Ŋunu Darius Na Mbra Le
6
Ŋunu Darius na tia pra sɛ le lebiile fakee hlɛ tɛɛhɛɛ nyjɛ yiraa wa Babylon tra nu yire nu. 2 Ŋga pra da Ecbatana kakpɔɔ ŋga kii wa Media tra nu kre, bawa pra yurɔ hlɛ ka nya, na pe kee ka nyunɔ ki na. 3 Kee ŋga pra nyunɔ yi na. Yɛlɛ ŋga na Ŋunu Cyrus na jɔɔn li kre, wra mbra le mu wru Nyiɛkpɔɔ Suminyuŋgo ŋga kii wa Jerusalem na kre haa mbo, “E ti mbe pe Nyiɛkpɔɔ Suminyuŋgo kre gbeele mbe sin, mbe praa sra woni wa. Ki fna mbe ki gedem pe fiiti fuloe jijirɛ na kɛ, mbe ki valam pe fiiti fuloe jijirɛ na kɛ. 4 Ki fna mbe pe dnɛ badɛnyi tɛɛ mbe ki sin mbe taala gbee taarɛ, mbe chin mbe kɛɛn taa ki na, mbe sɛ su ki ndra na. A lebiile katoo swa kre ka ni pie ki fɔlɔ kro tɔ. 5 A ŋga ki taa yi na, swanyiɛ, na swafiŋge yirɛ nyjɛ Ŋunu Nebuchadnezzar na koli Suminyuŋgo wa Jerusalem na, mna pan na yi ni Babylon na yire fna mbe pe ndru mbe sɛ yi tɛɛ yi lawee Nyiɛkpɔɔ Suminyuŋgo wa Jerusalem na.”Ŋunu Darius Na Kolo Ŋga Na Pe Tnumu Kre Tun
6 Kena ŋu Tattenai abani lopom ŋmba muu wa Euphrates lɔɔ kre yila tohaa wa, na Shethar-Bozenai, na loplombo mblɛ ee wa tra kre nu wa kre kro, e laa pe na mbe pe tnumu kre tun. 7 E pe ŋga kolo mbe pe Nyiɛkpɔɔ Suminyuŋgo kre tnumu tun. E ti mbe Judae abani lopom wre, na Judae loplombo pre Nyiɛkpɔɔ Suminyuŋgo kre gbeele mbe sin ki titɛɛ wa. 8 A kee ŋga ni yuu e pan mbe e pe mbe pre Judae loplombo pre ŋga mbe pe tɛɛ mbe Nyiɛkpɔɔ Suminyuŋgo kre sin yi ŋga. Fɔlɔ ŋga pie gbun kro, ki fna mbe e swa cha mbe yili lebiile swa ŋga e taa tɔɔ ŋga pe toni Euphrates lɔɔ kre yilatohaa tra nu kre nu, mbe fɔlɔ kre tɔ pei mbe pe ŋga, mbe ki tnumu kre wa yire kolo. 9 E pe ŋga napɔɛlɛɛ bilɛ, na mbapilɛ, na mbapɔɛlɛɛ bilɛ mblɛ ni pie tɛɛ mbe yurɛ sroo sra wɔ mbe Nyiɛkpɔɔ ŋmba uu wa nyjeeri wre ŋga, yire na shɔlɔ nyjɛ ni pe paanu mimi pini, na weŋge, na simi gbɔwo, na olive simi nyjɛ yie srawɔfɛɛnlɛ pre shian Jerusalem na kro, e na pe kaan yi yi blenyini. 10 Imi kie pe mbe pe yi ta mbe sra ŋga ki tna Nyiɛkpɔɔ pan wɔ mbe u ŋga, mbe praa nyiɛtali mbra ŋunu, na u bibilɛ kaan mbe ki ti pe dwamu ta. 11 Ni yuu e pan na, na ndro waa ndikana pe mbra ŋga ni le ŋga na kre, pie u nyuŋgo ndra kaan laa, mbe ki nyu fre, mbe ki tɛɛ mbe u su, mbe pe u katoo kre ja, mbe bawa kaari kafuŋgo. 12 Nyiɛkpɔɔ ŋmba wra yo na u mɛɛ ki tni Jerusalem na wre, ŋunu, ndee ndro ŋmba we yiri mbe kre mbra ŋga taan, ndee mbra chaa mbe kre Suminyuŋgo ŋga kla kpan, we u kɔ mbe wa. Mi Ŋunu Darius ni kre mbra ŋga le. A ndro kro fna mbe mbra kre le mbe li ki na.
