3 Nyjila ŋga ni Sanballat naa paara kre, na Ammon ndro Tobiah wree wa mu yire u jaara. A wra kna mbo, “Mboo ŋga pe siin ŋga, na ŋmbokuŋmbo kuraa nduu ki na kre, kie juari mbe wo.”

4 La, ndaa nyiɛtali mna yo na, “Nyiɛkpɔɔ, le imi na pe o pini na tɛɛ, ti mbe kee nyjɛ pe yuu o na yire tuu pre titi na. Ti mbe leele pan mbe pe foolo, mbe pe yii mbe sɛ tra fɔŋgɔ nu. 5 Maashia pe sisam, na pe kefuɛn nyjɛ pe pini yire ti mbe pe kɛ, ŋgi na hin? Pe wre mblɛ o mu lawee kre siin pre tɛɛlɛ.”

6 O na mboo kre sin a ki gedem na da yɔɔ, ŋgi na hin? Leele pre na lɛɛ nunu tɛɛ na tnumu tun.

7 Ŋga Sanballat, na Tobiah, na Arab leele, na Ammon leele, na Ashdod leele pre na loo na oo wa na Jerusalem mboo kre siin, na ki vromboe yire yurɔ kre, pe krɔ na kun kpɔɔ. 8 A pe kro na nyu nunu pe mbe paan wi na o ni Jerusalem na, mbe tɔɔra le o nu. 9 La, o na o Nyiɛkpɔɔ wre tali, mna leele wɔ a praa pe sri lafo na blee.

10 Ŋga kra pan ma kre, Judah leele pre naa taanri na yuu mbo, “Fuŋgaami ka ki kuun o faŋga na, a kponkpon yiree wa mu nɛɛ tɛ, kena oo jaa mboo ŋga siin kɔ ŋgaa?”

11 A o loŋgoolo pre naa yuu mbo, “Leele mblɛ naa yo pie chin kre, na o le pe nu, mbe pe gbo mbe pe pra pe tnumu ŋga na.”

12 A Judah leele mblɛ praa wa mu tni mu chaa pe nu pre na pan mna yo o pan gbee tataara mbo, “Kolo kro na, pie paan e tɔ.” 13 Ki tia ŋga ndaa mandiɛ yire loo ma kre, ndaa leele pre yɔɔlɛ jlom jlom, a pra chomboolo, na brɔfiɛn yiɛshiin, na snimi tɛɛ na leele pre sri mboo kre lawee nyjɛ yi nsra gede kre nu. 14 Ndaa nya na kee kre leele pre jawala tɔɔra, a kra tia ndaa yo loplombo pre, na pe yɛkulo pre, na leele pre hamblɛ pre kro pan na, “Yaashia o loŋgoolo pre fiɛ. E sɔɔnri na o Tafun Nyiɛkpɔɔ wre kpɔɔ, a u kee fiɛrɛ ni titi, kena e u jawa, e wi e e wolo pre, na e biile, na e chiɛlɛ, na e kalonyi yire ŋga.”

15 Ŋga o loŋgoolo pre na loo na o kee nyjɛ pe jawa na o ni yire loo kre, pra nya na Nyiɛkpɔɔ wra tia pe jawala kee yire na pe waara. A kra tia o na ndru mna sɛ na mboo kre siin.

16 Mu yire kre nyjila kre na shie, na ni leele pre yɔɔ tnumu tuni kre, mbe pe yɔɔ yire mbra sri na chomboolo, na snimi, na ŋunɔ wiyirɛ nyjɛ ni pe peyɛ toni ni kɛɛ. A pe yɛkulo pre naa wa na yaa leele pre na. 17 Leele mblɛ praa yirɛ tru na paan kre, we wiyira yii kɛ nunu ni, mbe kɛ nunu tɛɛ mbra yirɛ tru. 18 A mblɛ praa siin pre na pe brɔfiɛn yiɛshiin pɔ pɔ sɛlɛ. La, bnɔ fɔfun wre naa wa mu yire ni jaara.

19 A ndaa yo loplombo, na yɛkulo, na leele hamblɛ pre pan na, “Tnumu kre kpɔɔ mu tia o nyaala oyɛ nu titi. 20 Kena na e waa bnɔ kre mana loo, e pan mna nyaanyaa, o Tafun Nyiɛkpɔɔ wre we wi mbe o ŋga.”

21 Ki tia blenyini ŋga, oo yiri yaari mbe sɛ tnumu tun mbe su na yila we to mbe wɔɛlɛɛ yili. O yɔɔ we na tnumu tuni, mbe o yɔɔ yire mbe chomboolo yii mbra sri. 22 Kre nyjila kre ndaa yo leele pre pan na, “Na ble wɔ tnumu tunfɛɛnlɛ pre na, mblɛ pe pe sri pre kro fna mbe kro Jerusalem na mbra pe sri, na nyiŋge se mbe praa tnumu tuni.” 23 Hali na ble wɔ, mi na ni wolo pre, na ni sumifɛɛnlɛ pre, na shiefɛɛnlɛ pre kro, wa n sraa yirɛ woni uyɛ na. Nyjila kro nu o ŋunɔ wiyirɛ naa wa o kɛɛ, hali na lɔɔ o shie kuraa yiraa wa o kɛɛ.