3 La, Zerubbabel, na Jeshua, na jlom loplombo pre na yo pe pan mbo, “Ki n fna mbe e kɛ le o pan mbe o o Nyiɛkpɔɔ wre Suminyuŋgo kre sin. Wre chiin ki fna o ki sin mbe o Tafun Nyiɛkpɔɔ wre ŋga, imi na Persia ŋunu Cyrus ki yo kre.”

4 Ŋga kra pan ma kre, a pe loŋgoolo mblɛ pra pan mbe ya pe na pre na jawala le na pie Judah leele pre sɔɔnrɔ gbo, mbe pe le fiɛrɛ mbe pia jaa Suminyuŋgo kre sin, ki tia pra pe jawala tɔɔra titi. 5 Leele pre na sɛ Persia loplombo pre dɔli, a pra yiri mna Judah leele pre taan mbe pia jaa tnumu kre tun. Hali nyjila ŋga ni Persia ŋunu Cyrus naa wa kre krɛrɛ, pra pe jawala tɔɔra chiin mna sɛ su na Persia ŋunu Darius na pan mu jɔɔn li.

6 Ŋga Ŋunu Ahasuerus na pan mu jɔɔn li Persia tra nu kre, ki yɛlɛ ŋga ki yiɛ klu kre nu, kre Judah, na Jerusalem loŋgoolo mblɛ praa wa mu tni pe nu pre na hlɛ nyunɔ mna sɛ ŋunu wre ŋga mna Judah na Jerusalem leele pre taan.

7 Kraa wa wa a Ŋunu Artaxerxes na pan mu jɔɔn li Persia na, a Bishlam, na Mithredath, na Tabeel, na pe wolo hamblɛ pre na hlɛ nyunɔ Aramaic yolo nu mna sɛ ŋunu wre ŋga.

8 Ki ble ka abani lopom Rehum, na nyunɔfun Shimshai, na hlɛ ka nyunɔ na mna Jerusalem taan, mna sɛ Ŋunu Artaxerxes ŋga ki yi mbo, 9 “Kre hlɛ ŋga yiri abani lopom Rehum, na tra kre nyunɔfun Shimshai, na o wolo hamblɛ pre, na kprakunfɛɛnlɛ, na loplombo mblɛ pe Tripolis, na Persia leele le pre, na kprakunfɛɛnlɛ loplombo mblɛ pe Erech, na Babylon, na Elam leele mblɛ pe yiri Susa na le pre, 10 pre na leele mblɛ ŋunu jaŋgafun Ashurbanipal na kɔ pe tra nu, a pra pan mu tni Samaria kakpɔɔ kre na, na tra ŋga ki sni Euphrates lɔɔ kre lawee yila tohaa wa kre nu. 11 Hlɛ kre lam kee yi kre.

Hlɛ ŋga shie Ŋunu Artaxerxes pan. A mu sumifɛɛnlɛ mblɛ pee wa Euphrates lɔɔ kre yila tohaa wa pre pan ki yiri. 12 Tolɛɛ, o chaa mbe mu chin na, Judah leele mblɛ pe yiri mu tra nu mu pan mu sɛ tni Jerusalem na kre, pe ndru mu na kakpɔɔ sisaa ŋga leele ndie ki kan kre siin. Pe ki nɔɔ le, mu ki mboe yire gbeele na siin. 13 Tolɛɛ, ki fna mu chin na, na maa pieri a pe kakpɔɔ kre sin, maa ki mboe yire gbeele mu sin kre, pia yirɛ nyjɛ pe woni na mu kaan, na tɔɔ ŋga pe toni na mu kaan kre tɔ na, a na ki pan ma ka we kun lebiile swa ŋga pe taa kre na. 14 Tolɛɛ, ŋga ŋu wi o kee kro kre ndra na, ki n fna o tini mbra le, mbe praa ŋunu le fiɛn. Kre ki tia o na kre kee ŋga yuu mu pan. 15 Kena o chaa mbe mu mu tolɛɛlɛ kee nyjɛ pe nyunɔ mu tɛɛ yire le, mu nya na kre kakpɔɔ ŋga leele naa ndikana kee pini, na ŋulo na pe loplombo nyu kaanri, a mu yire fafa krɛrɛ pan pe pini. Kre ki tia pra kre kakpɔɔ kre kla fa kre. 16 Ki tia o na yuu mu pan na, na maa pieri a pe kre kakpɔɔ kre sin, mu ki mboe yire gbeele mu sin kre, waa yaka ta mbe yili Euphrates lɔɔ kre yila tohaa wa na.”

17 Ŋga ŋunu na hlɛ kre lam kee loo mu kɔ kre, a wra ka nyunɔ mna pe ŋga mbo, “Hlɛ ŋga shie abani lopom Rehum, na Shimshai nyunɔfun wre, na pe wolo mblɛ pee wa Samaria na, na lawee hɛnyi nyjɛ yii wa Euphrates lɔɔ kre yila tohaa wa kre. Ni e kro shaari. 18 Hlɛ ŋga e nyunɔ mu pan mu ni ŋga kre, ni tia pe ki tɔɔnri, mu ki nɔɔ nyina ni pan. 19 A ni tia pe fakee nyjɛ pe nyunɔ mu tɛɛ yire lam le, a ki pe kpra na kre kakpɔɔ kre leele fakee nyjɛ pe nyunɔ mu tɛɛ kro nyina, na praa yiri na ŋulo, na pe loplombo taanla, na kanyaa leni leele nu. 20 Ŋulo jaŋgafɛɛnlɛ da mu ŋunumu li Jerusalem na, mna tia Euphrates lɔɔ kre yila tohaa wa leele naa tɔɔ nyininyini toni na pe kaan. 21 Kena ni chaa mbe e sɛ yo leele pre pan na pe kakpɔɔ kre siɛn ti, mbe sɛ su na mbe kala fɔŋgɔ ka ta mbe yo pe pan na. 22 E le na ee kre kee ŋga pe, mbe kefɔɔn ka wa kɔɔ o da ni ŋunumu ŋga nu.”

23 Ŋga Ŋunu Artaxerxes hlɛ kre na to pe kɛɛ, a pra ki tɔɔnri mu Rehum, na Shimshai nyunɔfun wre, na pe wolo pre nyina kre, titɛɛ kre nu to, a pra yiri mna sɛ Judah leele pre pan Jerusalem na, mna sɛ pnaŋa pe na, na pe kakpɔɔ kre siɛn ti.

24 Kre kee ŋga kra tia pra Nyiɛkpɔɔ Suminyuŋgo kre siɛn ti kolo, mna sɛ su na Persia ŋunu Darius na pan mu jɔɔn li yɛlɛ shiin nyu na.