Pe Suminyuŋgo Kre Sin Mu Kɔ
13 Ŋunu Darius mbra kre wra le kre ndra na, kra tia Tattenai, na Shethar-Bozenai, na pe wolo loplombo pre kro na li mbra kre na imi na ki fna. 14 Ŋga kra pan ma kre, Judae loplombo pre na kolo ta na pe Suminyuŋgo kre tnumu tuni, a Nyiɛkpɔɔ keenyanyofɛɛnlɛ Haggai, na Iddo nana Zechariah na Nyiɛkpɔɔ kee tɛɛ na pe leni gbeŋmbaa. Pra Suminyuŋgo kre sin mna kɔ imi na Israel Nyiɛkpɔɔ wre na ki yo kre, a mbra nyjɛ Persia ŋulo Cyrus, na Darius, na Artaxerxes na le kre saara na, pra ja mna ki kɔ. 15 Ŋga Darius na ŋunumu li kre, ki yɛlɛ kɔɔnanu wo kre na, Adar nyiɛpɔ kre ble taarɛwo na, kre pra Suminyuŋgo kre sin mu kɔ.
16 A Israel leele pre, na pe srawɔfɛɛnlɛ, na Levi leele pre na leele mblɛ pra yiri Babylon tra nu mu pan pre, na paala pe mna Suminyuŋgo kre wru mu le Nyiɛkpɔɔ kɛɛ, mna yɛshɔɔrɔ kpɔɔ li. 17 Pra nablɛm lafaa, na mbapilɛ lafɛɛ shiin, na mbapɔɛlɛɛ bilɛ lafɛɛ jijirɛ tɛɛ mna sra wɔ, mna kapilɛ kɛmbɔshiin tɛɛ mna Israel leele pre sisam sra wɔ, kapilɛ pre na yire mna Israel jlom kɛmbɔshiin yire ŋga. 18 A pra Srawɔfɛɛnlɛ pre, na Levi leele pre nyina pe tnumu Suminyuŋgo wa Jerusalem na, imi na pra pe yɔɔlɛ fekofeko kre, imi na Moses na ki nyunɔ mu tɛɛ kre.
Klɛntro Ble Yire
19 Nyiɛpɔ jlewo kre ble kɛmbɔjijirɛ na, kre leele mblɛ pra yiri Babylon tra nu mu pan pre na Klɛntro ble yire li. 20 Kre nyjila kre, na srawɔfɛɛnlɛ pre, na Levi leele pre nɛɛrɛ laa peyɛ na paala kolo na. Levi leele pre na Klɛntroble yurɛ pre gbo leele mblɛ pra yiri Babylon tra nu mu pan pre, na pe wolo srawɔfɛɛnlɛ pre, na peyɛ pan. 21 A Israel leele pre pra yiri Babylon tra nu mu pan pre na kaara yire ka. Pre na leele mblɛ pra peyɛ wɔ mu yili pe tnifɛɛnlɛ mblɛ pe nsra pe Judae sisam paala nyjɛ yiraa pe toni nɛɛrɛ ni yire nu, mnaa Israel Nyiɛkpɔɔ wre sumi kre. 22 Ble kɔɔnashin, na pee wa na ble kpɔɛ nyjɛ nu pe nsraa paanu nyjɛ nu yiisi n wa kaa yire lii yɛshɔɔrɔ ni. Ŋgi na hin? Na o Tafun Nyiɛkpɔɔ wre tia yɛshɔɔrɔ pe nyi, ŋga wra Assyria ŋunu wre jawala chinɛ, mna tia wra ya pe na, a pra kolo ta mna Israel Nyiɛkpɔɔ wre Suminyuŋgo kre sin kre ndra na.