3 A Hassenaah bibilɛ pre na Mbroe Jlonwee kre sin. Pra ki ndra kɛɛn kpɔɛ yire wa, mna ki krɔɛ yire le ki na, mna tɔɔnrɔ tɛɛ mu yi yii, mna yirɛ nyjɛ ni pie na yi kani yire le yi na. 4 A Uriah biblɔ Meremoth ŋmba tolɛɛ na wi Hakkoz wre na sɛ sin mna soo pre na. Berekiah biblɔ Meshullam ŋmba tolɛɛ na wi Meshezabel wre wra taa, wre lawee kre rɛ, gbeele wra ki gbeele, a ŋmba wra taa na wi Baana biblɔ Zadok, wre chɔɔ gbeele wra lawee kre gbeele. 5 Chia ŋga praa yeeri Tekoa kre leele pra gbeele mu soo pe na, la, pe chia kre loplombo pre nsra tnumu shelee ŋga pra le pe kɛɛ kre tun.

6 Paseah biblɔ Joiada, na Besodeiah biblɔ Meshullam pra Jeshanah Jlonwee kre sin. Pra ki krɔɛ jeelee yire kan, mna krɔɛ le ki na, mna ki tɔɔnrɔ nyjɛ ni pie na ki kani le ki na. 7 Melatiah ŋmba wra yiri Gibeon na wre, na Jadon ŋmba wra yiri Meronoth na wre, pre na Gibeon na Mizpah leele plɛ pra gbeele mu soo. Pra gbeele mna sɛ su Euphrates lɔɔ kre yila tohaa lawee ŋga nu abani lopom katoo na nyi kre. 8 Harhaiah biblɔ Uzziel swanyiɛ fiireefun wre wra gbeele mna soo, a Hananiah ŋmba wraa tlade pini wre na gbeele mna soo mu sɛ su Mboo Vala wo kre na. 9 A Hur biblɔ Rephaiah ŋmba wra pe Jerusalem yɔɔ kre ŋunu wre na gbeele mna soo. 10 A Harumaph biblɔ Jedaiah wre wra lawee ŋga kra yiɛ kan u katoo na kre gbeele mu soo, a Hashabneiah biblɔ Hattush wre na gbeele mna soo. 11 A Harim biblɔ Malkijah, na Pahath-Moab biblɔ Hasshub pra gbeele mna soo, mna nyuŋgo gedeŋge ŋga nu praa paanu foo kre gbeele mu sin. 12 A Hallohesh biblɔ ŋmba na wi Jerusalem yɔɔ haŋa kre ŋunu wre na u bichiɛlɛ pra gbeele mna soo.

13 Blɔ ŋmba praa yeeri Hanun wre, na Zanoah chia kre leele pra Landɛɛ Jlonwee kre gbeele mu sin. Pra ki krɔɛ kro le ki na, mna ki kan yirɛ le ki na. Pra lawee ka gbeele mu ya, ki titnɔŋɔ naa yaadi lafɛɛ kunɔ mna sɛ su Kafuŋgo Jlonwee kre na.

14 Kafuŋgo Jlonwee kre, Recab biblɔ Malkijah wre wra bawa gbeele, a wre na wi Beth-Hakkerem lawee kre ŋunu. Wra ki gbeele mu sin, mna ki krɔɛ le ki na, mna ki kan yirɛ le le ki na.

15 Blo Jlonwee kre, Col-Hozeh biblɔ Shallum ŋmba na wi ŋunu Mizpah na wre wra ki gbeele mu sin, mna ki ndra tɔ, mna krɔɛ le ki na, mna ki tɔɔnrɔ nyjɛ na pie na ki kani yire kro le ki na. Wre wra ndru mna mboo ŋga kraa wa na shie Siloam tapla ndoo wa mu mbra ŋunu kagbla na kre sin, mna sɛ su yira ŋga na pe taanri mbe nduu mbe sɛ David kakpɔɔ na kre gbeele. 16 Azbuk biblɔ Nehemiah ŋmba na wi Jerusalem kokoo ŋga praa yeeri Beth-Zur kre ŋunu wra gbeele mu soo. Wra gbeele mna sɛ su lawee ŋga kra yiɛ kan David faŋga na kre na, hali mna sɛ su tapla ŋga leele pre titi na tuu kre na, mna tro mna sɛ su ŋunɔwifɛɛnlɛ tnihaa kre na.

