Wre Ezra ŋmba na pe nyinafun, a wra Moses mbra nyjɛ o Tafun Nyiɛkpɔɔ wre na u ŋga yire lam chin titi. Ŋga o Tafun Nyiɛkpɔɔ wre kɛ naa wa Ezra na kre ndra na, wra tia ŋunu wre na u ŋga yirɛ nyjɛ wra u wie kro.

7 Israel leele pre plɛ, na srawɔfɛɛnlɛ, na Levi leele, na mɛkɔmblɔ, na jlonwee nyu shiefɛɛnlɛ, na Suminyuŋgo kre tnumu tunfɛɛnlɛ pre plɛ na pan Jerusalem na, kre nyjila kre na Ŋunu Artaxerxes li yɛlɛ kɔɔnashin jɔɔn na. 8 Kre yɛlɛ kre nyiɛpɔ kunɔ wo kre nu Ezra na le Jerusalem na. 9 Nyiɛpɔ jlewo kre ble ŋga kra yiɛklu na, kre nu wra yili Babylon tra nu, mna pan mu le Jerusalem na nyiɛpɔ kunɔwo kre ble ŋga ki yiɛklu na, ŋgi na hin? Nyiɛkpɔɔ dumiɛ naa wa u na. 10 Ezra tnimu nu kro, Nyiɛkpɔɔ mbra yire wraa twan, na lii yi na, mnaa Israel leele pre nyina yi yi.

11 Srawɔfun na wi Ezra, a nyinafun na wi na, a wra mbra, na kee nyjɛ o Tafun Nyiɛkpɔɔ na Israel leele pre ŋga yire chin, mnaa leele nyina mbra yire. Ki ble ka Ŋunu Artaxerxes na hlɛ nyunɔ mna sɛ u ŋga mbo, 12 “Mi ŋulo kro Ŋunu Artaxerxes pan hlɛ ŋga yiri, na shie srawɔfun Ezra ŋmba u nyjeeri Nyiɛkpɔɔ wre mbra yire nyina wre pan. Mi ni mu shaari. 13 Mi ni mbra le na, Israel leele mblɛ pee wa ni ŋunumu ŋga nu kro, pe srawɔfɛɛnlɛ, na Levi leele pre kro, na wa chaa mbe taa mu na mbe sɛ Jerusalem na kre, koloo wa, ufun wre we jaa sɛ. 14 Mi na ni paaranyinafɛɛnlɛ kɔɔnashin pre o mu ŋga kolo na mu sɛ Jerusalem, na Judah tra nu mbe sɛ le, na leele pre lii mu Nyiɛkpɔɔ wre mbra nyjɛ mu kɛɛ yire na. 15 Na mu shie, swanyiɛ, na swafiŋge nyjɛ mi na ni paaranyinafɛɛnlɛ lɛɛ wɔ mu Israel Nyiɛkpɔɔ ŋmba tnihaa kii wa Jerusalem na wre ŋga yire wru mu sɛ. 16 Yire na swanyiɛ, na swafiŋge nyjɛ pie e ŋga Babylon tra nu, na yirɛ nyjɛ Israel leele pre, na srawɔfɛɛnlɛ pre we wɔ mbe pe sɛ tɛɛ mbe Suminyuŋgo kre tnumu tun Jerusalem na yire kro, e sɛ na yi ni. 17 E le na ee swa yire tɛɛ mbe nablɛm, na mbapilɛ, na mbapɔɛlɛɛ bilɛ, na shɔlɔ, na simi sra wɔ wee lɔ, e sɛ yi tɛɛ e sra wɔ sragbunu kre na Nyiɛkpɔɔ Suminyuŋgo wa Jerusalem na. 18 Na swanyiɛ, na swafiŋge kre ka waa kro, ee jaa ki tɛɛ mbe kee ŋga e Nyiɛkpɔɔ wre chaa pe. 19 Yirɛ nyjɛ pe le e kɛɛ yire kro, e Nyiɛkpɔɔ ŋmba Jerusalem na wre ŋga yi yi kro, mbe pe yi tɛɛ mbe u sumi u Suminyuŋgo wa. 20 Yira ŋga kie e shian Suminyuŋgo kre tnumu haa kro, pie swa wɔ lebiile swa tɛɛ haa wa mbe e ŋga, mbe e tɛɛ mbe ki lɔ.

21 Ni mbra le swa tɛɛfɛɛnlɛ mblɛ pee wa Euphrates lɔɔ kre yila tohaa tra nu pre pan na, pe le na pie ŋu srawɔfun Ezra ŋmba wi Nyiɛkpɔɔ ŋmba uu wa nyjeeri mbra nyinafun wre ŋga yira ŋga mu wie kro. 22 Koloo wa na pie mu ŋga mbe ki da swafiŋge ŋga snam ki da kradnɛ kagbenyi kɔɔnashin na lafɛɛ kunɔ, na shɔlɔ nyjɛ ni pe paanu pini yire taakpɔɛ lafɛɛ kunɔ, na simi gbɔ wee galɔm lafɛɛ kunu na fuloe shiin na kɛ, na olive simi galɔm lafɛɛ kunɔ na fuloe shiin na kɛ, mbe e ŋga weŋge ŋga ee na chaa kpan. 23 Ni yo na pe le na pie e ŋga yirɛ nyjɛ Nyiɛkpɔɔ ŋmba uu wa nyjeeri wre we shian mbe pe tɛɛ mbe u Suminyuŋgo kre tnumu tun kro nyaanyaa, mbe ki ti u krɔ wa kun na mi na ni bibilɛ ni. 24 Ni yo na pe le na ndro waashia tɔɔ ka shɔ srawɔfɛɛnlɛ, ndee Levi ndro, ndee mɛkɔmblɔ, ndee lawee shiefɛɛnlɛ, ndee tnumutunfɛɛnlɛ, ndee ndro ŋmba u Suminyuŋgo kre tnumu tuni kro pan.

25 Ŋu Ezra, yire kachindɛ ŋga mu Nyiɛkpɔɔ mu ŋga kre na, mu kalalifɛɛnlɛ, na kprakunfɛɛnlɛ wɔ mbe pe le na kpra we tnumu tun leele mblɛ pee wa Euphrates lɔɔ kre yila tohaa lawee yire nu, pe fna mbe mu Nyiɛkpɔɔ wre mbra yire chin. A mblɛ pe n mbra yire chin kre, mbe mu pe nyina. 26 Ndro ŋmba u n li mu Nyiɛkpɔɔ wre mbra yire, na ŋunu mbra nyjɛ u le yire na kpan, ki fna mbe pe u gbo, ndee mbe u ndie tini, ndee mbe u yirɛ kro shɔ u pan, ndee mbe u kun lɔɔ, ndee mbe u le nyuŋgo.”

27 Ezra na yo mbo, “E ti mbe o o Tafun Nyiɛkpɔɔ, o tolɛɛlɛ Nyiɛkpɔɔ wre ŋga mɛɛ, wre u tia ŋunu wre u Suminyuŋgo ŋga Jerusalem na kre ŋga buuro kre kolo ŋga na. 28 A wre Nyiɛkpɔɔ u nyu ni na, ŋunu wre na u paaranyinafɛɛnlɛ, na u loplombo titie pre yiɛ. Ŋgi ndra na hin? U jaŋga naa wa ni kro, kre ki tia ndaa gbun ta, mna Israel loplombo pre yiɛklu mna pan na pe ni Jerusalem na.”