Nehemiah Na Sɛ Jerusalem Na
2
Ŋga pra Ŋunu Artaxerxes tɛɛ jɔɔn na, ki yɛlɛ fulowo kre nyiɛpɔ ŋga praa yeeri Nisan kre nu, kre ndaa sɛ simi gbɔwo ni mbe sɛ u ŋga, mna fooro yiɛ tɛɛ, a na ni n da mu yire u yiɛ mu fooro yiɛ tɛɛ tun. 2 Ŋga wra ni nya ma kre, a wra ni wie mbo, “Mu n na yaa, yira ŋgi ki tia mu yiɛ pe fooro ni ma hin? Aada kala ka ki mu tɔɔra jawala nu.” Ŋga wra yo ma kre, fiɛrɛ na ni yii, 3 la, ndaa kna mna yo u pan na, “Tolɛɛ, Nyiɛkpɔɔ we mu ndra tun tɔɔnrɔ. Yira ŋgi ki tia mbe ni yiɛ wa je hin? Na kre yi ŋga, kakpɔɔ ŋga na pra ni tolɛɛlɛ le kre juari, a pe ki jlonwee nyu krɔɛ kro sro mu wo.”4 A ŋunu wre na kna mna ni wie mbo, “Yira ŋgi mu chaa hin?” Bawa ndaa Nyiɛkpɔɔ ŋmba uu wa nyjeeri wre tali, 5 mna chin mu ŋunu kee kre nyu wɔ mna yo na, “Tolɛɛ, na ki tna mu pan, a mu sumifun kee mu yiɛ nyi wala, kena jande ti mbe ni sɛ Judah tra ŋga nu pra ni tolɛɛlɛ le kre nu, mbe sɛ kakpɔɔ kre gbeele mbe sin na.” 6 Kre nyjila kre, na ŋuchlɔɔ wa mu tni ŋunu jaara, a ŋunu na ni wie mbo, “Na mu sɛ mu mu ra? A nyjila ŋgi nu mu ndru mbe pan hin?” Ndaa chin na ki tna ŋunu pan na we ti ni sɛ, ki tia ndaa nyjila tɛɛ.
7 A ndaa kna mna yo u pan na, “Tolɛɛ, na ki tna mu pan, ni ŋga hlɛ mbe ni sɛ abani loplombo mblɛ pe Euphrates lɔɔ kre kro yila tohaa wa tra le pre ŋga, mbe pe ni ŋga kolo mbe ni tro mbe sɛ Judah tra nu. 8 Tolɛɛ, mbe mu ni ŋga hlɛ mbe ni sɛ Asaph, ŋmba u ŋunu klɔ tinyi le wre ŋga, mbe u ni ŋga kɛɛn nyjɛ ni mbe tɛɛ mbe lawee ŋga ki Suminyuŋgo kre fɛ mu kun krɔɛ yire pe, mbe yɛ ta mbe wa kakpɔɔ kre mboo kre na, mbe yɛ tɛɛ mbe katoo ŋga nu mbe tni kre pe.” Ŋunu wre na ni ŋga yirɛ nyjɛ ndaa u wie yire kro, ŋgi na hin? Nyiɛkpɔɔ na ya ni na.
9 Ŋunu na ŋunɔwifɛɛnlɛ loplombo, na soolo tnifɛɛnlɛ wɔ mna taa ni na, a o na sɛ Euphrates lɔɔ kre yila tohaa wa. Bawa ndaa ŋunu hlɛ nyjɛ wra nyunɔ mu ni ŋga yire wɔ mna abani loplombo pre ŋga. 10 Ŋga Sanballat ŋmba wra yiri Beth-Horon na, na Tobiah ŋmba wra yiri Ammon tra nu wre na loo na ndro wa pan na Israel leele pre chichie chaa kre, krɔ na pe kun.
Nehemiah Na Sɛ Kila Mu Jerusalem Mboe Yire Le
11 Ŋga ndaa le Jerusalem na kre, ndaa li ble taarɛ. 12 Ni nsra tia ndro na kee ŋga Nyiɛkpɔɔ chaa mbe ni pe Jerusalem na kre chin. A ndaa yiri ki ble ka blee mna leele plɛ wru mu ya niyɛ na, a o na yili fimi na. Yurɔ ŋmba o na wru mna ya na wi ni bubnɔ ŋmba ndaa nduu mu sɛ wa kre. 13 Ŋga ndroo na lɛ kre, a o na sɛ tro Landɛɛ Jlonwee ŋga kra yiɛ kan ŋmbokuŋmboe kɔlɔ na kre nu, mna yiɛ le Kafuŋgo Jlonwee kre nu. Ŋga o naa tro kre, na mboo ŋga ki juari, na jlonwee nyjɛ krɔɛ yi shɔ mu wo yire ni le. 14 A ndaa kna mu yiɛ le Blo Jlonwee ŋga kra mbra ŋunu tapla na kre nu. Ŋga ndaa da wa kre, na trohaa kre pe foo, a ni bubnɔ ŋmba na ndaa tni wre nsra ja mbe tro. 15 A ndaa tii Kidron landɛɛ kre nu ndroo kre, mna yire wa mu mboo kre le. A ndaa ndru ni kro mna pan mu yili Landɛɛ Jlonwee kre nu. 16 Chia loplombo pre nsra chin mna ni sɛ, ndee mna chin kee ŋga ni pini. Kre nyjila kre krɛrɛ na ni n kee ka yo Judah leele pre, na sɔfue, na loplombo, na lekpɔɛ pre, na leele mblɛ pie tnumu kre tun kre wa pan.
17 A ndaa chin mna yo pe pan na, “E le kanyana ŋga nu o nyi, Jerusalem ja, a ki jlonwee nyu krɔɛ yire kro shɔ mu wo. Kena e pan mbe o sɛ chia kre mboo kre gbeele mbe sin, mbe ki ti mbe nyifɛɛrɛ wa na o kuu ma na.” 18 A ndaa chin mna imi Nyiɛkpɔɔ na nyu ni na, na kee ŋga ŋunu wre na yo ni pan yire bɔ pe pan. A pra kna mna yo ni pan mbo, “E ti mbe o nɔɔhle mbe ki sin.” A pra peyɛ kna mbe o tnumu kre tun.
19 Ŋga Beth-Horon ndro Sanballat, na Ammon lopom ŋmba praa yeeri Tobiah, na Arab ndro Geshem na kee ŋga o jawa mbe pe loo kre, a praa o pini na tɛɛ na yuu mbo, “Kee ŋgi e pini ŋga hin? E chaa mbe ndru mbe Jerusalem sin na, mbe yiri mbe ŋunu nyu kee taan ra?”
20 A ndaa kna mna yo pe pan na, “Nyiɛkpɔɔ ŋmba uu wa nyjeeri wre we ti mbe o ja mbe ki pe. U sumifɛɛnlɛ lɛ wre, a kia mu oo nɔɔhle mbe Jerusalem sin na, la, yire rɛ, e kɛ n wa Jerusalem kee ka nu, a yaa yaka ta ki pee nu, a e n chaa ki fakee ka nu.”