Pra Sragbunu Kre Gbeele Mu Sin
3
Nyiɛpɔ kɔɔnashinwo kre nu, na Israel leele pre kro lawee ta mu tni pe chiɛ yire na kro, a pe kro na ndru mu pan mu fni Jerusalem na. 2 A Jozadak biblɔ Jeshua wre na u wolo srawɔfɛɛnlɛ pre, na Shealtiel biblɔ Zerubbabel na u sele wolo pre na nɔɔhle mna Israel Nyiɛkpɔɔ wre sragbunu kre sin, mbe jaa yurɛ sroo sra wɔ ki na mbe o Tafun Nyiɛkpɔɔ wre ŋga imi na pe ki nyunɔ mu le Nyiɛkpɔɔ ndro Moses mbra hlɛ kre nu kre. 3 Kii wa na praa leele mblɛ pra pe fɛ mu kun pre fiɛ, nde pra sragbunu kre sin ki nɔɔ lɛɛ kre na, mna sra wɔ ki na mu o Tafun Nyiɛkpɔɔ wre ŋga, praa bnimi, na yilakɔŋgɔ sra yire kro woni wa. 4 Leele pre na Asɛkɛ ble kpɔɛ yire li imi na pe ki nyunɔ mu tɛɛ kre, blenyini ŋga praa yurɔ sroo sra yurɛ pre kuu imi na pra ki nyunɔ mu tɛɛ kre. 5 Ŋga pra kɔ kre, a pra sɛ yurɛ sroo sra, na nyiɛpɔ Fɔŋgɔ sra, na o Tafun Nyiɛkpɔɔ sra cheche yire wɔ, yire na leele pre titi chaara sra yire ni kro. 6 Nyiɛpɔ kɔɔnashinwo kre ble ŋga ki yiɛ klu na, kre pra nɔɔhle mna yurɛ sroo sra yire wɔ mna o Tafun Nyiɛkpɔɔ ŋga, la, na pe n ta mu o Tafun Nyiɛkpɔɔ Suminyuŋgo kre nɔɔ le tun.Pra Nɔɔhle Mnaa Suminyuŋgo Kre Siin
7 Israel leele pre na swa wɔ a praa brichae, na kapintae pre fɔlɔ toni, a pra sro, na simi gbɔ wee, na olive simi wɔ mbe pe sɛ yi tɛɛ mbe cedar kɛɛn chinɛ Sidon, na Tyre leele pre pan. Mbe yire Lebanon tra nu mbe tro na yi ni lɔɔ yiɛ na mbe pan na yi ni Joppa na imi na Persia ŋunu Cyrus na ki yo kre.
8 Ŋga Israel leele pre na le Jerusalem na, mna Nyiɛkpɔɔ Suminyuŋgo kre lawee nya kre, ki yɛlɛ shiinwo kre nyiɛpɔ ŋga kra taa shiin na, kre Shealtiel biblɔ Zerubbabel, na Jozadak biblɔ Jeshua, na pe wolo hamblɛ sɔfue, na Levi leele pre, na leele mblɛ pra yiri Babylon na mu pan Jerusalem na kre kro na tunumu kre nɔɔhle, a pra Levi leele pre mblɛ pe li yɛlɛ fulo na shie kre wɔ, mbe praa pe le mbe praa o Tafun Nyiɛkpɔɔ Suminyuŋgo kre tnumu tuni. 9 Jeshua na u biile, na u leele, na Kadmiel na u biile, Hodaviah nanae na lɛ pre, na Henadad biile, na pre biile na pe leele, na Levi leele pre kro, pre praa Nyiɛkpɔɔ Suminyuŋgo kre siɛn le.
10 Ŋga nyuŋgo sinfɛɛnlɛ pre na Suminyuŋgo kre nɔɔ le kre, a srawɔfɛɛnlɛ pre na pe dodonyi le, mna pe bnɔɛ wru, a Levi leele mblɛ na lɛ Asaph bibilɛ pre na pe yambrawa wru, mna sɛ yire na o Tafun Nyiɛkpɔɔ kaan mɛɛ, imi na Israel ŋunu David na ki yo mu tɛɛ kre. 11 Praa mɛɛ koni na o Tafun Nyiɛkpɔɔ kaan mɛɛ, na mboo, na yuu mbo,
“O Tafun Nyiɛkpɔɔ
wre nyɔɔ ndro na,
a u koroo ŋga ni u nyi
mu Israel leele ŋga
kre wa blenyini.”
A leele pre kro naa gble leni, na o Tafun Nyiɛkpɔɔ wre kaan mɛɛ, ŋgi ndra na hin? Pra nya na pe o Tafun Nyiɛkpɔɔ Suminyuŋgo kre nɔɔ leni. 12 La, srawɔfɛɛnlɛ blɛlɛɛlɛ pre, na Levi leele, na pe jlom loplombo mblɛ pra Suminyuŋgo lɛɛ kre fa chin, mna nya na pe Suminyuŋgo fɔŋgɔ kre nɔɔ leni kre, pra nyɛni chichie, la, kra pe yɛshɔɔrɔ kpɔɔ mu plɛ ŋga, a praa gble. 13 Ndro nsra ja mbe pe yɛshɔɔrɔ gblee kre, na pe nyɛnɛɛ gblee kre lalaa chin, ŋgi na hin? Na ndro yire haalee pe gblee kre na kpɔɔ na lee ndie.