Tattenai Na Hlɛ Nyunɔ Mu Sɛ Ŋunu Darius Ŋga
5
Kre nyjila kre nu Nyiɛkpɔɔ kee nyanyofun Haggai, na Nyiɛkpɔɔ kee nyanyofun Zechariah, ŋmba na wi Iddo nana wre na Israel Nyiɛkpɔɔ wre mɛɛ tɛɛ mu kee nya mu yo Judah, na Jerusalem leele pre pan. 2 A Shealtiel biblɔ Zerubbabel, na Jehozadak biblɔ Jeshua na peyɛ kna mna sɛ na Suminyuŋgo kre siin Jerusalem na na, a pre Nyiɛkpɔɔ keenyanyofɛɛnlɛ shiin pre naa yaa pe na.3 A Tattenai ŋmba na wi Euphrates lɔɔ kre yilatohaa wa kre lefun wre, na Shethar-Bozenai, na pe wolo plɛ na sɛ Jerusalem na mna sɛ pe wie mbo, “Ndro ŋmbi u e ŋga kolo na e kre Suminyuŋgo ŋga gbeele mbe sin hin?” 4 A pra ndru mna pe wie mbo, “Yire mblɛ e lawee ŋga siin ŋga, e mɛɛ ŋgi hin?” 5 La, Nyiɛkpɔɔ naa wa pre Judah loplombo pre kro, ki tia Persia loplombo pre nsra pe tɔ kolo, mna sɛ su na pra hlɛ nyunɔ mna sɛ mandiɛ bɔ Ŋunu Darius pan, a wra chin mna hlɛ nyunɔ mna pan mu pe ŋga.
6 Kee ŋga abani lopom Tattenai, na Shethar-Bozenai na u wolo mblɛ praa Euphrates yila tohaa wa le pre na nyunɔ mna sɛ Ŋunu Darius ŋga kre na yi kre mbo,
7 “Tolɛɛ o mu shaari. 8 Kee ŋga o chaa mbe mu loo yi na, o sɛ Judah tra nu, mu sɛ Nyiɛkpɔɔ ŋmba u kpɔɔ wre Suminyuŋgo kre lawee, mu nya na pee wa na ki siin na dnɛ kpɔɛ ni, mu na kɛɛn leni ki mboo kre nu. Pe tnumu kre tuni titi, a ki tia pe tnumu kre na shie yiɛ.
9 Ŋga o na da wa kre, o na pe loplombo pre wie na ndro ŋmbi u pe ŋga kolo, a pra Suminyuŋgo kre gbeele na siin hin?
10 A o na ndru mna pe loplombo pre mɛɛ wie, imi kie pe mbe o jaa pe mɛɛ yire nyunɔ mbe paan mu ŋga. 11 Ŋga o na pe wie, kee ŋga pra yo na yi kre mbo,
‘Nyiɛkpɔɔ ŋmba u nyjeeri na tra wa wre sumifɛɛnlɛ lɛ wre, a o pan mu na kre Suminyuŋgo ŋga Israel ŋunu jaŋgafun wa na sin fa kre gbeele na siin.
12 La, o tolɛɛlɛ pre na tia Nyiɛkpɔɔ ŋmba uu wa nyjeeri wre krɔ na kun na pe ni, a wra pe wru mu le Babylon ŋunu Nebuchadnezzar wre kɛɛ, a wra pan mna kre Suminyuŋgo ŋga ja, mna leele pre yii mna sɛ Babylon tra nu.
13 La, kraa wa wa, ŋga Babylon ŋunu Cyrus na pan mu jɔɔn li, ki yɛlɛ ŋga kra yiɛklu kre nu, kre wra mbra le na o ndru mbe paan Nyiɛkpɔɔ Suminyuŋgo ŋga gbeele mbe sin. 14 Swanyiɛ, na swafiŋge yirɛ nyjɛ Ŋunu Nebuchadnezzar na koli Nyiɛkpɔɔ Suminyuŋgo wa Jerusalem na, mna sɛ yi tɛɛ u sɛɛn nyuŋgo Babylon na yire, Ŋunu Cyrus na sɛ yi wɔ sɛɛn nyuŋgo wa mna blɔ wa ŋga, u mɛɛ naa Sheshbazzar. Wre wra tɛɛ abani lopom Judah tra nu.’ 15 A wra yo u pan mbo, ‘Sɛ yire yirɛ nyjɛ tɛɛ Suminyuŋgo wa Jerusalem na, mu Suminyuŋgo kre gbeele mu sin ki titɛɛ wa.’ 16 Ki tia Sheshbazzar na pan mu Suminyuŋgo kre nɔɔ le Jerusalem na. A mu yire kre ble kre na mu pan mu su imi nyu, oo wa na ki siin, o n ta mu kɔ tun.
17 Kena na ki tna ŋu tolɛɛ ŋunu pan, ti mbe pe le lebiile fakee hlɛ yire nu Babylon na mbe le, na yɛŋgɛ yi na Ŋunu Cyrus na mbra le na pe kre Suminyuŋgo ŋga gbeele mbe sin Jerusalem na. Na maa kɔ mbe mu mu lɛɛ kee yo o pan.”