin Joiarib, na Elnathan yeeri a pra pan. 17 A ndaa pe tun Iddo ŋmba wraa chia Casiphia le wre, na u wolo Suminyuŋgo tnumu tunfɛɛnlɛ pre pan, na pe leele wɔ mbe pe paan tnumu tun Nyiɛkpɔɔ Suminyuŋgo wa.

18 Ŋga Nyiɛkpɔɔ dumiɛ naa wa o na kre ndra na, a pra Sherebiah wɔ a wra pan, wra kɛnyu tunumu chin, a wra yiri Jacob biblɔ Levi biblɔ Mahli wre nanae nu, u sele leele mblɛ pra ya u na naa kɛmbɔkɔɔnatarɛ. 19 Hashabiah, na Jeshaiah mblɛ pra yiri Merari nanae nu pre, na pe sele leele bilɛ fulo pra ya pe na mna pan. 20 Ŋga praa paan kre pra pan na Suminyuŋgo kre tnumu tunfɛɛnlɛ lafɛɛ shiin na fulo ni. Pre krɛrɛ Ŋunu David, na u loplombo pra pe tolɛɛlɛ wɔ fa, a praa yaa Levi leele pre na. Ki tia pe kro mɛɛ naa wa hlɛ nu.

21 Ahava lɔɔ kre mbɛɛ na wa ndaa tia o kro na ble fun, imi kie pe mbe o oyɛ nyjii o Nyiɛkpɔɔ wre yiɛ, mbe u tali mbe u ya wre na o biile na, mbe sɛ na wre na o tuuro ni soo. 22 Nyifɛɛrɛ naa ni kuu na mbe yo ŋunu wre pan na u ŋunɔwifɛɛnlɛ, na soo nduufɛɛnlɛ wɔ mbe pe ya o na mbe o shɔ loŋgoolo kɛɛ kolo, ŋgi na hin? Na o klu mu yo u pan na, “Lewo ŋmba u Nyiɛkpɔɔ sumi kpan, u kɛɛ wa ufun na, a leele mblɛ pe u je kre u krɔ yii na pe ni kpɔɔ.” 23 Kena ŋga o na ble kre fun mna o Nyiɛkpɔɔ wre tali kre kee ŋga na kre, wra o nyiɛtalaa loo.

24 A ndaa srawɔfɛɛnlɛ mblɛ na lɛ yɛkulo pre kɛmbɔshiin wɔ, mna ya Sherebiah, na Hashabiah, na pe wolo kɛ plɛ na. 25 A ndaa swafiŋge, na swanyiɛ, na yirɛ bɛɛlɛ nyjɛ ŋunu, na u paaranyinafɛɛnlɛ, na u loplombo, na Israel leele pre na wɔ mbe pe sɛ yi tɛɛ mbe Suminyuŋgo kre tnumu tun yire kra mna pe ŋga.

26 Swafiŋge ŋga ndaa kra mna pe ŋga kre snamu na da tons fulo na kunɔ, swafinyi yirɛ bɛɛlɛ yire naa lafaa, a yi snamu na da tons jijirɛ, a swanyiɛ kre snamu na da tons jijirɛ, 27 na swanyiɛ kotie fulo nyjɛ snamu yira da kradnɛ kɛmbɔkɔɔnanyjirɛ.

Pra kotie shiin pe swafre ni, a yi ndrɔ na da na swanyiɛ titi wee ni, a ndaa yi wru mu ya pe pan.

28 A ndaa yo pe pan na, “Yire titi, na yirɛ nyjɛ kro pe cheche Nyiɛkpɔɔ pan, swafiŋge, na swanyiɛ yire kro, leele pre chaara srayirɛ nyjɛ pe wɔ mu e tolɛɛlɛ Tafun Nyiɛkpɔɔ wre ŋga yi. 29 Kena e yi le chichie mbe sɛ su na ee le na yi ni Jerusalem na, mbe sɛ yi kra Nyiɛkpɔɔ Suminyuŋgo kre yirɛ tɛɛ haa wa srawɔfɛɛnlɛ yɛkulo pre, na Levi leele pre, na Israel jlom yire loplombo pre yiɛ na.” 30 Srawɔfɛɛnlɛ pre, na Levi leele pre na swafiŋge, na swanyiɛ, na yirɛ bɛɛlɛ nyjɛ pra kra yire wru, mna sɛ na yi ni Jerusalem na, mna sɛ yi tɛɛ o Nyiɛkpɔɔ Suminyuŋgo wa.

31 Nyiɛpɔ jlewo kre ble kɛmbɔshiinwo na, kre o na yiri Ahava lɔɔ kre mbɛɛ na mnaa shie Jerusalem na. O Nyiɛkpɔɔ wre naa wa o kro, mna kɛ tɔ o na mu yili o loŋgoolo, na juolo mblɛ pie na o kun kolo pre kɛɛ. 32 Ŋga o na le Jerusalem na kre, a o na wuu ble taarɛ.

33 Ble jijirɛwo na, a o na sɛ Suminyuŋgo wa, mna sɛ swafiŋge, na swanyiɛ, na yirɛ bɛɛlɛ yire kra, mna yi le Uriah biblɔ srawɔfun Meremoth wre kɛɛ. Wre na Phinehas biblɔ Eleazar wre, na Levi leele pre plɛ, pre na lɛ Jeshua biblɔ Jozabad, na Binnui biblɔ Noadiah. 34 O na yirɛ yire kro tɔɔnri, mna yi kra, a pra yi nyu nyunɔ, mna yi shɔ mu tɛɛ.

35 A leele pre mblɛ pra yiri Babylon tra nu mu pan pre na sɛ yurɛ sroo sra wɔ mu Israel Nyiɛkpɔɔ wre ŋga. Pra nablɛm kɛmbɔshiin tɛɛ mna sra wɔ mu Israel leele pre kro ŋga, pre na mbapilɛ fuloe jijirɛ na kɛmbɔkɔɔnanu, na mbapɔɛlɛɛ bilɛ fuloe taarɛ na kɛmbɔkɔɔnashin ni, pra kapilɛ kɛmbɔshiin tɛɛ mna pe sisam sra wɔ. Yurɛ mblɛ krɛrɛ yurɛ sroo sra pra wɔ na pe ni.

36 A pra ŋunu mbra nyjɛ wra le yire hlɛ wɔ mna lebiile loplombo, na abani loplombo mblɛ praa wa Euphrates lɔɔ kre yila tohaa lawee kre nu pre ŋga. Ki tia pra ya o na kolo kro na, a o na ja na tnumu tuni Suminyuŋgo wa.