17 Mblɛ pra sin mna taa na lɛ Levi leele pre. Bani biblɔ Rehum wraa pe le. A Hashabiah ŋmba na wi Keilah yɔɔ ŋunu wre wra gbeele u leele haa mna soo pe na. 18 A Henadad biblɔ Binnui ŋmba na wi Keilah yɔɔ haŋa ŋunu wre wra gbeele mna soo. 19 Jeshua biblɔ Ezer ŋmba na wi ŋunu Mizpah na wre wra gbeele mna soo, wra yire mboo ŋga kra yiɛ kan lawee ŋga nu praa ŋunɔ wiyirɛ teeri kre na, mna sɛ su mboo kre kɔm na. 20 A Zabbai biblɔ Baruch wre na gbeele nyibinyiɛ ni mna yire mboo kre kɔm na mna sɛ su srawɔfun lopom titi Eliashib katoo jlonwee kre na. 21 A Uriah biblɔ Meremoth ŋmba tolɛɛ na wi Hakkoz wre wra gbeele mna soo, wra yire Eliashib katoo jlonwee kre na mna sɛ su ki nyu na.

22 Mblɛ pra gbeele mna soo na lɛ srawɔfɛɛnlɛ mblɛ praa wa chiɛ nyjɛ yira Jerusalem fɛ mu kun pre. 23 A mblɛ pra gbeele mna soo na lɛ, Benjamin, na Hasshub, pe katoo yɛsimi pra gbeele. Ŋmba wra gbeele mna soo na wi, Maaseiah biblɔ Azariah ŋmba tolɛɛ na wi Ananiah wre, mboo ŋga kraa wa u katoo yɛsimi kre wra gbeele. 24 Ŋmba wra gbeele mna soo na wi Henadad biblɔ Binnui, wre na yire Azariah katoo kre lawee mna sɛ su mboo kre kɔm na. 25 A Uzai biblɔ Palal wre na yire kɔm kre na, mna lawee ŋga kra yiɛ kan ŋunu katoo nyuŋgo gedeŋge kre jenu ŋga kra yili fimi na mna mbra lawee shiefɛɛnlɛ kagbala kre na kre gbeele. A Parosh biblɔ Pedaiah wre na gbeele mna soo. 26 A Suminyuŋgo kre tnumu tunfɛɛnlɛ mblɛ praa wa Ophel nyambie kre na pre na gbeele mna sɛ su lawee ŋga kra yiɛ kan Nyumu Jlonwee kre na, na shie nyuŋgo gedeŋge ŋga kra wa na shie yila finhaa kre na. 27 Mblɛ pra gbeele mna soo na lɛ bilɛ mblɛ pra yiri Tekoa na kre, pre pra yire nyuŋgo gedeŋge kpɔɔ kre lawee mna gbeele mu sɛ su mboo ŋga praa yeeri Ophel mboo kre na.

28 Lawee nyjɛ srawɔfɛɛnlɛ pre na gbeele yire na yiɛ kan pe kalonyi na, na shie Soolo Jlonwee kre nyjeeri haa. 29 Immer biblɔ Zadok wre, mboo ŋga kraa wa u katoo yɛsimi wra gbeele. A Shecaniah biblɔ Shemaiah ŋmba wraa yila fin haa jlonwee kre sri wre na gbeele mu soo. 30 A Shelemiah biblɔ Hananiah, na Zalaph biblɔ Hanun ŋmba wra taa kɔɔnanu wre wra ndru mu gbeele mu soo. Ŋmba wra gbeele mna soo wre na wi Berekiah biblɔ Meshullam, wra gbeele mu yiɛ kan u katoo na. 31 Ŋmba wra gbeele mna soo na wi Malkijah fiireefun wre. Wre wra gbeele mna sɛ su Suminyuŋgo tnumu tunfɛɛnlɛ pre, na jafalifɛɛnlɛ katoo kre na. Kre ndoo ŋga na yiɛ kan Fnihaa Jlonwee kre na, mu mbra nyuŋgo gedeŋge ŋga kraa wa na shie nyjeeri haa kre na. 32 A fiireefɛɛnlɛ pre na jafa lifɛɛnlɛ pre na mboo kre haŋa gbeele. Pra gbeele mu yire kɔm nyuŋgo kre na mna sɛ su Mbaala Jlonwee kre na.